- Suliaq
ataatsimut isigalugu ilungersunarpoq. Norgemi suleqatitsinnut Bengt Are
Korneliussenimut Royal Greenlandimullu. Suliaq ilungersunartoq
kissaatiginngilluinnarsimagaluarpara.
Preben Sunke, Royal Greenlandimi pisortaaneq,
Norgep avannaani Tromsømi Hålogalandip eqqartuussiviani qanittukkut
aalajangiisoqarnera pillugu Sermitsiamut oqaaseqaammini taama oqarpoq.
Aalajangerneq tamanna Royal Greenlandip
suleqataanut, umiarsuaatileqatigiiffimmik Tromsømeersumik piginnittumut Bent
Are Korneliussenimut, inuussutissarsiutigalugu saattuarniarnermut
akuersissutaarunnermik kinguneqarpoq. Aamma pisassinneqarsinnaajunnaarpoq.
Taamaalilluni taassuma Royal Greenlandillu
akornanni niuernikkut suleqatigiinneq tunngavissaqarunnaartoq, Kalaallit
Nunaanni aalisakkerinermik suliffeqarfissuaq inerniliivoq. Saattuarniarnermik
suliniut suleqatigiinnerlu tassa iluatsinngitsoorput.
Sermitsiap paasissutissaatai naapertorlugit
Royal Greenland Kalaallit Nunaata Norgellu suleqatigiinnerannut
maluginiarnartumut millioninik marlunnik, immaqa pingasunik kisitsisitalinnik
annaasaqarsimavoq.
- Aalisarnerup
aallarteqqinnissaanut aaqqiissutissanik takorluuisinnaannginnatta maanna Bengt
Are Korneliussen umiarsuaatileqatigiiffialu Maniitsoq suleqatigiunnaarpagut,
Preben Sunke aviisimut oqarpoq.
Royal Greenland ingerlatsineq
aningaasalersoraa
Norgemi aalisarnermut oqartussat
naapertorlugit Royal Greenland umiarsuaatileqatigiiffiup mikisup
Korneliussenimit tamakkiisumik pigineqartup Maniitsoq AS-ip
ingerlanneqarneranut 2017-imiilli aningaasaliisuuvoq.
Taanna Norgep avannaani Barentip imartaani
umiarsuarmut Arctic Opiliomut saattuanik 2024-p tungaanut pisassinneqarsimavoq.
Royal Greenland suleqatigiinnermi pineqartumi
ukiuni arlalinni aningaasanik annaasaqarsimavoq. Ingerlatseqatigiiffiup ukioq
manna siusinnerusukkut 2024-mut naatsorsuutimini Maniitsumik suleqateqarneq 60
million koruuningajannik nalikillivaa.
Umiarsuaatileqatigiiffik Royal Greenlandimut
200 million koruuningajannik imaluunniit 130 million koruuningajannik
akiitsoqarfiusoq Maniitsup 2024-mut naatsorsuutaani takuneqarsinnaavoq.
Preben Sunke Maniitsoq qanoq
akiitsoqartiginersoq aperineqarami oqaatigiumanngilaa.
Saattuarniarluni umiarsuaatilik Tromsømeersoq
Norgep naalagaaffiani eqqartuussivimmi Nord-Tromsimut Senja Tingrettimut ukioq
manna marsimi ajorsarpoq.
Umiarsuaatillit suliaq
eqqartuussisuuneqarfimmut suliassanngorteqqikkaa
Korneliussenip inuussutissalerinermut
aalisarnermullu naalakkersuisoqarfiup inuussutissarsiornissamut akuersissutaata
atorunnaarsinneqarsimaneranik saattuarniarsinnaaneranillu akuersissutaata
attutinnginnerani oqaaseqaatai
eqqartuussiviup akuerinngilai.
Umiarsuaataatillip eqqartuussiviup
aalajangiinera Tromsømi eqqartuussivimmut suliassanngortippaa,
suliassanngortitsineralu eqqartuussivimmit aggustimi itigartinneqarpoq.
Taamaalilluni eqqartuussivinni marlunni
suliakkiissutiminut ajorsarpoq. Paasissutissat kingulliit naapertorlugit Bengt
Are Korneliussenip suliaq sapaatip-akunnerani kingullermi eqqartuussivimmut
qullersamut suliassanngortippaa.
Maniitsoq A/S 2015-imi pilersinneqarsimasoq
umiarsuaatilimmit Bengt Are Korneliussenimit tamakkiisumik pigineqarpoq.
Ingerlatseqatigiiffiup umiarsuaq ”Arctic Opilio” 2017-imi pisiaraa, tamatumalu
kingorna umiarsuaq saattuarniarnermut atorsimavaa. Royal Greenlandimik
suleqateqarnermi ilaatigut Royal Greenland Maniitsumut, pisaminik tamanik Royal
Greenlandimut tunisisartumut, taarsigassarsiisimavoq, Hålogalandip
eqqartuussiviani aggustip 21-anni aalajangiinermi tamanna atuarneqarsinnaavoq.
Oqartussat: Umiarsuaatilik
oqartussaassuseqarani piginnittutut nalunaarsorsimavoq
Korneliussen umiarsuaatileqatigiiffimmik
kisimiilluni piginnittutut amerlanerussuteqartutut isigineqarsinnaanngitsoq
taamaalillunilu suliffeqarfimmik aqutsisinnaanngitsoq Norgemi aalisarnermut
oqartussaasut, Fiskeridirektoratet, 2022-mi nalunaarusiaminni allapput.
