Kangerlussuup Københavnillu akornanni timmisartuussisarneq 2026-mi nangeqqissaaq
Kangerlussuarmi mittarfik nunanit tamalaanit aappaagu atorneqaqqilissaaq. Air Greenlandip Albatros Arctic Circlellu Københavnimut timmisartuussisarnissamik isumaqatigiissutertik nutarterpaat. Sapaatilli akunneranut ataasiaannarluni timmisartuussisoqartassaaq.
Jettime timmisartumik Boeing 737-800-mik Kangerlussuup Københavnillu akornanni timmisartuussisarpoq.
Assi: Jørgen Larsen
Air Greenlandimit Albatros Arctic Circlemillu Kangerlussuup Københavnillu akornanni toqqaannartumik aqqut aappaagu februaarip qulinganiit oktobarip 20-ata tungaanut ingerlateqqinniaralugu isumaqatigiissutigineqarpoq, Air Greenland tusagassiutinut nalunaarummi allappoq.
Jettime atorlugu sapaatip-akunneranut ataasiaannarluni angallassisoqartassaaq.
- Københavnimiit Kangerlussuarmut toqqaannartumik timmineq, nunap iluani aqqutinut ataqatigiissaarneqarpoq, taamaalilluni nunatta iluani angalanerup pitsaasuunissaa qulakkeerneqarluni. Tamanna angalasorpassuanut Kangerlussualiartunut, Sisimiuliartunut Ilulissiartunullu tapertaalluarpoq, angalanissamut pilersaarutit patajaannerulerlutik, Air Greenlandip ingerlatseqatigiiffissuani niuernikkut pisortaagallartoq Mogens Jensen oqarpoq.
Taamaalilluni Sisimiuniit Ilulissaniillu ullup ataatsip ingerlanerani Danmarkimut aallartoqarsinnaalissaaq. Ilulissaniit Kangerlussualiarsinnaaneq periarfissaqarluarpoq, sapaatip-akunneranummi arfinileriarluni timmisartuussisoqartassaaq.
- Kangerlussuaq ornigassatut pilerigineqarpoq, innuttaasut sulisullu tunniusimasut suleqatigalugit tulluussimaarluta piorsaaqataaffigisarput. Københavnip Kangerlussuullu toqqaannartumik aqquteqarnera sammisassat piorsarnerannut pingaartuuvoq – aamma aasaanerani angalaffiunerpaap avataani, Albatros Arctic Circlemi pisortaq Jørgen Larsen oqarpoq.
Aqqut Air Greenlandip nittartagaani inniminnerneqarsinnaanngorlugu isumagineqarpoq, taamaammat billetsisit pisiarineqarsinnaalernissaannut utaqqinalaarsinnaalluni.
