Frederik Elsnerip Kalaallit Nunaat nipilersugassiami nutaami ataatsimoortippaa

Nuummi sila anorlerluni siallerpoq, Altantic Musicilli pisiniarfiata ataani silarlunnera malugineqarsinnaanngilaq.

Naqqup iluani inimi nipinut pitaallisakkami eqqissisimanartumi, nipit nammineq pinngorartitat taamaallaat tusaaneqarsinnaapput.

Frederik Elsner naqqup iluani init akulloqquallugit CD-nik pequusivik sanioqquppaa; itsarnisanngulersunik toqqorsivik, nipilersuutaarniarfiup ataani suli ulloq manna tikillugu, piusoq.

Tamassuma tikka paatsuugassaanngilaq. Polycarbonati,  plasikki CD-it sananeqaataat naamaneqarsinnaavoq. Panerluni "manngialuttumik", biilit nutaat tipaannut assersuunneqarsinnaasoq.

Elsner inimi mikisumi issiavimmi qilaap qulliata ataani issiavoq. Qarasaasiaq nakkuppaa, tassanilu programmi Logic nipit maligaasatut isikkoqartut sarsuaneranni qinngorneqarput. Appittaat ´afspil´ toorpaa, tassanngaanniillu nipit immiussat suliarineqanngitsut inip iluani tusarsaalerput. Nipigissarneqanngitsut, suliareqqitaanngitsut, nipit immiunneqarnermisut tusaaneqarsinnaasut.

Elsnerip erinitsalluni erinarsortartoq Nivi Pedersen sianerfigissallugu oqarasuaatini tiguaa. Inneruulat erinarsuutaannut nuannarineqarluartumut Aasarissumi qulequtalimmut naatsumik taanna erinarsussaaq. Immiussinerinnaanngilaq; Frederik Elsnerip erinarsuut ataaseq atorlugu Kalaallit Nunaat ataatsimoortinniarpaa.

- Nipilersortartut suleqatigiinnerunissaat, ataatsimuussuseq, isumassarsiorfigineqarsinnaanerilu suliniummi matumani siunertaavoq. Nipilersortartut suliami nuannarineqaqisumi suleqatigiissinnaanerat nunami maani inuusuttunut takutissinnaasariaqarparput, malitsigisaanillu suliaq upperigaanni angusaqartoqarsinnaasoq aamma ersersillugu, Frederik Elsner itisiliivoq.

Ataataq nipilersuusiortartoq

Matu ammarpallappoq, Frederik Elsnerillu ernera iserpoq. Utaqqikatappasilluni nipinut pitaallisaatit pakkersimaarsinnaanngisaannik nipigissaanerullu aaqqissinnaanngisaanik isikkoqarluni immiussisarfiup igalaavata tunuanut nikuippoq. Ataatanilu immiussisarfiup aqutsiveqarfiani issiasoq qiviarsiilerpaa.

Frederiup isiginnaarummi maligaasat isigisani alarlugit ernini eqqissisimasumik qungujulluni qiviarpaa. Eqqissisimasumik nipeqarluni erinarsortussaq takkutingajalersoq erni paasitippaa.

Ataataanerup inuiaqatigiillu ataatsimoorfissaannik aaqqissuisutut suliaqarnerup oqimaaqatigiisinniarpai, tamakkuli tamarmik naqqup iluani inissaqartinneqarput.

Kingunitsianngua matu ammaqqippoq, tamatumuunalu Nivi Pedersen inimut kialaartumut appakaappoq.

Tamaani iigaq aviisit quppernerinik killukunik, qulequttanillu assigiinngitsut - Altanic Music aqqutigalugu ukiuni arlalinni nipilersortartut erinarsortartullu immiussisarsimasut pillugit allaaserisat takussaapput. Allat nutaaliorneranni Kalaallit Nunaanni nipilersornerup oqaluttuassartaa iikkami toqqorsivittullusooq nivingatinneqarpoq.

