Nunap immikkoortuini Qasigiannguani, Qeqertarsuarmi Kangaatsiamilu suluusalinnut mittarfissanut periarfissat pillugit misissuinerup inernera 2020-mi saqqummiunneqartoq naapertorlugu, Qeqertarsuarmi mittarfik 799 meteri sanaartorneqassappat, 92 millionit koruuninik, mittarfimmullu aqquserniassaq 6,2 millionit koruuninik akeqartussatut misissingersuusiorneqarpoq.
Nunalli immikkoortuini pineqartuni suluusalinnut mittarfiliornissaq imminut akilersinnaanngitsutut Orbicon Arctic A/S-ip aamma Rambøll A/S-ip missuinerani 2020-mi saqqummiunneqartumi inerniliunneqarmat, qulimiguullit nutaaliaanerusut atorlugit timmisartuussisarnissaq innersuussutigineqarpoq. Taamaakkaluartoq suluusalinnut mittarfiliorsinnaanermut periarfissat nutaamik naliliiffigineqarnissaat siunertaralugu suli sukumiinerusumik qulaajaaffigineqarnissaat siunertaralugu misissuinerit 2027 ilanngullugu ingerlanneqassapput.
Nunap immikkoortuini Qasigiannguani, Qeqertarsuarmi Kangaatsiamilu suluusalinnut mittarfissanut periarfissat pillugit misissuinerup inernera 2020-mi saqqummiunneqartoq naapertorlugu, Qeqertarsuarmi mittarfik 799 meteri sanaartorneqassappat, 92 millionit koruuninik, mittarfimmullu aqquserniassaq 6,2 millionit koruuninik akeqartussatut misissingersuusiorneqarpoq.
Nunalli immikkoortuini pineqartuni suluusalinnut mittarfiliornissaq imminut akilersinnaanngitsutut Orbicon Arctic A/S-ip aamma Rambøll A/S-ip missuinerani 2020-mi saqqummiunneqartumi inerniliunneqarmat, qulimiguullit nutaaliaanerusut atorlugit timmisartuussisarnissaq innersuussutigineqarpoq. Taamaakkaluartoq suluusalinnut mittarfiliorsinnaanermut periarfissat nutaamik naliliiffigineqarnissaat siunertaralugu suli sukumiinerusumik qulaajaaffigineqarnissaat siunertaralugu misissuinerit 2027 ilanngullugu ingerlanneqassapput.
Qeqertarsuarmili suluusalinnut mittarfiliornissaq ilaasunik angallassinermut nassatanillu assartuinermut pitsanngoriartitsiinnarani, illoqarfiup inuussutissarsiornikkut ineriartoqqinnissaanut tunngaviliissaaq. Mittarfiliornissamullu suliaq pilersaarusiorlugu piaartumik aallartinneqartariaqartoq, timmisartortartoq Qeqertarsuarminngaanneersoq, Jakob Mølgaard isumaqarpoq.
Qeqertarsuarmi mittarfissaq
Qeqertarsuarmi pisariaqarnerpaanik atortulerlugu mittarfimmik tikittarfimmik aallartarfimmillu pisariunngitsumik 225 kvadratmeterit missaannik angitigisumik sanaartortoqarsinnaasoq misissuinermi 2020-mi saqqummiunneqartumi erserpoq, taannalu inunnut 20-nut inissaqartitsissaaq.
Timmisartumut ilaallutik aqqusaartut timmisartumiiginnartassasut innersuussutigineqarpoq, taamaattumik aallartussat tikittullu tikittarfimmi kisimik inissaqartinneqassapput.
Sannavik garagealu katillugit 150 kvadratmeterisut angitigisoq sananeqarsinnaassaaq, tassanilu lastbilit aputaajaatillit, biililu inissaqartinneqarsinnaassasut misissuinermi nalilerneqarpoq.
Mittarfiit allat assigalugit Qeqertarsuarmi mittarfik AFIS-imik timmisartuussinernik nakkutilliiveqassaaq. Mittarfiup sumiinnissaanut tunngatillugu periarfissat sisamat 2004-mi naliliiffigineqarput, Qeqertarsuullu illoqarfiata kujataatungaani nunaminertaq sissamiittoq 799 meterimiit 1.199 meterimut tallineqarsinnaaneranut periarfissaqartoq piukkunnarnerpaatut naliliiffigineqarpoq.
Imaatigut angalasut amerlanerusut
Illoqarfinnut minnerusunut nunaqarfinnullu timmisartuussisarnernut, imaatigullu angallassisarnermut Namminersorlutik Oqartussat 2020-mut Aningaasanut Inatsimmi 157,8 millionit koruunit immikkoortippaat. Taakkunannga 24,2 millionit koruunit Qeqertarsuup Tunuani qulimiguulinnut mittarfinnut 15-iusunut timmisartuussisarnissamik kiffartuussinissamik aningaasalliisutaapput, kiisalu taakkunannga 1,2 millionit koruunit Qeqertarsuarmi qulimiguulinnut mittarfimmut aningaasaliissutaallutik.
