Kaammattuut: Pituffik Space Basemi pissutsit ernumanartut

Illersornissamut ministeri Troels Lund Poulsen, Amerikamiut Københavnimi aallartitaqarfiat kiisalu Folketingimi Kalaallit Nunaat pillugu ataatsimiititaliaq BAT-Kartellet-imiit, sakkutooqarfimmi sulisunut sakkutuujunngitsunut atugassarititaasut akuersaarneqarsinnaannginnerinik isumaqartunit, aarlerissutit pillugit allakkiamik tigusaqarput.

BAT-imi siulersuisut basemi takuniaatillutik sulisunut atugassarititaasut unammillernartut paasivaat.

Arlallit pakatsisut

- Suleqatigiit ilungersorlutik tunniusimallutillu ikioqatigiillutik sulisut naapippagut. Amerlanerpaat sakkutooqarfimmi inooriaaseq illorisimaarnaralugulu suliatik tulluusimaarutigaat. Aammattaarli qaammatini makkunani sakkutooqarfimmi sipaarniarneq pillugu pakatsisorpaaluit naapippagut, allakkiami allasismavoq.

- Aqutsisunik uparuaaneq soraarsitaanermik kinguneqalertorsinnaasoq arlalinnit oqaatigineqarpoq, suliffigisarlu angerlarsimaffigigaanni tamanna annertuumik kingunerlussinnaavoq.

- Oqaloqateqarnerni aqutsisut nuimanngitsut aningaasaqarnerlu ilungersunartorsiorfiusoq qanoq sullivimmi avatangiisinut tarnimut tunngasunut aarlerinartiginersoq erserpoq, kingoraartissanillu amigaateqangaatsiarneq naammaginanngitsumillu aserfallatsaaliineq pissutigalugit sakkutooqarfiup ingerlannissaa sulisunillu isumannaallisaaneq aarlerinartorsiortoq sulisut oqaatigaat, BAT-Kartelletimi siulittaasoq Claus von Elling pisortarlu Søren Sand Kirk allapput.

Ajornartorsiutit assigiinngiiaartut

Ajornartorsiutit assigiinngiiaartut oqaatigineqarpoq. Matup tigummiviata barakkerisamiluunniit uffarfiup kuutsitsiviata taarserneqarsinnaannginneraniit nammineq angallataatit assakaasullit benzinamik orsersinnaannginnerinut.

- Aarlerinarnerusuni sulisut kamippannik illersuutilinnik, sullisinik issittumi atorneqarsinnaasunik sakkutooqarfiullu biiliisa igalaavinut masarlerutinik pissarsisinnaanngillat. Stumpit kingoraartissallu pingaarutillit timmisartuussinernik unitsitsinermik kinguneqarsinnaasut amigaataasut aamma nalunaarutigineqarpoq, siulersuisuni siulittaasoq pisortarlu oqarput, taakkulu sulisut ataasiakkaat eqqarsaatigalugit atugassarititaasut ilungersunartut pillugit itinerusumik nassuiaasinnaanngillat.

Sakkutooqarfimmi pissutsit soor ajorseriarsimanersut qulakkeerneqarsinnaanngitsoq BAT-Kartellet ilisimatitsivoq.

Aningaasaqarneq ilungersunartoq

- Vectrusip aningaasaqarniarnerup aqunnissaa ilungersunartingaatsiaraa, suleqatigiillunilu (Inussuk) Permagreen Vectrusilu suleqatigalugit aaqqissuussineq unamillernartoqarnermut ilapittuutaasoq, ersarilluinnarpoq, BAT-Kartellet oqarpoq.

Aarlerissutit pillugit allakkiornermi “sakkutooqarfimmi soqutigisaqartut pissutsinik sukumiinerusumik misissuinissamik aallartitsiumassasoq suliniutinillu sakkutooqarfimmik sulisuinillu tapersiinissamut pisariaqartut aallartinneqassasut” kartellimiit neriuutigineqarpoq.

Aalerissutit pillugit allakkiap imarisai pillugit Inussuk Sermitsiap apeqquteqarfigaa.  Suliap suussusaa pissutigalugu ingerlatseqatigiiffik Dansk Arbejdsgiverforeningimut (Danmarkimi sulisitsisut peqatigiiffiannut, aaqq.) innersuussivoq, Dansk Arbejdsgiverforeningimilu pisortap tullia, Steen Müntzberg, allakkatigut ima oqaaseqaateqarpoq:

- Tigusisut allat peqatigalugit saaffiginnissut tiguarput. Akornatsinni isumaqatigiissutit malillugit saaffiginnissut isumagineqassaaq, pisortap tullia oqarpoq.