Nivi Pedersen qasoqqarpasilluni qungujulallunili kingusinaarnini utoqqatsissutigaa; naqqup iluanut immiussiartunnginnermini ataatsimiinnerminik sivitsortoorsimagaluarpoq.

Frederik Elsnerip nipilersuut appippaa, immiuteriikkallu inimi tusaaneqarsinnaalerput. Pulaffiginiarneqartussarmi qanoq misinnarnersoq Nivi Pedersenimut tusartinnissaa pingaartippaa.

Arnarissoq Bech Vetterlainip nipaa nipit arlallit ingioriinnerata akornatigut qarsarissumik tusaaneqarsinnaavoq, nippaarimmallu naqqup ilua allaanngilaq sajuppillatsinneqartoq.

Erinnat annersaannik ikkussortakkat

Ingioriinnermi nipit amerlalluinnaraluartut, suli inissaqarpoq. Erinnat amerlanerusut inissaqartinneqarput, nipit assigiinngitsut ilusilersueqataasut akornanni Nivi Pedersen immikkullarissumik tunniussaqassaaq. Erinnat annersaat ataqatigiissarniarneri ikkussortakkatullusooq ipput, arriitsumillu ilusinikkiartulerput.

Immiussineq aallartittussanngorpoq. Nivi Pedersenip siutequtit ativai, erinarsornissaminullu piareersarluni. Frederik Elsnerip nipilersuut appimmagu Nivi Pedersen tupalluni avaallappoq "Aah!". Siutequtit siutinut malussarissunut nipituallaarput.

Frederikip ingerlaannaq qisuariarpoq, toortaatillu qaamasut atorlugit nipi nipikillivaa, paasinnippasillunilu utoqqatserluni anngaaffigaa. Nikuippoq, mikrofonillu tungaanut aallarpoq portussusaalu aaqqillugu, Nivimut nalimmassarlugu. Ungasissusaa misissorsinnarlugu sukarutaatigut sukappaa, immiussinermilu aqutsiviup saavanut ingeqqippoq.

Nipaallivoq. Aaqqitassat aaqqinneqarput, piareerpullu.

- Timmissat qarlulaarpalunneri soorlu sinnassaalaaginnartut, Nivi Pedersen nipituumik erinarsorpoq.

Elsnerip Nivip nipaa tusaramiuk suaarpoq:

- Assaa! Inngilitut nipeqarputit.

Nipaa assut nuannaatsaqqarpasippoq. Erinitsassimanera qaangiuppoq, silarlunneratalu naqqup iluanut suerusaarnera soorlulusooq eqqarsaataajunnartoq.

Pitsiarnerani allat tamarmik soqutaajunnaarput, Atlanitc Musicip naqquata iluani Kalaallit Nunaata ataatsimoortumik nipeqalernissaa sulissutigineqarpoq.

Naammaannaraa

Ernera takkuteqqippoq, tamatumuunalu naammagittarsinnaajunnaavissimavoq.

Tinguartisimanerup nipaannera kipissallugu, tumerparpaat immiussisarfimmiittut assamminik pattallugit aallartippoq.

Immiussisarfiup saniani inimi mikisumi tumerparpaat pinnguarineqarnerisa nipaa tutsiuppoq.

Frederiulli qisuariapallanneranik tumerparpaat pinnguarineqarnerat unitsinneqarpoq. Nipituumik, asannippaluttumilli erni nipaarsaaqqullugu killilerpaa.

Suangasaarinerunngilaq, ataatatulli ernerminut oqariartuutaa nipaatsumik killileerpalunnera assortorneqarsinnaanngilaq. Nukappiaqqap assai tumerparpaaq qulaani unipput,  taamaasillunilu nipilersorneq sulinerlu naqqup iluani aallarteqqissinnaalerpoq.

Frederiup immiunneqaqqammertut appippai. Nipit suli suliarineqarnatillu mikirofinimik immiunneqarnermisut suli nipeqarput. Nivip niaqquni uertillu tusarnaaqqissaarpaa, erinarlu nalilersorlugu. Naammaannaraa.

