Sheila Sariboga, Nuuk Vintagemik ingerlatsisoq, Nuummi Nuutoqqami AirZafarip illuutaaniilerpoq.
- Nuannaarnerusinnaanngilanga, Nuummimi ini sunaluunniit toqqarsinnaagaluarukku manna toqqarsimassagaluarpara, Sermitsiamit niuertarfittaamini pulaarneqarnermini oqarpoq.
Sheila Sariboga, Nuuk Vintagemik ingerlatsisoq, Nuummi Nuutoqqami AirZafarip illuutaaniilerpoq.
- Nuannaarnerusinnaanngilanga, Nuummimi ini sunaluunniit toqqarsinnaagaluarukku manna toqqarsimassagaluarpara, Sermitsiamit niuertarfittaamini pulaarneqarnermini oqarpoq.
- Inissisimaffik pitsaanerusinnaanngilaq, taamaammat sungiussiniaqqaarlungalu upperileqqaassavara.
Siornatigut Ceresvejimi Blok M-imi quleriit naqqarliani niuertarfeqarsimavoq, kommunilli inissiat taakku isaternialermagit allamut nuuttariaqarsimavoq.
- Aammali anginerusumut nuunnissannut piareersimavunga, taamaammat tamanna aamma pissusissamisuuginnarpoq, taanna oqaluttuarpoq.
Qangali takorluugaasoq
Nuuk Vintage 2024-p naalernerani ammarneqarpoq, Sheila Saribogalli tamanna sioqquterujussuarlugu Nuutoqqami nammineq pisiniarfittaarnissani takorloortarsimavaa.
- Pisiniarfik sumiiffimmut tulluartoq isumaqarpunga. Sumiiffimmi tassani avatangiisitsinnik illersuivugut. Tassani pinngortitamik illersuivugut. Tassani oqaluttuarisaanermik illersuivugut. Atisanillu tuniniaaninni aamma taamaaliortarpunga, taanna oqarpoq.
AirZafarip illuutaa inoqanngitsoq takugamiuk atulersinnaanerlugu paasiniarlugu attaveqarfigai, naggataatigullu akuerineqarpoq.
Nuuk Vintage maanna kangerlummut, pinngortitamut takornarianullu sanioqquttunut isikkiveqarpoq.
Assi: Birgitte Kjeldsen
Sheila Sariboga atisanik pooqattanillu iluarsaassillunilu nutarterisarlunilu taakku pisiniarfiutimini tuniniartarpai.
Assi: Birgitte Kjeldsen
- Ukiorpassuarni takorloorsimasara tassanngaannaq piviusunngoriataartoq upperiuminaappoq. Taamaammat paasiuminaatsippara, nuanneqaarli, taanna oqarpoq.
Sheila Sariboga allamik niuertarfissarsiormat pisiniartartui Nuuk Vintagep Instagramimi quppernerani atisanik suli pisisinnaapput, tassanilu aamma nammineq pisiniarnissaq inniminnerneqarsinnaavoq.
Nuuk Vintage qaammatip tulliani, tassa juunip 19-iani, niuertarfimmut nutaamut iserterpat atisanik atoqqitassianik pisisoqaqqissinnaalissaaq.
Aasamullu niuertarfimmini eqqaassutissanik avatangiisinut mingutsitsinngitsunik tuniniaalernissani takornarialerisunullu angallassinernik tuniniaasalernissani neriuutigaa.
- Millionærinngorusunngilanga, atisanilli atoqqitassianik pitsaasunik Nuummi illoqarfimmut naleqarnerulersitsisussanik nuannaalersitsisunillu neqerooruteqarusuppunga. Aamma illoqarfissuarmi najugaqarnitsinnik misigilersitserusuppunga, taanna oqarpoq.
