KNI-mi mamianartuliaq eqqartuussivimmi suliarineqassanngilaq
KNI A/S-imi aamma Neqi A/S-imi toqqorsivinni peqquserluttoqarneranik aamma naatsorsuutini peqquserluttoqarneranik suliami annertuumi unnerluutiginnittoqassanngitsoq, unnerluussisussaatitaasoq aalajangersimavoq.
KNI-p Sisimiuni sullissivia
Assiliisoq: Johannes Ujo Müller / KNI
Naak KNI A/S-ip ukiut marluk matuma siorna KNI-p aqutsisuisa ukiumoortumik nalunaarusiaanni allassimasutut „kukkunerit annertuut“ pissutigalugit akileraarutit ilanngaatigereerlugit 341 millionit koruuninik amigartooruteqarsimalluni nammineq aningaasaatiminik nalimmassaasariaqarsimagaluarluni, tamanna eqqartuussivimmit misissorneqanngisaannassaaq.
KNI-mi qullersat suliamut atatillugu arlaleriarlutik politiinut nalunaaruteqarsimapput, nalunaarulli ataasiinnaq pinerluttuliornermut suliamik kinguneqarsimavoq, tassa naatsorsuuserinermi pisortamut siornatigut atorfilik, maajimi peqquserluttut uppernarsaatinillu eqqunngitsuliornermut eqqartuunneqarsimasoq, pillugu suliaq. Suliarli taanna suliareqqitassanngortinneqarpoq, nunallu eqqartuussiviani suli aalajangiiffigineqanngilaq.
Uppernarsaatit
- KNI-p quersuani unioqqutitsilluni/eqqunngitsuliorluni allattuisoqarsimaneranik aamma peqquserluttoqarsimaneranik uppernarsaatinillu eqqunngitsuliortoqarsimaneranik politiit piffissami tassani nalunaarfigineqarput. Pisuni taakkunani marlunni pingaarnertut pineqartoq/pinerluttoq/akisussaasoq tassaavoq XX (naatsorsuuserinermi pisortaasimasoq, aaqqissuisoqarfimmit kinaassusaa isertuunneqartoq), Kalaallit Nunaanni Politiini immikkut unnerluussisussaatitaasoq Lars J. Pedersen Sermitsiamut oqarpoq.
KNI-p quersuani unioqqutitsilluni/eqqunngitsumik allattuisimaneq pillugu "pinerluttoqarsimatillugu suliaq eqqartuussummik kinguneqartoq naammattumik qularnaatsumik ingerlanneqarsinnaanngitsoq" misissuinerup takutikkaa, immikkut unnerluussisussaatitaasoq ilassuteqarluni oqarpoq.
- Peqquserlunneq/uppernarsaatinik eqqunngitsuliorsimaneq pillugit nalunaarut kisiat unnerluutigineqassasoq tamatuma kingorna nalilerneqarpoq, Lars J. Pedersen nassuiaavoq.
Kingusinnerusukkut KNI-mi qullersat KNI A/S-imi immikkoortortaqarfimmilu Neqi A/S-imi naatsorsuutinik piaaraluni allanngortitsisoqarsimasinnaaneranik politiinut nalunaaruteqarput, tassanilu pinerluttulerinermi inatsimmi paragraf 62, imm. 1-imi ukiumullu naatsorsuutit pillugit inatsimmi paragraf 164-imi, 8-mi 11-milu unioqqutitsinerup pasitsaanneqarnera tunngavissaqarluarpoq.
Tunngavilersuut
Unnerluussisussaatitaasut suliamik taamaatitsiinnarnerannut immikkut unnerluussisussaatitaasup uku tunngavilersuutigai:
- Pisimasut tamakku pillugit pineqaatissiisoqarpat, tamanna XX-ip (naatsorsueqqissaartarfimmi pisortaasimasoq, aaqqissuisoqarfimmit kinaassusaa isertuunneqartoq) peqquserlussimanermut uppernarsaatinillu eqqunngitsuliorsimanermut pillaatisiassaanut ilanngunneqassaaq. Taamaattumik misissuinissamut periarfissat aningaasallu amigaatiginerisigut nalunaarut tamanna suliarineqassanngitsoq aalajangerpugut.