2019-imi Qeqertarsuarmiit Qeqertarsuarmullu qulimiguulimmik inuit 1.097-it umiarsuarmillu 3.305-it angalasimapput, taamaalilluni katillugit inuit 4.402-it ukioq taanna angalasimallutik.
Qeqertarsuup Tunuani 2019-imi umiarsuamik angalasut 15.287-iupput, qulimiguulimmillu angalasut 5.443-llutik.
Qulimiguulik ukiumut Qeqertarsuarmi 250-eriarluni aallarsimavoq, agguaqatigiissikkaanni aallarnermi ataatsimi ilaasut sisamat missaat ilaasarsimallutik.
Qeqertarsuarmiit Qeqertarsuarmullu angalasartut amerlanerpaartaat Disko Line-p Arctic Umiaq Line-p ilaasunik angallassissutaanut angalasarput, taamaalilluni qulimiguulimmik angalasimasunut sanilliullugu imaatigut angalasimasut amerlanerujussuupput.
Suluusallit atussallugit tulluarnerusut
Ukiut kingulliit arlallit ingerlaneranni Qeqertarsuarmiit Qeqertarsuarmullu qulimiguulinnik imaatigullu ilaasunik angallassineq annertuumik unammillernartoqarsimavoq. Qeqertarsuarmullu tunngatillugu qulimiguulinnut taarsiullugit suluusallit atorneqarpata tamanna arlalitsigut pitsaaquteqartoq, suluusalinnullu mittarfiup Qeqertarsuarmi sanaartorneqarnissaa pisariaqartoq, ukiut 23-t sinnerlugit suluusalinni timmisartortuusoq Qeqertarsuarminngaanneersorlu, Jakob Mølgaard, isumaqarpoq.
- Suluusallit atortutigut piginnaasaat, soorlu usitunerunerat, eqqarsaatigalugit Qeqertarsuarmi ilaasunik nassatanillu angallassineq pitsaaneruliinnarani aammali angalanissanik taamaatitsiinnanerpassuit annertuumik ikilisinneqarsinnaapput.
- Suluusallit marlunnik aquttoqartuaannarput aammalu silarluttumi sermernartumilu instrumentit najoqqutaralugit apparsarsinnaaneq mittarfinni atorneqartartoq tunngaviusarmat qulimiguulinnut naleqqiullugit isumannaanneroqaat, taanna oqarpoq.
Qulimiguulliit amerlanersai sermernartumi ingerlatitsissutigequsaanngitsut, Qeqertarsuarmilu suluusalinnut mittarfeqalertuuppat Ilulissanut Aasiannulluunniit akunninngikkaluarluni assersuutigalugu Nuummut toqqaannarlugu timmisartortoqarsinnaalissasoq, Jakob Mølgaardip erseqqissaatigaa.
Naliliisoqarnissaanut piffissanngortoq
Qeqertarsuarmi suluusalinnut mittarfiliornissamut tunngatillugu misissuinerit sukumiisut ingerlanneqareerput, mittarfiliortoqarnissaanullu periarfissarissaartoq misissuinerit takutippaat, taakkuli qaavisigut ukiuni arlalinni misissuinerit suli ingerlanniarneqarnerat, Jakob Mølgaardip isornartoqartippaa.
- Nunatsinni sumiiffinnut allanut naleqqiullugu Qeqertarsuup avasissumiinnera tikikkuminaatsuuneralu nalilersuinermi pingaartinneqarnerusariaqarpoq. Aammali qulimiguulinnik angalasartut imaatigut angalasartunut naleqqiullugit amerlanerujussuunerinut, qulimiguulinnut billitsit akisuneruneranik ilaatigut peqquteqarsorinarpoq.
- Taamaattumik mittarfiliornissamut tunngatillugu politikkikkut pingaarnersiuilluni tulleriaarinermi Qeqertarsuup tunulliunneqartarnera uggornarpoq nalilersuiffigineqartariaqarlunilu, Jakob Mølgaard, ukiuni arlalinni timmisartortartutut atorfeqartoq, uanili nammineq inuttut oqaaseqartoq, oqarpoq.
Qeqertarsuarmi suluusalinnut mittarfittaartoqarnissaa pillugu innuttaasut inuussutissarsiortullu kissaateqarnerat paasilluarsinnaagini, Ineqarnermut Attaveqaasersuutinillu Naalakkersuisoq Hans Peter Poulsen, Siumut, oqarpoq.
