Kangerlussuarmioq: Naaguku Naalakkersuisut?
Issittumi Sakkutooqarfik, Arktisk Kommando, Kangerlussuarmi innuttaasunik ataatsimiisitseqqammerpoq. Peqataasoq paasisaqaraluarluni apeqqutissaqarnerulerpoq. Naalakkersuisut peqataanngillat. - Tulliani pinngitsooratik takkuttariaqarput, nunaqarfimmi najugaqartoq oqarpoq.
Sakkutuut 4.februar 2026 Kangerlussuarmiittut. Timmisartumut Herculesimut ikilertut.
Foto: Mikkel Berg Pedersen/Scanpix
Arktisk Kommando Kangerlussuarmi innuttaasunik ataasinngornermi maajip 25-ani ataatsimiisitsivoq. Tamanna Kangerlussuarmi najugallip, Ajaaja Schmidtip, peqataaffigaa.
Taassuma oqarnera naapertorlugu nunaqarfimmi innuttaasut sakkutoorpassuarnik tikittoqassagaangat iluamik paasitinneqarneq ajorput. Tamannali sakkutooqarfiup maanna pitsaanerulersikkumagaa, Ajaaja Schmidt tusaasani malillugit oqarpoq.
- Paasissutissiisarneq pitsaavallaanngitsoq nassuerutigaat, Soorlu qaqugu sungiusartoqassava? Qaqugu sakkutuut tikissappat? Ajaaja Schmidt Sermitsiamut oqarpoq.
Ajaaja Schmidt ilaquttanilu Kangerlussuarmut ukioq manna nuupput. Assi: Nammineq pigisaq.
Foto: Privat
Sakkutuut pisarnermit amerlanerusut Kangerlussuarmiittalerput. Tamanna Kangerlussuarmiut ulluinnarni inuussutissaminnik, Pilersuisup pisiniarfianut pisiniartarneranni, toqqagassakillinerannik kinguneqartoq, taanna aamma oqarpoq.
- Pikkoriffigivallaartarsimanngilaat nalunaartassallutik Pilersuisumut; Uani piffissami sakkutuut 500-t tikissapput. Taakkua tungaannit paasissutissiisarneq ataqatigiinngimmat maani Kangerlussuarmi innuttaasut eqqugaasut amerlagamik, Ajaaja Schmidt oqarpoq.
Paaserusutatik akissutissarsinngikkaat
Kangerlussuarmiut ataatsimiitinneqarneranni Qeqqata Kommuniani borgmesteri, Malik Berthelsen (S), najuuppoq. Apeqqutilli amerlasuut Naalakkersuisut akisussaagaluagaat akineqarneq ajortut, Ajaaja Schmidt oqarpoq. Tamannalu iluarinngilaa.
- Politikkikkut apeqqutit oqaaseqarfigisinnaannginnamikkit taamaammat oqaatigisinnaasaat killeqartorujussuupput.
- Nipangersarneqartutut misigiinnarama uanga, aamma apeqqutit suli amerleriaannarput, taanna oqarpoq.
Taamaattumik nunaqarfik taassumalu siunissaa pillugu Naalakkersuisut Kangerlussuarmukartariaqartut taanna isumaqarpoq.
- Aperisinnaanitsinni apeqqutigut akinagit oqaatigiinnartarpaat ajoraluartumik apeqqutigut akisinnaanagit. Taamaammat innuttaasunik ataatsimiisitseqqittoqassagaluarpat isumaqarpunga Naalakkersuisut pinngitsooratik takkuttariaqartut, Ajaaja Schmidt oqarpoq.
Sermitsiap Ineqarnermut, Attaveqaasersuutinut, Isorliunerusunut, Upalungaarsimanermullu Naalakkersuisoq, Iddimanngiiu Jensen Bianco (IA), Kangerlussuarmukalersaarnersoq nunaqarfimmilu innuttaasunik ataatsimiisitsilersaarnersoq pillugu attaveqarfigaa. Allaaserisalli suliarineqarnerata nalaani naalakkersuisoqarfimmit akisoqanngilaq.
