Kilisaatini inuttanut piumasaqaat tusarniaassutigineqarpoq
Kilisaatini aquttut nunanit allaneersut amerlanerpaamik qassiusinnaanerannik nalunaarut piumasaqaatinik aalajangersaaffiusoq Naalakkersuisut qaammammi matumani tusarniaassutigissavaat. Nalunaarulli atuutilerpat atoriaannaanersoq apeqqutaavoq.
Assiliisoq: Royal Greenland
Inuit Ataqatigiit, Siumut, Naleraq, Atassut aamma attaviitsup akornanni Aningaasanut inatsimmut 2024-mut isumaqatigiissutaanut atatillugu kilisaatit maani najugalinnit sulisoqarluni inuttaqarnissaanut piumasaqaammut inatsisiliuuffigineqartumi, aqumiunut tunngasunik immikkoortunik arlalinnut tunngavoq, taamaalilluni maanna 60%-
imiit 90%-imut qaffanneqarluni.
"Naammaginartumik angusaqarluarfiusussamillu ikaarsaariarfeqarnissaq pisariaqartinneqassasoq", aalisarnermut Naalakkersuisup Kim Nielsenip Naleqqami politikerimut Hans Enoksenimut paragraf 37 naapertorlugu akissutaani allassimavoq.
- Nalunaarutip tusarniutigineqartussap tusarniutigineqarnera naammasseriarpat aamma anguniakkap pineqartup tunngavissai pisariaqartinneqartut pissarsiarisinnaanissaat qulakkeerneqareerpata ikaarsaariarfissap sivisussusissaa erseqqissarneqartariaqassaaq, Kim Kielsen akissummini allappoq, "kilisaatinilu inuttat eqqarsaatigalugit Kalaallit Nunaani najugaqarnissamik aamma najugaqartussaanermik piumasaqaatip aaqqiiffigineqarnissaa" aamma pisariaqartoq, ilanngullugu allappoq.
Ilinniarsimasut ikippallaartut
Nalunaarummik nutaamik suliaqarneq naammanngitsoq Kim Kielsen aamma allappoq, massakkummi siunissamilu aqumiut Kalaallit Nunaani aalisarnermik inuussutissarsiuteqartut pisariaqartitaat naammattut massakkut pigineqanngimmata.
Qanoq sivisutigisumik ikaarsaariartoqarnissaa pilersaarutigineqarnersoq Kim Nielsenip oqaatiginngilaa, erseqqissaatigaali attuumassuteqartumik ilinniarnernut suliniutinik salliutitsinermik suliaqarnermi piginnaasanut piumasaqaatinik pilersitsiniarnermi namminersortut qanimut suleqatigineqartut, amerlanerusut imarsiornermi ilinniakkanik pisariaqartitaminnik aallartitsillutillu naammassinnittalerniassammata.
Umiarsuaatileqatigiit aspirantit pillugit pilersaarutaasa maannamut iluatsilluartup tapersersornissaat Kim Kielsenip aamma tikkuarpaa. Taamaakkaluartoq "massakkut sulisut pilersaarutinut peqataasilersissinnaanissaat ajornartorsiutigineqartoq" Kim Nielsen ilisimatitsivoq.
