Australiamiut aatsitassarsioqatigiiffiat Energy Transition
Minerals, Kuannersuarni ujaasinissamut akuersissutaateqartoq, maannalu
aatsitassanik qaqutigoortunik piiaanissamut akuersissutaatitaqarniarlutik
Kalaallit Nunaat Danmarkilu isumaqatigiisitsiniartarfikkut eqqartuussivikkullu suliassanngortitsisimasoq,
tunniutiinnanngilaq.
Piginneqataassutit akikillisat
Australiamiut aatsitassarsioqatigiiffiat Energy Transition
Minerals, Kuannersuarni ujaasinissamut akuersissutaateqartoq, maannalu
aatsitassanik qaqutigoortunik piiaanissamut akuersissutaatitaqarniarlutik
Kalaallit Nunaat Danmarkilu isumaqatigiisitsiniartarfikkut eqqartuussivikkullu suliassanngortitsisimasoq,
tunniutiinnanngilaq.
Piginneqataassutit akikillisat
Ingerlatseqatigiiffiup piginneqataasunit aningaasaliissutit nalilimmik
tunisinermigut piginneqataassutit nutaat aningaasaliisartunut aalajangersimasunut
tuniniarneqarsimasut nalinginnaasumik akigititamit akikinnerusumik tunivai. Matumani
piginneqataassutit niuerfimmi akinit 20 procentimik akikinnerusumik
tunineqarmata ingerlatseqatigiiffik Australiamiut dollariinik 9,35 millioninik (42
millionit koruunit miss.) pissarsivoq.
"Aningaasaliissuteqarnerulernermut qisuariaat, Kuannersuarni suliniummut
nunarsuarmioqatigiinnut pingaaruteqarneranut nunarsuarmilu tamarmi
aningaasaliisartut Kalaallit Nunaata aatsitassarsiornikkut
periarfissaqarluarneranik soqutiginnilernerannut ersiutaasoq,
nuannaarutigaarput," pisortaq Daniel Mamadou-Blanco oqarpoq nangillunilu:
"Aningaasaliissuteqarnikkut suliniut ineriartortittuarsinnaallugulu
najukkami suliniuteqarsinnaalerpugut, tamannalu peqatigalugu isumaqatigiissitsiniarnermut
eqqartuussinernullu aningaasanik peqalerpugut."
Suliffeqarfiup Australiami nunanut allanut ministeriusimasoq Julie Bishop
suliniummi siunnersortissatut nutaatut ukiup aallartinnerani atorfinitsippaa,
taassuma saniatigut naalakkersuisoqarfimmi pisortaasimasoq Svend Hardenberg
aamma atorfinitsinneqarpoq.
Qaffasissumik nalorninartullit
Aalborg Universitetimi aningaasaqarnermut aqutsinermut professori Per Nikolaj
Bukh naapertorlugu aningaasaliissuteqarneruneq kingulleq, piginneqataassutinik
niuernermi niuerfimmi akiniit 20 procentimik akikinnerusumik
neqerooruteqartoqarnera, ingerlatseqatigiiffiup eqqartuussivikkut
isumaqatigiissitsiniarnermut eqqartuussinermilu aningaasanik
qulakkeerinninniarneranut takussutissaavoq.
Taanna naapertorlugu
”penny-shares”-inik taaneqartartut pineqarput – oqaaseq piginneqataassutinut
qaffasissumik nalorninartoqartunut isigineqarlutik akikitsumik
tunineqartartunut, taamalu eqquiniutitut atorneqartartunut, tunngatillugu
atorneqartarpoq. Tamatuma saniatigut aningaasaliisunngorlaat aamma piginneqataassutinik
aalajangersimasumik nalilimmik qaammatini 18-ini akeqanngitsumik pisinissamut
pisinnaatitaaffeqartut professori oqarpoq. Piginneqataassutit
aalajangersimasumik nalilimmit qaffakkiartornerussappata,
aningaasaliisunngorlaat aningaasanik akileeqqinnatik immikkut
iluanaarutissarsisinnaapput.
– Ingerlatseqatigiiffik aningaasanik pisariaqartitsivoq,
taamaaliornermikkullu 42 millionit koruuninik isertitsipput. Piginneqataassutit
nalingi qanittukkut 350 procentimik qaffassimammata akikilliliisimanngitsuugunik
pisinissamullu isumaqatigiissusiorsimanngitsuugunik aningaasat taakku
isertissinnaanavianngikkaluarpaat, Per Nikolaj Bukh oqarpoq nangillunilu: – Ingerlatseqatigiiffik piiaanissamut akuersissummik peqarsimasuuppat
suliniummillu taama iluanaarutigisaqartigisoq, soorlu ingerlatseqatigiiffiup
isumaqatigiissitsiniarnermi suliamut eqqartuussivimmilu suliamut
tunngavilersuutigigaa, taava piginneqataassutit naliat ullumikkumut
naleqqiullugu untitileriarluni qaffasinnerussagaluarpoq. Taamaammat aningaasanik
amerlanerusunik aningaasaliineq aqutsisut suliniutip iluatsissinnaanissaanik
qularuteqarnerannik ersersitsivoq. Akerlianik eqqartuussivimmi
isumaqatigiissitsiniarnermilu suliami ajugaasinnaagaanni imaluunniit inatsisit
allanngortinneqarpata suliniut aallartissinnaappat taava kikkunnut tamanut
aningaasat naammalissapput, Per Nikolaj Bukh oqarpoq.
