KL

DK

TAKORNARIAQARNEQ

Kujataanut ikiorsiissuteqartoqalerpoq

Aasaanerani sikorsuaqarnera patsisaalluni Naalakkersuisut ikiorsiissutitigut Kujataanut maanna ikiorsiissuteqarsinnaalernerat, Inatsisartut Aningaasaqarnermut Akileraartarnermullu Ataatsimiititaliaata decembarip 30-ani akuersissutigaat.

- Naggataatigut suliaq kissaatigisamik inerneqarmat tuallappunga, Naalakkersuisoq Naaja H. Nathanielsen (IA) oqarpoq.
Jensine Berthelsen
tusagassiortoq
Saqqummersinneqarpoq

Ikiorsiissutit amernanerit ajornartorsiutitaqanngitsumik atuutsinneqartarput pisariaqartitsineq nalaanneqaraangat. Kisianni tamanna suliffeqarfinnut takornarialerinermik ingerlataqartunut Kujataaniittunut atuutinngilaq, tassani aasap ingerlanerani sikorsuit ajornartorsiortitsinerisa kingorna annaasaqartunut.

Sikorsuit imaatigut aqqutissanik matoorinissaat sioqqullugu, takornariaqarnermik inuussutissarsiuteqartut naatsorsuutigisimagaluarpaat isertitaqarluarumaarnissartik pilersaarutigineqarsimasunik tikittoqartussaagaluarmat, pingaartumik umiarsuarnik takornariartaatinik. Taamaattorli takornarissat takkutinngitsoorput, taamaalillunilu aamma isertitassaagaluit annaaneqarlutik.

Tamatuma kingunerisaanik Naalakkersuisut pilertortumik qinnuteqaraluarput ikiorsiissutinik periarfissiiniarlutik, tamannali aallaqqaammut Inatsisartut aningaasaqarnermut ataatsimiititaliaanit itigartitsissutigineqarpoq. Maannali eqqugaasimasut ikiorserneqarnissaat qulakkeerneqarpoq. Takornariarpassuit tikinngitsoornerannik pissutilimmik isertitaqanngitsoornerup kingunerisaanik sunnerneqarsimasut, aammalu isertitaqanngitsoornerup kingunerisaanik minnerpaamik 20 procentimik isertitakilleriarsimanermik uppernarsaasinnaasut maanna qinnuteqarsinnaalerput ikiorsiissutit ilaannik pissarsinissaminnut.

Naaja naammagisimaarinnippoq suliaq kissaatigineqartutut inerneqarmat

Tassami Naalakkersuisut maanna ilisimatitsipput suliamik ingerlatsineq maanna naammassineqartoq, inernerineqartorlu, Kujataani takornarialerinermik suliaqartut eqqugaasimasut, tassa 2024-ip ingerlanerani sikorsuit pissutaallutik isertitassaagaluaminnik annertuumik annaasaqarsimasut ikiorserneqarsinnaalertut.

Ikiorsiissuteqarnissap akuersissutigineqarnera Inuutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisup Naaja H. Nathanielsenip nuannaarutigaa, imalu oqarluni:

- Naggataatigut suliaq kissaatigisamik inerneqarmat tuallappunga. Naalakkersuisut isumaqartuarsimapput Kujataani ingerlatsisut eqqugaasut ikiorneqarnissaminnik pisariaqartitsisut, taakkuinnaat pinnagit aammali inuussutissarsiutit, neqeroorutigineqartartullu allanngorarnissaannut qulakkeerinnissutitut. Inuussutissarsiummik naqqanit ineriartortitsinissaq imaannaanngissinnaammat, siuariartornerup uninnginnissaa Naalakkersuisut pingaartippaat.

Nalik Ventures ikiorsiissutinik agguaassisuussaaq

Naalakkersuisut Nalik Ventures A/S qinnuigaat, Innovation South Greenland suleqatigalugu ikiorsiissutinik aqutsitsissasut.

Ikiorsiissutinit ikiorserneqassagaanni, 2024-mi januaarimit septembarip tungaanut kaaviiaartitat 2023-mi januaarimit septembarip tungaanut kaaviiaartissimasanut sanilliullugit minnerpaamik 20 procentinik ikileriarsimasut ingerlatsisut uppernarsarsinnaassavaat. 

Ilanngullugu tusagassiuutitigut nalunaarummi erseqqissaatigineqarpoq ingerlatsisut nutaat tamarmik immikkut naliliiffigineqassasut.

Naalakkersuisut naggataatigut nalunaarutigaat 30.12.2024 aallarnerfigalugu ikiorsiissutinik qinnuteqaatit uunga nassiunneqassasut: Nalik Ventures e-mailikkut nalik@nalik.gl imaluunniit oqarasuaatikkut 701020

IKIORSIISSUTIT PERIARFISSAALERNERANNUT AQQUT

  • Ingerlatsisunit eqqugaasunit saaffiginnissutit siulliit Naalakkersuisut juulip aallartinnerani tiguaat
  • Kujataani ingerlatsisunut aningaasatigut ikiorsiissutissat pillugit Naalakkersuisut isummernissaannut tunngavissiaq Naalakkersuisut 2024-mi aggustip 9-ni akuersissutigaat
  • Naalakkersuisut isummernissamut tunngavissiaq Aningaasaqarnermut Ataatsimiititaliamut aggustip 23-ani nassiuppaat
  • Isummernissamut tunngavissiamut apeqqutit kiisalu Aningaasaqarnermut Ataatsimiititaliap septembarip pingajuani aalajangiinerata kingunerisaanik malittarisassanik noqqaassut Naalakkersuisut septembarip 12-iani tiguaat
  • Apeqqutinut akissutit, malittarisassiallu Naalakkersuisut septembarip 26-ani nassiuppaat
  • 2024-mi oktobarip 10-ani Aningaasaqarnermut Ataatsimiititaliap isummernissamut tunngavissiaq itigartippaat
  • 30. decembari Aningaasaqarnermut Ataatsimiititaliap Naalakkersuisut qinnuteqaataat akuersissutigaat
krydstogtsturisme inuussutissarsiutit hjælpepakke finansudvalget erhverv sydgrønland turisme naalakkersuisut

ATORFIIT Se alle jobs

Powered by Labrador CMS