Ilaqutariit suliffeqarfiutillit pinngortitami alianaaqisumi kulturitsinnillu misigisassarsiortitsinissamik neqeroortartut

Nunatsinnut takornariat amerliartuinnarnerat nunatsinni suliffeqarfiit minnerumaat sullitaqarneruleraluttuinnarnerannik kinguneqarpoq. 

Nunatsinni suliffeqarfiit minnerumaat annerumaallu Nuummi mittarfissuaqalernera, Ilulissani mittarfissuaqalertussaanera silaannakkullu nutaanik aqquteqalernera nunatsinni takornariaqarnerulernissaanik kinguneqassangatillugulu takornariaqarnerusalernissaanut piareersarput.

Qasigiannguani ilaqutariit takornariartitsiveeqqamik – Mikami Guest Housemik – piginnittut Ilulissani mittarfissuassap aappaagu ammarnissaanut qilanaarput.

Taakkuami Københavnip Nuullu akornanni timmisartuussinissaraluanik taamaatitsisoqaqattaarnera pissutigalugu aasaq manna pisarnerminngarnit inniminniiffiginikinnerupput.

– Ukioq mannaminngarnilli ilumut takornariaqarnerusimanersoq ulapaarunnaareerutta aatsaat nalilersinnaalissavarput, Qasigiannguani Mikami Guest Housemik piginneqataasoq Jûnârak’ Mikaelsen erseqqissaavoq.

Ilaqutariit suliffeqarfiutillit

Ilaqutariit Mikaelsenikkut, tassa aappariit Andreas aamma Laila Mikaelsen taakkualu qitornaat pingasut perorsimalereersut Avaruna, Jûnârak’ aamma Mikami Guest Housemik 2018-imi pilersitaminnik piginnittuullutillu takornariartitsiviutiminni tassani takornarianit ussagarneqartartumi ukioq kaajallallugu sulisarput.

Ilaqutariit suliffeqarfiutillit taakkua Qasigiannguani arfinilinnik unnuiffissanik illuuteqarlutillu asimi aasaanerani unnuiffissanik aamma illoqarlutillu illuaraqarput.

Nunakkut isorartuumik pisukkusuttunut toqqinik, pisatsersuutissanik, igaffimmi atortunik ikiortariaqalernermilu pisariaqavissorsinnaasumik oqarasuaammik qaammataasiamut attavilimmik aamma attartortitsisarput.

Misigisassarsiorfiusinnaasunik neqeroortartut

Aamma soorlu illoqarfiup oqaluttuassartaanik pisuttuaqatigiinneq, katersugaasiviliarneq, ilaqutariinnut kaffillertunukarneq kalaallimillu nipilersortartumik ilisimaneqarluartumik appisimaartoqarnertalimmik kalaalimernik ooqattaarititsineq nunatsinni kulturitsinnik misigisassarsioriartorlutik takornarianut neqoroorutaannut ilaapput.

Taamatuttaaq igaassat akussallu nunatsinneersut atorlugit nerisassianik mamarsaakkanik aamma ooqattaarisitsisarput.

Aamma soorlu arfernik, umimmannik, aqissinik siumugassarsiornertalimmik asimilu aasaanerani unnuiffissamut illumut alakkaanertalimmik Qasigiannguillu avannaani kangerliumarngup isuata tungaani kuummi eqalunniarnermik neqeroortarput.

Nuummut timmisartuussinissaraluanik taamaatitsinerit

Mikami Guest Housep unnuiffissaatai aasaanerani ulikkaaqqakkajupput, unnuiffisaannulli aasaq manna pisarnerminngarnit inniminniisukinneruvoq.

Nuup mittarfissuartaavanut timmisartuussinissaraluanik taamaatitsinerit nunatsinnut takornarialersaaraluit Nuummut tikinngitsoornissartik ernummatigalugu nunatsinnukanngiinnartarnerannut pissutaaqataasut, Jûnârak’ Mikaelsen isumaqarpoq.

Tamannalu tassa Danmark aqqusaarlugu nunatsinnukarnissaminnut nangaalersarnerannik kinguenqarpoq.

– Taamaammat timmisartuussinissaraluanik taamaatitsiinnarnerpassuit silaannakkulli aqqutinik allannguinerit isumanerlutsitsipput, Nuullu mittarfissua takornarianut isumalluutituaajunnaarpat, tamanna ilorraap tungaanukartitsissasoq neriuutigaarput, Jûnârak’ Mikaelsen oqarpoq ilisimatitsissutigalugulu Ilulissani mittarfissuassaq 2026-mi ammareernerani takornarialersaarlutik inniminneereersimalersut aasaq mannaminngarnit amerlanerusut.

Arnaat kræftimik eqqugaasimasoq

Ilaqutariit suliffeqarfiuuterallit imminni aamma eqqugaasimapput.

– Anaanarput – tassa Mikami Guest Housemi allaffimmiorput ataqatigiissaareqqissaartorput – kræftimik 2024-p naanerani eqqugaavoq. Tamanna aallussiniarnitsinnut soorunami kalluaavoq.

– Mikamimi ukioq naallugu sullitaqallattaarpugut, unnuiffissaativulli aasaq manna ulikkaaqqanngillat. Tamanna saaffiginnissutinut akilertortannginnitsinnik, siornatigutulluunniit aallussititiginnginnerput pissutigalugu innersuunneqarpiarunnaarnitsinnik pissuteqarsimasinnaavoq, Jûnârak’ Mikaelsen oqarpoq.