Jacob Nitter:
Dash-8 timmisartut nakkutilliinermut tulluartuupput
Air Greenland illersornissaqarfiup suliassanik, sakkutooqarnermut tunnganngitsunik, inuiaqatigiinnulli tunngassuteqartunik suliarinnikkumalluni neqerooruteqarpoq.
Jacob Nitter Sørensen: - Air Greenlandip Dash8 atorlugu illersornissamut suliassat nakkutilliinermi Kalaallit Nunaanni iluaqutaasinnaavoq.
Assiliisoq: Emil Nørgaard Stach
- timmisartuutivut Dash8-t allanngortissinnaavagut, taamaaliornikkut sinerissami nakkutilliinermi suliassat naammassisinnaassallutigit, Air Greenlandimi pisortaq Jacob Nitter Sørensen akivoq, aperineqarami, Air Greenland suliassanik naammassinnissinnaaneq tungavigalugu illersornissaqarfimmut qanoq neqerooruteqarsinnaanersoq, Issittumi piginnaasanik annertusaanermi suliassanut tunngatillugu, tassanilu aningaasaliissutigineqartut 1,5 milliardit koruuniupput.
Islandimi, Sverigemi Canadamilu timmisartut Dash8-it sinerissami nakkutilliinermi atorneqartarput. Misilittakkallu takutippaat timmisartoq suliassamut tulluartuusoq.
Illersornissaqarfiup timmisartuutaa Challenger, ullumikkut ilaatigut sinerissamut nakkutilliinermi atorneqartoq, pisoqalisimanini pissutigalugu naleqqukkunnaariartulersimavoq, taamaakkaluartorli aamma sumiiffinni allani pisariaqartinneqarluni.
- Uagut piareersimavugut piffissami sivisuumi imaluunniit ataavartumik timmisartuutitsinnik, timmisartortartui teknikeriilu ilanngullugit neqeroorutigisinnaallugit. Timmisartut atortuisalu allanngortititilaarnerisigut atortulersuutinillu pisariaqartunik ikkussuisoqarneratigut timmisartortartullu suliassamut pikkorissarnerisigut suliassaq naammassisinnaassagatsigu.
Illersornissaqarfimmik oqaloqatiginninneq ingerlanneqarpoq
Matumani pineqartoq Air Greenlandip illersornissaqarfimmut ukiut ingerlanerini siunnersuutigisarsimavaa, maannalu siunnersuut taanna pillugu Air Greenland illersornissaqarfillu oqaloqatigiilersimapput. Neqeroorut taanna maanna Kangerlussuarmi isumannaallisaanermut ataatsimeersuarnermi ulluni makkunani ingerlanneqartumi qaqeqqinneqarpoq, tassani dronit satellitsillu atorlugit nakkutilliineq sammineqarluni.
- Tassunga tunngatillugu timmisartuutivut suluusallit, sineriammi silaannarmi appasinnerusumi nakkutilliissutigineqarsinnaanerat periarfissaavoq, pisortaq oqarpoq.
- Dash8 suliassani taamaattuni piukkunnarluartuuvoq. Timmisartuutitta taakku Dash8-it ilaasa tankii annertusaaviginikuuagut, taamaalillutik ungasinnerusumut timmisinnaalernikuupput. Tamatuma saniatigut nunatsinni mittarfiit amerlasuut atorlugit orsussamik pissarsisinnaavugut. Taamaalilluta nakkutilliinermi pitsaasumik suliaqarsinnaavugut, taanna erseqqissaavoq.
Annaassiniarnernut SAR-rinut aamma ilaasinnaavoq
Jacob Nitter isumaqarpoq, tamanna iluatsissinnaassappat Kalaallit Nunaanni isumannaallisaanermut iluaqutaasinnaasoq. Tamannami ilutigalugu sakkutuunut suliassat taamaattut sakkutooqarnermut attuumassuteqanngitsunit suliarineqarsinnaammat oqartoqarsinnaavoq sakkussakillisaanerussasoq.
- Sakkutuujunngitsut timmisartui atorlugit sineriammi nakkutilliineq, Kalaallit Nunaata killeqarfiinik alapernaarsuisitsinikkut qulakkeerinnittoqarsinnaavoq, sinerissamilu alapernaarsuinerup saniatigut umiarsuarnik timmisartunillu allanik kiisalu aalisarnermik nakkutilliineq ingerlanneqarsinnaalluarput, taanna oqarpoq.
Tamanna pissappat timmisartut illersornissamut qullersaqarfimmit, suliassamik imissuteqartuusumit, oqqiutigineqassaaq timmisartup atortui atortulersuutaalu suussanersut, soorlu assersuutigalugu umiarsuit attaveqaatiminnik qaminngatitsisut alapernaarsorneqarsinnaassallutik.
Timmisartut taakku isorartuumi nakkutilliinerup saniatigut SAR-mik suliassanik illersornissamut qullersaqarfimmut ikiuutaasinnaassapput, taamaalillutik qulimiguullit annaassiniarnernik SAR-inik ikiorsinnaassallugit..
Jacob Nitter isumaqarpoq tamanna tamanut iluaqutaassasoq, Kalaallit Nunaata Danmarkillu naalakkersuisuinut, taakkumi anguniagaqarmata Atlantikup Avannaani sakkutooqarnikkut annertusaasoqassanngitsoq, aammalu Illersornissaqarfimmut, suliassaminik naammassinnissinnaassutsimigut annertusaassammat timmisartut sakkutooqarnermut attuumanngitsut atorneqalernerisigut, aammalu Air Greenlandimut Dash8 timmisartuutaanut suliassaqarnerulernissamik kinguneqassalluni.
- Tamatuma saniatigut Air Greenland neqerooruteqarpoq Illersornissaqarfimmut timmisartuussisarnermik sullissisuuujumalluni. Tamanna pisinnaavoq sulisunik, atortunik imaluunniit taartissamaatinik assartuussinermik isumaqatigiissuteqarnikkut, Jacob Nitter Sørensen oqarpoq.
