GREENLAND AIRPORTS USA-MUT AQQUT PILLUGU:
– Maannakkut nunani tamalaani ilannguppugut
Toqqaannartumik USA-mut angalanissamut aqqutip Kalaallit Nunaata unammillersinnaassusilimmik nunarsuarmi ornigassanngortinnissaata ajornannginneranik uppernarsaatissat siullersaraat, Greenland Airportsimi pisortaaneq Jens Lauridsen naliliivoq.
- Tamanna Kalaallit Nunaata Amerikamut avannarlermut attaveqarneranik nukittorsaanermi pingaaruteqartorujussuarmik ineriartortitsinerpaasussaavoq, Nuummit New Yorkimut timmisartuussineq nutaaq aappaagu aasakkut aallartittussaq pillugu Jens Lauridsen oqarpoq.
Assi: KAIR
Nuummit USA-mi New Yorkimut aasaanerani timmisartuussisoqartalernissaa Greenland Airportsip sisamanngormat nalunaarutigisaa tassaavoq pisoq immikkuullarissumik pingaarutilik.
Greenland Airportsimi pisortaq Jens Lauridsen naapertorlugu aqqut tamanna Kalaallit Nunaata „nunarsuarmi unammillersinnaassuseqarneranut“ uppernarsaataavoq siulleq:
- Tamanna Kalaallit Nunaata Amerikamut avannarlermut attaveqarneranik nukittorsaanermi pingaaruteqartorujussuarmik ineriartortitsinerpaasussaavoq.
- Maannakkut nunani tamalaani ilannguppugut, tamannalu Kalaallit Nunaata unammillersinnaassusilimmik nunarsuarmi ornigassanngortinnissaata ajornannginneranik uppernarsaatissat siullersaraat, aqqut nutaaq United Airlinesimit, silarsuarmi timmisartortitseqatigiiffiit annersaata ilaannit, ingerlanneqartussaq pillugu tusagassiuutinut nalunaarummi pisortaaneq oqarpoq.
Aqqut pingaaruteqartorujussuanngussasoq Jens Lauridsen isumaqarpoq:
- Newark-imut toqqaannartumik aqqutissat aamma angalasunut ornigassarpassuarnik nutaanik periarfissarpassuarnillu aammalu angalasunut, kulturikkut paarlaasseqatigiinnermut, ilinniarnernut niuernermullu Kalaallit Nunaannut periarfissanik ammaasussaapput, taanna oqarpoq.
Amerikami ornigassat 89-it
Aasaanerani angallassineq juunip 14-iani aallartissaaq septemberip 24-allu tikillugu 30-riarluni uteqattaarluni ingerlanneqassalluni.
Timmisartorneq akunnerit sisamat sinnilaarlugit sivisussuseqartassasoq Greenland Airports ilisimatitsivoq, Marcel Fuchsillu, United Airlines-imi Managing Director International Salesiusup, aqqut nuannaarutigaa:
- 2025-mi aasaanerani siullermeertumik Nuuk International Airport-imit
USA-mut toqqaannartumik timmisartuussisarnerit Kalaallit NUnaannit angalasut iluaqutigilersinnaassavaat, kiisalu Amerika akimorlugu ornigassanut 89-inut New York/Newark-imi aqqutissat atorlugit pisariitsumik aqqutissaqalernissamut periarfissaqalissallutik.
- Amerikamiut angalasut nunarsuarmi illoqarfiit pingaarnersaasa avannarlersaannut nalunaaquttap akunneri sisamat sinnilaarlugit toqqaannartumik timmisartorsinnaalissapput, tamannalu nunarsuarmi pitsaanerpaat ilaanni pisulluni angalanissamut aammalu aasaanerani seqernup kaaviinnartup ataani uumasunut alutornarluinnartunut periarfissaqalersitsissaaq, taanna oqarpoq.
