Future of Greenland:
Inuussutissarsiorneq aallaavigalugu isumasioqatigiisitsinermi inuusuttut peqataanissamut periarfissaqalerput
Ataasinngornermi maajip 13-iani inuussutissarsiorneq aallaavigalugu inuusuttut isumasioqatigiinnerannut inuusuttut 455-it 14-init 28-nut ukiullit peqataassapput, ukioq mannalu piujuaannartitsineq sammineqassaaq.
Inuussutissarsiorneq aallaavigalugu isumasioqatigiinnerup Future Greenlandip aallartinnissaa ulloq ataaseq sioqqullugu, Katuap inersuaani inuusuttut isumasioqatigiinnerannut Future of Greenlandimut, piujuartitsinermik sammisaqartumut, inuusuttut 455-it 14-init 28-nut ukiullit isersinnaapput.
Leiff Josefsen
Sulisitsisut inuusuttunik isumasioqatigiissitsinissaminut ”Future of Greenland”-imut peqataasoqarsinnaanikkut inissaarulluni ulikkaartoq nalunaaruteqarpoq, tassani Kalaallit Nunaata inuussutissarsiornikkut siunissaani piujuartitsineq pillugu isumasioqatigiinnissamut inuusuttut 455-it 14-init 28-inut ukiullit ilinniartitsisussaallu peqataaniarlutik nalunaarput.
Tassani inuusuttut katersuullutillu Kalaallit Nunaata siunissami qanoq piujuartitsisuunissaa pillugu oqallinnermut peqataatinneqassapput.
Inuusuttunut ataatsimeersuartitsineq siulleq, Future Greenlandip ukiut allortarlugit ingerlanneqartartup tunngavigisaatut ittoq, Sulisitsisut aaqqissuuppaat.
- Nunatsinni politikerit nuimasuut naapissinnaanerisa saniatigut, inuusuttut aamma periarfissaqassapput demokratii pillugu ilikkagaqarnissamut, qanoq tamanut ammasumik oqalliffissiat atorneqarsinnaasut, taakku demokatiip iluani peqataasinnaanermut qanoq atorneqarsinnaasut, qanoq saqqummiukkusutat pitsaanerpaamik siammartsinniarneqarsinnaasut, inuusuttut nunatsinni aallartitsiniarnermik sammisaqartut, nunatsinni nerisassat nungusaataanngitsumik pissarsiarineqartartut, issittumi qinikkatut sulineq, nunarsuarmi ”qumariartuinnartumi” torersumik oqaloqatigiittarnissamik pisariaqartitsineq, aammalu Kalaallit Nunaanni eqqumiitsuliorneq piorsarsimassutsimullu sammisut assigiinngitsut aallaavigalugit napaniuteqarsinnaaneq pillugit sammisaqarlutillu saqqummiussivigineqassapput, tusgassiuutinut nalunaarummi Sulisitsisut allapput.
Nunarput tamakkerlugu aallakaatinneqassaaq
Ataasinngorpat maajip 13-ani inuusuttut isumasioqatigiinneranni saqqummiussinerit, oqallinnerit, ilasseqatigiinnerit, politikkimut tunngasunik oqallinnerit aammalu Kalaallit Nunaanni nunanilu allani inuussutissarsiornermit isumassarsinerit misiginissaat inuusuttut periarfissaqarfigissavaat.
Inuusuttut Qaanaamit, Aasiannit, Sisimiunit, Nuummit Qaqortumillu peqataasut Katuami ataatsimeersuarnermut peqataassapput, tassanilu angalanerat najugaqarnerallu suliffeqarfinnit najukkamiittunit aningaasalersorneqarsimapput. Sinerissamili atuartut ataatsimeersuarneq malinnaaffigisinnaavaat.
-Inuussutissarsiornerup peqqissup pingaaruteqassusia, aamma inuussutissarsiortut imminnut politikkerinillu naapitsigaangata qanoq ataatsimoorluta angusaqarsinnaanersugut inuusuttunut takutikkusupparput. Taamaalilluni Future of Greenland iluatsilluareerpoq. Ataatsimeersuarnermut inuussutissarsiortut aningaasalersuiniarlutik suleqatigiissinnaasut takutereerparput, taamaalillutalu inuusuttut peqataatinneqarnissaat pingaaruteqartuusoq takutipparput, Sulisitsisuni pisortaq Christian Keldsen Sermitsiamut oqarpoq.
Kalaallisut qallunaatullu isumasioqatigiinneq internetikkut aallakaatinneqassasoq Sulisitsisut ilisimatitsipput, aammalu panelimi peqataasunut oqalliseqataasunullu apeqqutit oqallinnissamut tunngavissiisinnaasut digitalikkut nassiunneqarsinnaapput.
Suliffeqarfiit aningaasaateqarfiillu arlallit Sulisitsisunut tapiissuteqarsimasut suleqatigalugit inuusuttut isumasioqatigiinnissaat piviusunngorpoq.
