Danmarkimi
illuutinut aningaasaliisartup Jørn Tækkerip, suliffeqarfissuarmik
milliardikkaanik kaaviiaartitsisumik Tækkersmindemik ingerlatsisup, illut
arlallit Tasiilamiittut aamma Tiileqilaamiittut pisiarisimavai. Taakku
nutarterlugit aallarteruttorpai, ilaatigut inuusuttuaqqat ikiortarialinnut
suliffeqarfimmit Siu-Tsiumeersut suleqatigalugit.
Akunnittarfiup
ilaatigut najukkami takornariartitseqatigiinnut Sermilik Adventuresikkunnut
attartortinnissaa pilersaarutaavoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Danmarkimi
illuutinut aningaasaliisartup Jørn Tækkerip, suliffeqarfissuarmik
milliardikkaanik kaaviiaartitsisumik Tækkersmindemik ingerlatsisup, illut
arlallit Tasiilamiittut aamma Tiileqilaamiittut pisiarisimavai. Taakku
nutarterlugit aallarteruttorpai, ilaatigut inuusuttuaqqat ikiortarialinnut
suliffeqarfimmit Siu-Tsiumeersut suleqatigalugit.
Akunnittarfiup
ilaatigut najukkami takornariartitseqatigiinnut Sermilik Adventuresikkunnut
attartortinnissaa pilersaarutaavoq.
– Nuliara
Birgitte 2016-17-imi Tunumiissimasoq peqatigalugu siorna septembarimi
siullermeerlunga Kalaallit Nunaannut tikeraarpunga, taassumatullu nunamut
asannilerpunga. Taama angalaninni ilaatigut Line Kristiansen aamma Tobias
Ignatiussen Sermilik Adventuresimeersut naapippakka, aperaakkalu illunik
pisiassaqarsinnaanersoq, sanaartugassanillu suliakkerneqartartoq Lars
Vestergaard illunik pisiassaateqarluni, Jørn Tækker Tiileqilaamit
oqarasuaatikkut oqaluttuarpoq.
Akunnittarfik 15-inik initalik
Jørn Tækker
Tasiilami illunik marlunnik pisivoq, ilaatigut toqoreersup Gerda Vilholmip
illua iluarsaanneqartussaq. Taassuma saniatigut aamma Amerikamiut sakkutuuisa
illutoqaat ”Klubben” Naasuliartarpimmiittoq pisiaraa, 15-inik initalimmik
akunnittarfinngorlugu sananeqartussaq pisiaraa. Kiisalu Jørn Tækker
Tiileqilaami illumik pisivoq.
– Maanna apererusussagunarputit illut taakku sooq pisiarinerikka,
tamannalu arlalinnik pissuteqarpoq. Siullertut Kalaallit Nunaanni pinngortitaq
kulturilu nuannareqaakka, aamma takornartanik maani naapitsisarneq, taakkulu
angalasunut allanut ilisaritikkusukkaluarpakka. Nammineerlunga Afrikami
Asiamilu angalasarnikooqaanga, kisianni Tasiilami nunaqarfinnilu pinngortitaq
kulturilu immikkorluinnaq ittut misigisimanngisaannarlugit. Aappaatut
Danmarkimi suliffeqarfiuteqarama 60-inillu sulisoqarlunga, illullu sanaqqinneqarnerat
suliassatut suleqatigiissutissatut suliarisinnaavarput, sulisut
eqimattakkaarlutik maanngartarlutik peqatigalungalu illunik
nutartereqataasarlutik. Tamanna immitsinnut ilisarinerunissatsinnut
periarfissaavoq pitsaasoq, Jørn Tækker oqarpoq, taanna sanasutut aamma
sanaartornermut ingeniøritut ilinniagaqarsimavoq.
Aningaasaqarnikkut
atugarisat
Jørn Tækkerip containerit pingasut sanaartornermi atortussanik imallit
Tasiilamut nassiutereerpai, suliassaq aallartissinnaaniassagamikku.
– Illut naammassigaangata Sermilik Adventures suleqatigalugu
attartortinneqartassapput, taamaalillutillu inuusuttunut tamaani najugaqartunut
suliffissaqartitsissallutik, Jørn Tækker oqarpoq, taassumalu inuusuttuaqqat
ikiortarialinnut suliffeqarfimmit Siu-Tsiu-meersut nutarterinissamut
sulisussarsiarereerpai.
– Qalipaanernut, majuartarfiliornernut aneerasaartarfiliornernullu
ikiuuttassapput, tamannalu uatsinnut taakkununngalu pingaaruteqarluni.
Jørn
Tækkerip oqaatigaa Kalaallit Nunaanni pisiarineqartut iluanaaruteqarnissamut
tunngassuteqaannanngitsut, inuiaqatigiinnili suliniuteqarnissamut
tunngassuteqartut.
–
Aningaasarsiornikkut Kalaallit Nunaanni iluanaaruteqarnissaq
siunniunneqanngilaq. Inooqataanikkulli atugarliortunut suliassaqartitsinermut
tunngasuuvoq, najukkami inuiaqatigiinnut suliffissaqartitsillunilu
isertitaqartitsisussaq. Tamatuma saniatigut soorunami aamma uanga
pinngortitamiittarnissannut, maanimiullu inuit piniariaqatigisarlugit nunallu
immikkoortuanut nuannaarutiginninnissamut periarfissaqarpunga.
Jørn Tækkerip Tunumi illunik amerlanerusunik
pisinissani maanna pilersaarutiginngilaa.
