KNAPK kapisilinnut aningaasaateqarfimmit millionilikkaanik akiliisoqarnissaanut eqqartuussivilersuussivoq
KNAPK kapisilinnut aningaasaateqarfiit ASF aamma NASF 8,75 million koruuninik akiliinissaat piumasaralugu eqqartuussivimmut suliassanngortitsivoq.
- Nunatsinni aalisartut aningaasatigut taarsiissuteqarfigineqaratik annikitsuinnarmik kapisilinniarnermik ingerlatsisinnaanngillat. Aningaasatigut taarsiissuteqartoqartarnera peqqutigalugu kapisilinniarneq aningaasarsiutigineqanngilaq, suliaq pillugu KNAPK-p siulittaasua Nikkulaat Jeremiassen oqarpoq.
Assiliisoq: Leiff Josefsen
Kapisilinnik aningaasaateqarfinnit marlunnit aalisartut piniartullu kattuffiannut KNAPK-mut akiligassat pillugit aaqqiagiinnginnermi nutaamik pisoqarpoq.
KNAPK-p aningaasaateqarfiit ASF aamma NASF eqqartuussivimmut suliassanngortissimavai, KNAPK-llu 8,75 million koruunit akilerneqarnissaat piumasaraa:
- 2018-mit 2024-ip ukiaa tikillugu ASF aamma NASF KNAPK-mut
arlaannaatigut akiliuteqanngilaq.
- Taamaasillutik kalaallit aalisartui,
aningaasarsiutigalugu kapisilinniarnissaagaluamut taarsiullugu
akilersorneqarnissaat aammalu allatut aalisarnernut ikaarsaariarnissaannut
tapiiffigineqartarnissaraluat piviusunngortinneqarneq ajorpoq, aningaasat
ukiuni arfilinngulersuni akiliutigineqarneq ajormata, tamanna pillugu Sermitsiaq apeqquteqarfiginnereersorlu KNAPK taama nalunaaruteqarpoq.
Ukiuni arfinilinni kingullerni akiliutissat piumavaat
Atlantikup avannaani kapisilinnut aningaasaateqarfiit ASF aamma NASF kapisilinnik illersuinermik iluaqutiginnissimasut aalisartut piniartullu kattuffiat isumaqarpoq, Kalaallit Nunaannili aalisartut ukiuni aqqaneq-marlunni suleqatigiinnissamut isumaqatigiissummi pisinnaatitaaffigigaluagaannik aningaasatigut taarsiiffigineqanngillat tapiiffigineqarnatillu.
KNAPK naapertorlugu ukiuni aqqaneq-marlunni suleqatigiinnissamut isumaqatigiissut 2018-imi maajimi atsiorneqarsimasoq malillugu aningaasat KNAPK-mut aalisartunullu tunniunneqarnissaat qulakkeerneqartussaagaluarpoq, aningaasalli tunniunneqarsimanngisaannarput, KNAPK taama nalunaaruteqarpoq.
2020-miilli aningaasanik tunniussisoqarsimanngitsoq, suleqatigiit ASF, NASF aamma KNAPK piumasaqaatit pillugit isumaqatigiissinnaasimanngimmata, aningaasaateqarfiit taakku marluk siornatigut Sermitsiamut nassuiaasimapput.
- Piumasaqaatit isumaqatigiissutigineqaqqaartinnagit malinneqartinnagillu akiliisoqarnissaa piumasaqaataanngilaq, ASF-imi immikkut siunnersorti Bill Taylor aamma NASF-imi siulittaasoq Fridleifur Gudmundsson ataatsimoorlutik Sermitsiamut allapput.
Kapisilinniarneq nalilersuiffiginiaraat
Kapisilinniarnerup annikitsumiitinneqarnera nalilersuiffigineqartariaqartoq, KNAPK-p siulittaasua Nikkulaat Jeremiassen oqarpoq:
- Aningaasatigut
pisussaaffiit aaqqiivigineqarnissaat utaqqimaaqqaarlugu, Kalaallit Nunaanni
qanoq inissisimasoqassanersoq nalilersuivigineqassaaq.
- Nunatsinni
aalisartut aningaasatigut taarsiissuteqarfigineqaratik annikitsuinnarmik
kapisilinniarnermik ingerlatsisinnaanngillat, Nikkulaat Jeremiassen oqarpoq.
2018-imilli suleqatigiinnissamut isumaqatigiissutip malinneqannginneranut atatillugu Atlantic Salmon Federationimut aamma the North Atlantic Salmon Fundimut aningaasatigut taarsiissuteqarnissamik piumasaqarnissaq aammattaaq KNAPK-p isumaliutigaa, nangilluni oqarpoq.
- Tassa
imaappoq Kalaallit Nunaata maannakkumut aningaasarsiutigalugu
kapisilinniartoqannginnissaanik akilerneqartarluni inissisimanera
nalilerneqartariaqarpoq, tassami nunatsinni aalisartut aningaasarsiutigalugu
aalisartitsinaveersaarneq naammakkunnaarmat, Nikkulaat Jeremiassen oqarpoq.
Peqquserluttoqarsimasinnaaneranik suli misissuisut
Ukiut pingasut matuma siorna kapisilinnut aningaasaateqarfinnit tapiissutit 1.050.000 koruunit tammarsimasut, KNAPK-llu aningaasat sumut pisimanerat paasiniarsimagaa, siusinnerusukkut Sermitsiami allaaserisarparput.
KNAPK-p aningaasat qanoq agguaanneqarnerat suli misissoraa KNAPK-mi pisortaq Vittus Qujaukitsoq Sermitsiamut ilisimatitsivoq, aningaasalli aningaasaateqarfiup siunertaanut naapertuutinngitsumik atorneqarsimasut ersarinnerarpaa.
