Kajumissaarut: Ikiorsiissutissat pillugit isumaqatigiinniarnerit aallarteqqinneqarlik
Inuussutissarsiornermik tapersersuisartup Innovation South Greenlandip politikkerit kajumissaarpai Kujataani takornariartitsisartut ikiorserneqarnissaannut iliuuseqaqqullugit.
Miki Jensen Innovation South Greenlandimi pisortaasoq Kujataani takornariartitsisartut ikiorserneqarnissaat pillugu politikkerit isumaqatigiinngissutaannut aaqqiissutissamik nassaartoqarnissaanik kaammattuilluni oqarpoq.
Assiliisoq: Lars Kleemann Andersen
- Suliffinnik ikinnerpaanik annaasaqarnissaq anguniarlugu ikiorsiinissap piviusorsiortumik ataatsimoorullugu qinikkanit suleqatigiissutigeqqullugu kajumissaarivugut.
Miki Jensen, Innovation South Greenlandimi, Kommune Kujalliup inuussutissarsiornermik ineriartortitsinermut ingerlatseqatigiiffiani, pisortaasoq, tusagassiuutinut nalunaarummi taama oqarpoq.
Ikiorsiissutit pillugit politikkikkut isumaqatigiinniarnerit unittoornerisa kingorna taama nalunaaruteqarpoq, aamma Aningaasaqarnermut Akileraartarnermullu Ataatsimiititaliami amerlanerussuteqartut ikiorsiissutinik akuersissuteqarnissartik itigartitsissutigimmassuk, niuernermut naalakkersuisup Naaja H. Nathanielsenip (IA) aamma Inatsisartut Aningaasaqarnermut Akileraartarnermullu Ataatsimiititaliaata akornanni isumaqatigiinngittoqarpoq.
Covid 19-neqarnerata nalaani ajornartorsiutaasimasunut ajornartorsiuteqalerneq assersuunneqarsinnaasoq Miki Jensen oqarpoq, tassami maannakkut inuit pilersitarinngisaannik ajornartorsiut pilersimammat, siunissarlu ungasinneq eqqarsaatigalugu ikiorsiisariaqalerneq tapersersussallugu Innovation South Greenland piareersimavoq:
- Ikiorserneqaqqulluni qinnuteqaatit sussaaqartunit tamanit suliarineqarlutillu nalilersuiffigineqartariaqarput. Qinikkat qanoq aalajangiisoqarnissaa ukkattariaqarpaat, allaffisornerullu ikiorsiinissamut akornutaannginnissaa qulakkeertariaqarlugu, Miki Jensen oqarpoq.
Tukattutut allaffissornikkullu pisariusutut isornartorsiorneqartoq
Aasaanerani takornarialerisut sikorsuarnit eqqugaasut, umiarsuarnik takornariartaatinik tikisitsisarnernik arlalinnik taamaatitsinernik malitseqartitsisut, aningaasatigut ikiorserneqarnissaat naalakkersuisup siunnersuutigaa.
Kisianni Aningaasaqarnermut Akileraartarnermullu Ataatsimiititaliami amerlanerussuteqartut naalakkersuisup ikiorsiissutinik qinnuteqaataa itigartitsissutigaat.
Aningaasaqarnermut Akileraartarnermullu Ataatsimiititaliami siulittaasup tullia Pele Broberg ilaatigut Sermitsiamut oqarpoq, naalakkersuisoq ikiorsiissutit pillugit tukattumik saqqummiussisimasoq, ‘pisariaqartitsisunut ikiorsiissutinik qulakkeerinninngitsumik, allaffissornermilli pisariaqanngitsumik annertusiartortitsisoq’.
