Sassuma Arnaa serlersaarfigineqartoq - politiilli suliami ingerlariaqqinneq ajulerput
Nuup Saavani ujarak Sassuma Arnaatut isikkulerlugu qiperugaq serlersaarfigineqarsimasoq pillugu politiit maajip 15-iani nalunaarfigineqarput. Ilisimannittunilli takunnissimasunillu amigaateqaramik ingerlariaqqinneq ajulerput. Serlersaarisoqarsimanera kommunip aamma arajutsisimavaa.
Sassuma Arnaata nujaasa nalaatigut qalipaammik tunguusamik kuineqarsimavoq.
Assi: Oscar Scott Carl
Eqqumiitsuliortup Christian Rosingip ujaqqamik qiperugaa 2007-imi uleerneqarmat persuarsiutaaqaaq. Ukiulli 19-inngulersullu tassaneereerluni serlersaarfigineqarsimavoq, tunguusamimmi qalipaammik kuineqarsimagami.
Politiit serlersaarisimaneq pillugu nalunaarfigineqarsimallutik uppernarsarpaat.
- Nalunaarummik politiinut anngussisoqarnikuuvoq tallimanngornermi maajip 15-iani ualikkut nalunaaqutaq 16.55, politiit pigaartuisa pisortaat Malik Olesen Sermitsiamut oqarpoq.
Nalunaaruteqartoqarneraniit sapaatip-akunneri marluk qaangiukkaluartut suliami ingerlariaqqinnaveerput.
- Suliassaq ajoraluartumik annertunerusumik ingerlateqqissinnaanngilarput uppernarsaatinik ilisimannittunillu amigaateqaratta, Malik Olesen oqarpoq.
Taamaammat ilisimannittoqarpat takunnittoqarsimappalluunniit politiit saaffigineqarnissartik neriuutigaat. Politiit 70 14 48-imut sianernikkut saaffigineqarsinnaapput.
Tallimanngornermi salinneqassaaq
Sassuma Arnaa kommunalbestyrelsemi ilaasortaarsimasup Vittus Holmip isumassarsiaraa. Ujaqqamik qiperukkap serlersaarfigineqarneraniit sivikinnerpaamik sapaatip-akunneri marluk qaangiussimalerput.
Eqqaassutissat allallu qiperukkat illoqarfimmiittut kommunip akisussaaffigai. Sassumalli Arnaata serlersaarfigineqarsimanera arajutsineqarsimammat Sermitsiamit kommunimut sisamanngornermi saaffiginnikkatta aatsaat ilisimaneqalerpoq.
Taassuma kingorna kommunip sanarfinermut avatangiisinullu immikkoortortaqarfiata qalipaat Sassuma Arnaanut kuineqarsimasoq peerniarlugu tallimanngornermi suliarissagaa kommunimit ilisimatitsipput.