Aalisarnermut oqartussaasut naapertorlugit Royal Greenland
aqutsisinnaatitaavoq.
Bengt Are Korneliussenip
umiarsuaatileqatigimmi piginnittuunermini oqartussaassuseqanngitsoq Royal
Greenlandillu Danmarkimi immikkoortortaqarfia suliffeqarfimmut
oqartussaanerpaasoq pisortaqarfik inerniliivoq.
Taamaammat aalisarnermut oqartussat,
pisortaqarfik naalakkersuisoqarfillu naapertorlugit umiarsuaatileqatigiiffik
Royal Greenlandip akiligaanik ingerlanneqarpoq. Taamatut piginnittuuneq Norgemi
inatsisit malillugit unioqqutitsineruvoq.
Royal Greenlandip Bengt Are Korneliussenimik
suleqateqarnermi annaasaqarnissaq pinngitsoortinniarlugu umiatsiaq qanoq
akisutigisumik tuniniarneqassanersoq Sermitsiap suliffeqarfissuup pisortaa
Preben Sunke aperaa.
- Pissarsiassatut
sinneruttut naatsorsuutitsinniittut saqqummiussinnaanngilakka. Maniitsumit
pissarsiassatta tamakkiisut pissarsiarinissaat attapparput, taanna oqarpoq.
Norgemiut umiarsuaatileqatigiiffiata
umiarsuup niuerfinni akianit appasinnerusumik tuninissaa Royal Greenlandip
soqutigisarinngikkaa Preben Sunke nangilluni nassuiaavoq.
- Maniitsukkormiut uagullu umiarsuaq pillugu
akimik naammaginartumik isumaqatigiissuteqarsinnaanngikkutta suliffeqarfissuup
sinnerani aalisarnermut, assersuutigalugu saattuarniarnermut, atorsinnaanerlugu
eqqarsaatigissavara, pisortaneq oqarpoq.
Norgemi aalisarnermut oqartussat
naapertorlugit Royal Greenlandip Arctic Opiliop pisiarinissaa, angallatip
nutarterneqarnera aamma Maniitsup ingerlanneqarnera akilersimavai. Tamakku
Maniitsup saattuarniarnissamut inuussutissarsiornissamulluunniit akuerisaannginneranut
pissutaapput.
Sunke: - Annaasat oqaatigineq ajorpagut
Tamanna pillugu illit qanoq oqaasissaqarpit?
- Bengt Are ingerlatseqatigiiffimmi
Maniitsumi 100 procentimik piginnittuuvoq. Royal Greenland
ingerlatseqatigiiffimmi piginneqataassutit 40 procentii pisiarissallugit periarfissaqarnikuuvoq.
Royal Greenlandip Maniitsumi niuernikkut soqutigisai Norgemi oqartussaasut
„Maniitsumi aalajangiisuusutut“ isigaat.
- Tamanna Bengt Arep
eqqartuussissuserisuminik siunnersorneqarluni pilersitaraa, tamannalu
pissutigalugu aalajangiineq eqqartuussivimmut suliassanngorteqqippaa.
Eqqartuussiviup oqartussaasut aalajangernerat aalajangiusimavaa.
Aalajangernerlu taanna tunngavigalugu Royal Greenlandimi soqutigisagut
illersortariaqarpagut.
Maniitsup suleqatiginerani 2024-mi
nalikilliineq sioqqullugu qanoq annaasaqartigisimavisi?
Niuernermi ataqatigiinnerni annerusuni
iluanaarutigineqartartut annaaneqartulluunniit nalunaarutigineq ajorpagut.
Maniitsoq Royal Greenlandimit kukkusumik
aningaasaliinerua?
- Aningaasaliinikkut soqutiginartumik
periarfissaqalerpugut. Periuseq Norgemi oqartussanit
apeqquserneqarsimanngitsuuguni pitsaasuusimassagaluarpoq. Pisut
eqqarsaatigalugit ilimaginngisamik pisoqarpoq.
Sooq ajutoorsimasoraajuk?
- Ingerlatseqatigiiffiup aaqqissuussaanera
Norgemi oqartussanut tunngatillugu naapertuungitsoq maanna paasisimalerparput.
- Aallaqqaataaniilli 40 procentimik
pisinneqataanikkut allaanerusumillu ingerlatseriaaseqarnikkut oqartussat
piumasaqaataat eqquutsissinnaasimagunaraluarpagut. Kingumulli qiviaraanni
iluatsinngitsut ilaannikkut paasiuminarnerulertarput.
Royal Greenland Bengt Are Korneliussenimik
suleqateqarnermini Norgemi annertuumik annaasaqarsimavoq. Kalaallit Nunaanni
aningaasaliinerit pingaarnerutissagisi, nunanut allanut aningaasaliinerit
tamaasa unitsissagisi imaluunniit Kalaallit Nunaata avataani aningaasaliinerit
mianersuutigisariaqarisi suliaq una takussutissaava?
- Naamik,
suliffeqarfissuarmi nunani tamalaani soqutigisaqartumi siunissami nunani allani
aningaasaliisarnissarput pisariaqartipparput.
- Nunatsinni
tunisassiorfitta Royal Greenlandip siunissami suliffeqarfittut
unammillersinnaassuseqarnissaanut pitsaanerpaamik inissisimalernissaat
siunertaralugu Kalaallit Nunaanni aningaasaliinigut ukiuni tulliuttuni
pingaarnerutissavagut, Preben Sunke naqissusiivoq.
