Løkke aqqut nutaaq pillugu: Ulloq immikkut ittoq
Københavnimit Nuummut timmisartuussisarnerup ammarneqarnerani ilaatigut nunanut allanut ministeri Lars Løkke Rasmussen oqalugiarpoq, taassumalu Kalaallit Nunaata Danmarkillu illoqarfiisa pingaarnersaasa timmisartuussisarnermik nutaamik attaveqalernerat nuannaarutigaa.
Lars Løkke Rasmussen sisamanngornermi ullaakkut Københavnip mittarfiani Nuummut timmisartuussinerup ammarneqarneranut atatillugu oqalugiarpoq.
Assi: Morten Okkels
Nunanut allanut ministeri Lars Løkke Rasmussen sisamanngornermi Nuup Københavnillu akornanni timmisartuusseqqaarnermut ilaasuussaaq, kingusinnerusukkullu Nuummi mittarfiup atoqqaartinneqarnerani peqataassalluni.
Sisamanngornermi ullaakkut Københavnip mittarfiani mittarfiup isaaffiata ilisimaneqarluartup B10-p eqqaani oqalugiartoqarpoq.
Lars Løkke Rasmussen danskit naalagaaffiannik Nuummi mittarfiliornermut, aqqummik nutaamik periarfissaqalersitsisumut, akulerutsitsisuuvoq. 2018-imi aningaasalersuisoqartariaqarmat danskit naalagaaffiat 700 millionit koruuninik neqerooruteqarpoq, mittarfimmik nutaamik piginneqataanissamik kissaateqaatigaluni.
Hans Egedep Illuani Nuummiittumi, silataani akerliussutsimik takutitsisoqarnerani, Lars Løkke Rasmussenip Kim Kielsenillu isumaqatigiissut atsiorpaat.
Nuuliapallalaartarnissani qilanaarigaa
Lars Løkke Rasmussen ullumikkut nunanut allanut ministeriuvoq, ullorlu Nuummut timmisartuussisoqartalerfia immikkorluinnaq ittuusutut taavaa:
- Ullumikkummi
timmisussanut takusassiivimmi siullermeertumik ”Nuuk” allassimasoq
takusinnaavarput. Københavnimit Nuummut toqqaannartumik aqquteqalernera
nalliuttorsiutigaarput. Kalaallit Nunaanni Danmarkimilu
illoqarfiit pingaarnersaasa nutaarluinnarmik attaveqalernerat nalliuttorsiutigaarput. Akunnerit
sisamat minutsillu 50-it. Illoqarfitta pingaarnersaasa akornanni angalaneq
sivisunerunngilaq.
- Tamanna
amerlaqisugut nuannaarutigaarput, nunanut allanut ministeri oqarpoq.
Lars Løkke Rasmussenip oqalugiarnermini aamma aqqutip nutaap niuertunut takornarianullu amerlanerusunut aamma namminerminut periarfissarpassuarnik nutaanik pilersitsinissaa nuannaarutigaa:
- Ullumikkut
angalanissannut qilanaarpunga – siunissamilu Nuuliapallalaartarnissannut.
Maanna ikiartornissaq kinguaattoortinnerunianngilara. Nalunngilara
amerlaqisugut Nuummut aallarnissarput qilanaarigipput.
Motzfeldt ataatsimeeqatigissagaa
Mittarfiup atoqqaarfissiortinneqarnerani peqataanissami saniatigut Lars Løkke Rasmussenip aamma naalagaaffinngornissamut nunanullu allanut tunngasunut naalakkersuisoq Vivian Motzfeldt (S) ataatsimeeqatigissavaa.
Tamatumunnga atatillugu Løkke tusagassiuutinut nalunaarummi oqarpoq Danmarki Kalaallit Nunaannut suleqataasutut isigigini – aamma attaveqaasersuutit ineriartortinnissaannut inuussutissarsiornermullu pitsaanerpaamik sinaakkutissaqalernissamut tunngatillugu:
- Suleqatigiinnikkut nukittuffissarpassuit periarfissarpassuillu pilersinneqartarput. Vivian Motzfeldtip ataatsimeeqatiginissaa qilanaaraara, aappaagumi Issittumi Siunnersuisoqatigiinni siulittaasunngunnginnitsinni suleqatigiinnerup qanoq nukittorsarneqarsinnaanera eqqartussavarput, nunanut allanut ministeri Lars Løkke Rasmussen oqarpoq.
Aningaasaqarnermut ministeri Nicolai Wammen aamma Nuummut angalaqataassaaq, mittarfiullu atoqqaartinneqarnerani peqataassalluni.
