Kalaallit Nunaanni isertortumik paasiniaasartunik atuisinnaaneq amerlanerussuteqartut taperseraat
Politiit misissuisarnerat pitsaanerulersinniarlugu Inatsisartut Inatsisinut Ataatsimiititaliaani amerlanerussuteqartut politiit isertortumik paasiniaasartunik atuisinnaanerat taperserpaat.
Kalaallit Nunaanni Politiit isertortumik paasiniaasartut atorsinnaalissagaat politikkikkut amerlanerussuteqartut taperserpaat.
Leiff Josefsen
Kalaallit Nunaanni eqqartuussisarnermik inatsit nalimmassarneqassaaq, taamaalilluni danskit inatsisaat assigalugu, isertortumik paasiniaasartut pinerlunnermi qulaajaasinnaasut ilaatigut atorneqarsinnaalissallutik.
Tamanna Inatsisinut Ataatsimiititaliap nalunaarusiaani atuarneqarsinnaavoq, tassanilu Naalakkersuisut aalajangiiffigisassatut siunnersuutaat IA-mit Siumumillu amerlanerussuteqartunit taperserneqarpoq.
Inatsimmi tunngavigineqartut arlallit allanngortinneqassasut
Danmarkimi isertortumik paasiniaasartut pillugit inatsit 1986-imi atuutilersinneqartoq tunngavigineqarpoq, taannalu kingorna arlaleriarluni allanngortinneqarsimavoq.
Inatsisini unioqqutitsinerni ukiuni arfinilinni amerlanerusuniluunniit parnaarussaanermik kinguneqarsinnaasuni isertortumik paasiniaasartut inatsisinik unioqqutitsisoqarsimatillugu misissuinermi atorneqarsinnaanerat aallaqqaammut siunertarineqarpoq. Isertortumik paasiniaasartut eqqartuussivimmit akuersissummik peqqaarsimanissaat piumasaqaataasimavoq.
2003-mi piumasaqaatit arlallit qasukkarneqarput, taamaalilluni politiit aamma tillinniarnernik ingasattumik paasiniaanermi atorneqarsinnaalerput, politiillu aamma inunnik politiiunngitsunik atuisinnaalerput.
2020-mi inatsit annertusineqarpoq, tassani politiit ikiaroornartunik, sakkunik qaartartunik taavalu meeqqanik atoqateqartunik immiussanik peqarnermi, tillitanik pisinermik, peqquserlunnermik, qarasaasiatigut peqquserlunnermik, aningaasanik peqquserluutinik aningaasanillu peqquserluutinik ajunngitsutut isikkoqartitsiniaanermi internet atorlugu pinerluttuliornerit pillugit misissuinermi aamma atorneqarsinnaalerput.
Inatsisinut ataatsimiititaliaq marsimi Inatsisinik atortitsinermut ministereqarfimmut tikeraarpoq, tassanilu kilitsissianik atuisarnermi sinaakkutit pillugit paasitinneqarput.
Inatsisit ataatsimiititaliaat: Pingaarutillit
- Najugaqarfiit amerlanersaasa mikisunnguunerat pinerluuteqartartullu avatangiisaasa matoqqasuunerat pissutigalugit isertortumik paasiniaasartut kinaassusiisa isertuunneqarniarnissaat Kalaallit Nunaanni ajornakusoorsinnaassasoq ataatsimiititaliap oqaatigerusuppaa. Politiilli pinerluttoqarsimaneranik paasiniaanerup ilaatut isertortumik paasiniaasartumik atuinissamut periarfissinneqarnissaat pingaaruteqartoq ataatsimiititaliaq isumaqarpoq, pinerluuteqartarnerit akiorniarneranni tunngavissatut iluaqutaasinnaanera pissutigalugu.
Naalakkersuisut akissuteqaamminni ima allapput:
- Inatsisartut aalajangernerat piaartumik Inatsiseqarnermut ministereqarfimmut nalunaarutigineqassaaq, taamaalilluni siunnersuut Folketingimi suliarineqarsinnaaniassammat.