Frederik Elsneri oqanngitsoq isaatigut qiviarpaa oqarlunilu:

- Aallaqqaataaneeqqilaartigu, Nivi peqqusivoq.

Nipaa qularpasinngivippoq. Naak erinnat tusarnerluinnaraluartut, aalajangersimasumik tiguaasinnaasumik, erinarsuummillu kivitseqataalluarsinnaasumik ujartuivoq. Frederik paasinnilluni anngaavoq, immiusseqqinnissaminullu piareersalerluni.

Oqiliallalluni qungujunneq akuersinerlu

Nivi Pedersen erinnersaaqqilerpoq. Tamatumuuna allaanngilluinnarluni erinaq ajoquserneqarani mikrofonip kaapiliisigut, qarasaasiap toqqorsivianut pissusissamisoorlutik torartinneqartut.

Iluatsippoq. Erinaq iluatseqqajarpoq, pissusissaalu Nivip erinaaniit Frederiup isiginnaarutaanut inissippoq.

Frederiup toortaat stop toormagu suna tamarmi ingerlaannaq nipaaruppoq. Aatsaaginnaq nipi qarsarissoq tumerparpaat isaanik sajuppilatitsisoq nipaarummat, nipaassuseq tussunngunartutullusooq misinnarsivoq. Issarnerup ataatsip iluani suna tamarmi nipaqanngilaq; erinarsuutip Aasarissumi akisuanera nipinut pitaallisakkami suli tusaaneqarsinnaavoq, naak tusarnaarutit nipeqanngikkaluartut.

Frederiup qarasaasiami tikkuussissut (musepilen aaqq.) saqippaa, appittaataalu toorlugu. Immiussat naqqup iluani tusarsaalerput. Nivi mikrofonip tungaanut saqivoq iluamik tusarnaarumalluni, nipilersuutillu silarsuaanut kukkuneqanngitsumut nipaa taputartuuppoq.

Akuerserpalaartumik kigaatsunnguamik qungujukkiartulerpoq. Qungujunneq oqiliallannerinnaanngilaq, immiussinermili nipit inissinnerannut qungujunneq naqissusiisuuvoq.

- Maanna nipilersuutip videotassaanik immiussissaagut, Elsner oqarpoq kaasarfimminillu iPhoneni amullugu.

Frederiup Nivi videoliornermi erinnersaaginnassasoq oqarfigaa, taamaassanngilluinnarporli. Nivi erinarsortuusarnianngilaq; erinarsorniarpoq.

Isornartorsiuinermik tigusisinnaasoq

Frederik akuersiinnarpoq, nalunngilaami erinnersaaginnarluni ilumoorsaartumik immiussisoqarsinnaangitsoq, aalajangersimasumilli piumasaqarpoq; Nipi immiunneqarnera assigalugu erinarsussaaq, anersaariarnerit, taggarissaarnerit tamaasa assigalugit. Eqqumiitsuliornerup nipilersornermi pitsaassuseq taamaasilluni tassani naapippaa.

Nivi Pedersen itisuumik ilummut anersaarpoq, erinarsorneranilu immiussaq videoliallu pitsaasumik allorissaaqatigiilerput.

- Tassa, Elsner oqarpoq.

Pedersen naammagisimaarinnippasilluni qungujussinnarluni poortuilluni aallartimmat Frederik aamma taamaaliorpoq.

Poortuinermini suliarpassuani pillugit eqqartuilerpoq. Imalu ersarissumik siunnersuuteqarpoq: Nipilersuusiortartoq suliami saavani sivisuallaamik issiasassanngilaq.

- Isornartorsiuisut tusarnaarneqarsinnaasariaqarput, atortorissaarumminik qamiterinermini, naqissusiilluni oqarpoq.

Taassumunnga pitsaalluinnartumik saqqummersitsinissaq eqqarsaatigalugu allat oqaasii tusarnaaqqissaartariaqarput. Imminuinnaq eqqarsaatigineq pineqarnani erinarsuut pineqarpoq – aamma Kalaallit Nunaat nipilersornikkut ataatsimuulersinniaraanni.