Kalaallit Nunaanni qaffasinnerpaamik atorfilik nunarsuarmi akissarsiaqqortunerpaat ilagaat

Ukioq 2023 nunarsuarmi aalisakkanik tunisassiornikkut ilungersunarsimavoq. Suliffissuaqarfik tunisassiornermi aningaasartuutinit qaffakkiartortunit tatineqarpoq saniatigut pisisartut aningaasat naleerukkiartornerannit inuuniarnermilu aningaasartuutit qaffakkiartornerannit ilungersuatinneqarlutik.

Naak aalisakkanik tunisassiornerup iluani ilungersunartoqaraluartoq atorfikkaat akissarsiarissaaqisut, IntraFish.com-imit maannakkut naatsorsukkat takutippaat.

IntraFish imaaniit inuussutissaqarnerup, aalisarnerup aalisakkanillu tukersitsinerup iluani nunarsuarmi nutaarsiassaqartitsisut siuttut ilagisaat 2023-mi aalisakkanik tunisassiornerup iluani atorfikkaat akissarsiaqqortunerpaat 27 pillugit naatsorsuusiorsimapput.

Royal Greenlandimi pisortaaneq Susanne Arfelt Rajamand naatsorsukkani qaffasinnerpaap tulleraa taamaalilluni akissarsiaqqortunerpaat ilaanniilluni IntraFiship naatsorsugaasa takutippaat.

Assersuunneqarsinnaanngitsut

Royal Greenlandimi siulittaasoq Maliina Abelsen Sermitsiami allaaserisamut oqaaseqaatimini oqarpoq, ingerlatseqatigiiffissuaq tassaasoq nunarsuarmi aalisakkanik ingerlatseqatigiiffiit annerpaat 20 akornaniittoq ukiumut 5 milliardit koruunit sinnerlugit kaaviiaartitsisartoq.

Taamaattumik Kalaallit Nunaanni suliffeqarfiit annersaattut aalisarnerullu iluani nunarsuarmi suliassaqartut annersat ilaattut Royal Greenland Kalaallit Nunaanni suliffeqarfinnut allanut imaaliallaannaq assersuunneqarsinnaanngilaq, Maliina Abelsen Sermitsiamut oqarpoq.

Allattukkani normu 2

Aalisakkanik tunisassiornerup iluani pisortaanernik akissarsiaqqortunerpaanik allattukkat 27 akornanni normu 1-usoq tassaavoq Tuluit Nunaanni qerisunik tunisassiorfissuarmit Nomad Foodsimit Stefan Desheemaeker, IntraFish allappoq.

Ingerlatseqatigiiffiup ilisimaneqaatigaa tunisassiat akimasuut Birds Eye, Findus aamma Iglo. Pisortaat tunngaviusumik akissarsiaqarpoq 1 million dollars sinnilaarlugit imaluunniit 7 million koruunit sinnilaarlugit. 

Soorlu Sermitsiami siusinnerusukkut allaaserineqartutut Susanne Arfelt Rajamand siorna tunngaviusumik 5,1 million koruuninik akissarsiaqarpoq. Tamatuma saniatigut 3 million koruunit ajunngitsorsiassarai atorfininnerminut 2 million koruuninik 2023-milu ajunngitsorsiassatut aalajangersakkatut 1 million koruunit, atorfininnermini isumaqatigiissutip ilaattut. Taamaalillutik akissarsiat katillutik 8,1 million koruuniupput. Maluginiarneqassaaq ajunngitsorsiassat IntraFiship naatsorsugaanut ilaatinneqanngimmata.

Mowi kapisilik

Susanne Arfelt Rajamandip tulleraa nunarsuarmi kapisilinnnik tunisassiorfiit annersaasa ilaannit Norgemit Mowimit Ivan Vindheim normu 3-uvoq.

Tunngaviusumik akissarsiarai 685.000 dollarsit, tassalu 4,7 million koruunit.

Akissarsiat tupinnaannartut

Maluginiarneqassaarli aalisakkanik tunisassiornermi pisortaanernut akissarsiat nunarsuarmi suliffeqarferujussuit annersaasa ilaanni pisortaanernut akissarsiarititaasunit appasinnerungaarmata. 

Novo Nordiskemi pisortaaneq Lars Fruergaard Jørgensen 2023-mi 68 millionit koruuninik akissarsitinneqarpoq, Novo unammillertaani pisortaaneersoq Eli Lilly 182 millionit koruuninik akissarsiaqarluni. Ukioq manna marsimi Medwatch taama allappoq.

Kukkukuuaqqanik tunisassiorfimmi Tyson Foodsimi pisortaaneq IntraFish naapertorlugu 114 millionit koruuninik akissarsivoq.

Nomad Foodsimit Stefan Desheemaeker Royal Greenalndimiillu Susanne Arfelt Rajamand taaneqareersutut tunngaviusumik 7 aamma 5 millioninik akissarsipput.

Allaaserisami IntraFiship maluginiaqquaa aalisakkanik tunisassiornerup iluani pisortaanerit akissarsiaqarnerpaat 27 pillugit allattukkat tassaanngimmata ilisimasat eqqoqqissaartut. Ajunngitsorsiassat, piginneqatigiissutinik pissarsiassat allatigullu ajunngitsorsiassat pisortaanerpassuit pissusissamisoortutut pissarsiarisartagaat naatsorsuutini ilaanngillat.

Pisortaanerit sunniisinnaassuseqartut 

IntraFiship aamma 2023-imi nunarsuarmi aalisakkanik tunisassiornermi pisortaanerit sunniuteqarsinnaanerpaat 100 sinneqartut takussutissiarisimavai tassalu The Seafood Power 100.

Siullerpaavoq Mowimit Ivan Vindheim. Bornholmimit Espersenimit Europami McDonaldimut aalisakkanik pingaarnertut pilersuisuusoq Klaus Nielsen, allattukkani normi 9-uvoq, Islandimi Samherjimit Thorsteinn Mar Baldvinsson normu 20-iulluni.

Savalimmiuni kapisilimmik tunisassiorfissuarmi pisortaaneq Regin Jacobsen normu 40-voq, Royal Greenlandimit Susanne Arfelt Rajamand normu 41-lluni.

IntraFish Norgemi DN Media Groupimeersoq aalisakkanik tunisassiorneq, aalisarneq aalisakkanillu tukertitsilluni suliffissuaqarneq pillugit ukiuni 25-ni nutaarsiassiisarlunilu misissuisitsisarpoq.