Ilulissani takornariartitsivik nutaaq
Ilulissat Local Guide Jan Cortsenip nuliata Akisok Cortsenip 2018-imi junimi pilersippaat.
Piffissarlu siulleq ingerlalluaraluartoq,
2020-mi nunarsuaq tamakkerlugu coronap tuniluutilerneratigut Kalaallit Nunaani
suliffeqarfippassuit allat assigalugit takornariartitsivik ajornartorsiulerpoq,
2021-milu oktoberimi matuinnattariaqassallugu piginnittoq aaliangerpoq.
Ilulissani takornariartitsivik nutaaq
Ilulissat Local Guide Jan Cortsenip nuliata Akisok Cortsenip 2018-imi junimi pilersippaat.
Piffissarlu siulleq ingerlalluaraluartoq,
2020-mi nunarsuaq tamakkerlugu coronap tuniluutilerneratigut Kalaallit Nunaani
suliffeqarfippassuit allat assigalugit takornariartitsivik ajornartorsiulerpoq,
2021-milu oktoberimi matuinnattariaqassallugu piginnittoq aaliangerpoq.
Piffissarli
kingulleq atorlugu suliffeqarfiup ingerlaannarnissaa pillugu aappariit suliuniuteqarnerisigut
suliffeqarfik ingerlaqqippoq, maannalu ima ingerlalluartigilerpoq septemberimi
piginneqatigiiffittut aallartissinnaalerluni.
Aallarnisaasutut unammilligassat amerlagaluaqisut
tunniutiinnajuitsuunissaq pingaaruteqartoq, Jan Cortsen aamma Ilulissani
takornariartisivinniit quligiluaniit pigineqartumi Ilulissat Excursions ApS-imi,
martsimi pilersinneqartumi pisortaasoq, oqarpoq.
Imminut piumaffigineq
2020-mi coronap tuniluunnerata nalaani
Ilulissani takornariaqanngimmat Jan Cortsen kommunip bussiini ingerlatsisuuvoq,
unnuillu ilaanni sulitilluni eqqarsaaterpassuit niaquani kaaviinnalerput.
- Illoqarfiup bussiini
suliinnarniaruma namminersortutut inuuninnilu anguniakkakka
piviusunngortinnaviarnagit eqqarsaatinni kaaviinnalerput, eqqarsaatikkalu
itingaarmata bussit unittarfiat qaangiinnarlunga allaat taamani ingerlavunga.
- Suliffeqarfillu matuinnassallugu isumaqatigeereeraluarluta
tunniutiinnarniarnanga uannut anguniagassinniarlunga aaliangerpunga, taanna
oqarpoq.
Piffissarlu tulliuttoq sivisooq suliffeqarfimmut
ilungersunartumik inissisimaffiummat ikioqatigiilluarnissaq pingaaruteqartoq,
aappariit aallarnisaasut oqaatigaat.
Ikioqatigiinneq unammilligassallu
- Takornarialeriffiup ilungersunartumik
ingerlanerani nuliama ilinniartitsutut atorfeqartup akiligassat akilersorpai,
tamannalu nukipparujussuarnik uannut tunisisarpoq, taannalu naammagittarluni
tapersersuisimanngitsuuppaat suliffeqarfiuterput maannakkut ineriartorluartoq
qangali unereersimassagaluarpoq, Jan Cortsen oqarpoq.
Aammali suliffeqarfimmik
ineriartortitsissagaanni aningaasaliinissaq pinngitsoorneqarsinnaanngilaq,
kisiannili aningaaseriviit upperinnilersinnissaat ajornakusoorsinnaavoq.
- Takorluukkat
piviusunngortinniarlugit aningaaserivinniit upperineqarani annernarpoq
pakatsinarlunilu. Kisiannili aningaasanik attartorniarninni itigartinneqaaraangama
pakatsinera takutinneq ajorpara, tullissaanulli pitsaanerusumik
takutitsinissara siunnitiinnartarpara. Siunissamilu aningaaserivinniit
aporfilersugaajunnaarnissarput upperaara, taanna oqarpoq.
Aningaaseriviillu aallarnisaasunut
oqinnerusumik atugassaqartitsisuuppata, tamanna sukkanerusumik
ineriartornissamut periarfissiissagaluartoq, Jan Cortsen sumaqarpoq.
Siunissamut piareersarneq
Ilulissat Local Guide ApS-ip
piginneqatigiiffinngortinnera Ilulissani mittarfissuup 2026-mi atulernissaanut
piareersarnertut isigineqartariaqartoq, Akisok Cortsen ukiuni 13-ini
ilinniartitsisutut sulisimasoq eqqumiitsuliornermilu ilinniarfimmi
ilinniakkamik naammissimasoq oqarpoq.
Taanna Ilulissat Local Guide ApS-imi
piginneqataanermi saniatigut Ilulissat Excursions ApS-imi piginneqataallunilu
siulersuisuni ilaasortaavoq.
- Maannakkorniit suli
annertunerusumik takornarissaniit atorneqarnerulernissarput upperaarput aammali
takornarialerisut nunaqavissut amerlanerulerpata, taakkulu pitsaasumik
ineriartorpata, taava tamanna Avannaata Kommunianut annertuumik iluaqutaanissaa
qularutiginngilarput.
- Ukiut siuliinili uinga
takornariaqarnerup iluani namminersortutut suleqatigilissallugu isumaqatigiinnikuuvugut,
taamaattumik ukiuni tulliuttuni ilinniartitsisutut suliunnaarlunga
takornariaqarnerup iluani tamakkiisumik suliaqalernissara siunissivara, Akisok
Cortsen, uinilu Jan Cortsen marlunnik meeraqartut oqarpoq.
Ilulissat Local Guide ApS 2022-imi augustimi
Poca 600-mik ilaasunik angallassinissamut akuerisaasumik angallatitaarpoq,
isertitallu 80 procentiisa missaat tassanngaanneersuupput, taassumalu
saniatigut aapparit Ilulissat eqqaani illuaqqamik unnuisarfiuteqarput,
Suliffeqarfik illoqarfiup qeqqani allaffimmik
attartugaqarpoq, taannalu tammaviutsussarsiniartarfittut aamma atorneqassaaq.
