ILINNIARNEQ
Nunani tamalaani tusagassiuutitigut sammisaqarfiusumi semesteri
Ilisimatusarfimmi tusagassiornermik ilinniartoq Ivalu Nivi Johansen Aarhusimi Danmarks Medie- og Journalisthøjskolemi nunanit tamalaanit peqataaffigineqartumik ilinniarpoq.
- Allat kajumissaarusuppakka ilinniarnermi nalaani periarfissaqarnerminni nunani allani atuagarsornermi peqataasaqqullugit. Killigisat qaangerlugit misiliisarnerit nukissamik tunisisarput, misiginikuunngisat misigisarlugit, Ivalu Nivi Johansen DMJX-imi Aarhusimiittumi semesterimik atuagarsorluni ingerlaqartoq oqarpoq.
Assi: Nammineq pigisaq
Ilinniaqatigiit 25-upput, tamarmillu tuluttut
oqalussinnaallutik. Ilinniariartortummi nunanit tamalaaneersuupput,
semesterimilu "VIdeo journalism and foreign reporting" Danmarks
Medie- og Journalisthøjskolemi (DMJX) Aarhusimiittumi ilinniagaqariartorlutik.
Ilinniartut ilagaat 33-nik ukiulik Ivalu Nivi Johansen,
ulluinnarni tusagassiorneq pillugu Ilisimatusarfimmi ilinniartoq.
– Maani Aarhusimi ilinniarninni semesterit arfernat
ingerlappara, nunatsinniillu allaanerulluinnarpoq. Nuummi klassimi marluugatta
maani 25-uvugut. Klassi nunanit tamalaanit peqataaffigineqarpoq, tassa
Frankrigimit, Kinamit, USA-mit, Australiamit nunanillu allaneersunik
ilinniartoqarluni. Uanga kisiartaallunga nunatsinneerpunga, Ivalu Nivi Johansen
oqarpoq nangillunilu:
NUNAMI ALLAMI SEMESTERIMI ILINNIARNEQ
- Suliffinni piumaneqarluartunik
piginnaanngorsarneqarlutillu piginnaasaqalersinnaavutit.
- Ilinniaqatinnit allaanerulluinnartunik
piginnaasaqalissaatit.
– Nunarsuaq tamakkerlugu attaveqarfigisaqalersinnaavutit.
- Ajornartorsiutinik aaqqiinissamut allatut
periaaseqarnermik ilikkagaqassaatit. Kulturit allat ilikkagaqarfigissavatit,
immaqalu oqaatsinik nutaanik ilikkarlutit.
- Paasilissavat ilinnut nalinginnaasutut isigisat nunami
allami allatorluinnaq isigineqartarmata. Nunami allami kulturit allat
misigineri inuunerup sinnerani eqqaamasassanngussapput.
Ivalu Nivi Johansen tusagassiortutut ilinniarnermini Aarhusimi DMJX-imi semesterit arfernanni ilinniartuuvoq.
Assi: Nammineq pigisaq
- Pissanganaqaaq, tusagassiornermillu ilinniartut nunani
tamalaani qanoq ilinniartinneqartarnerat qanorlu sulisarnerat pillugit
paasisaqarluarpunga.
Ilinniartut semesterip ingerlanerani ilinniagassaminnik
pingasunik ingerlataqassapput, naammassinerillu tamaasa misilitsittassallutik.
Sammisat annersarissavaat nunanit tamalaanit nutaarsiassiinerit, taassuma
tullerissallugu videoliorluni tusagassiorneq kiisalu kisitsisit
naatsorsueqqissaarutillu pillugit aamma ilinniagaqassallutik. Naggataasumik
misilitsissuteqarlutik suliaqarnerminni ilinniartut sammisat pingasut taakku
tamaasa ilanngutissavaat.
Nutaamik aallartinneq Ivalu Nivi Johansen Nuummi inunngorpoq peroriartorlunilu,
Katuamilu filmertarfimmi ukiuni qulini affarmilu sulereerluni tusagassiortutut
ilinnialersimalluni.
- Nunarsuup sinnera siornatigut eqqumaffigisimanngisara ammarneqarpoq.
Tusagassiortutut ilinniartoq, Ivalu Nivi Johansen.
– Nutaarsiassat soqutigiuaannarsimavakka, taamaattumik
ilinniagaqarnissamut qinnuteqarnera pissusissamisuuginnarpoq.
Ilisimatusarfimmili aallartikkama takorloorsimanngisaannarpara ullumikkut
Aarhusimi DMJX-imiikkumaarlunga. Ilinniakkanut tunngatillugu eqqarsartaatsikkullu
pissarsiaqarfigingaatsiareerpara. Killigisat qaangerlugit misiliisarnerit
nukissamik tunisisarput, misiginikuunngisat misigisarlugit. Silarsuaq
siornatigut ilisimasaqarfigisimanngisaq ammarneqartutut ippoq, Ivalu Nivi
Johansen oqarpoq.
- Allat kajumissaarusuppakka ilinniarnermi nalaani
periarfissaqarnerminni nunani allani atuagarsornermi peqataasaqqullugit.
Nunarsuup sinnerata takunissaanut kajuminnerulernikuuvunga. Immaqa
piviusulersaarutinik suliaqariartorlunga angalasinnaavunga. Tamanna
misilikkusuppara.
DMJX, Danmarks Medie- og Journalisthøjskolemi Aarhusimiittoq tusagassiornermik ilinniartunut nunanit tamalaaneersunut sammisamik “Videojournalism and foreign reporting”-imik ilinniartitsinissamut neqerooruteqartarpoq.
Assi: Kim Haugaard/Scanpix
Tuluit oqaasii pingaarnertut Ivalu Nivi Johansen atuagarsornermi eqqarsartaatsiminilu
ilikkakkami saniatigut tuluttut oqaatsinut aamma pikkorinnerulerpoq.
- Ilaannikkut ajornakusoorsinnaasarpoq,
sungiusangaatsiartariaqartarpungalu. Tamannali imminut akilersinnaalluarpoq.
Nunarsuup sinnera eqqarsaatigalugu nutaamik takunnissinnaassuseqarnerulerpunga.
Ivalu Nivi Johansen KNR-imi ilinniakkaminut atatillugu
sulinermik misiliisimavoq, ilinniakkaminillu januarimi
naammassinnereersimaleruni Sermitsiami tusagassiortutut sulinissaminik aamma
takorluugaqarluni.
Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.
