Misissuineq iluatsittoq
Canadamiut suliffeqarfiutaata Anortech-ip misissuinerminni naammasseqqammersumi ilaatigut avatangiisinut sunniutinut naliliinissamut paasissutissanik kiisalu misissugassanik 20 tonsinik katersivoq
Canadami ingerlatseqatigiiffiup Anortech-ip misissugassanik katersinertik naammasseqqammerpaat. Misissugassat 20 tonsit Nuummi aserorterneqarsimasut Canadamut nassassavaat.
Assi: Anortech
Anortechip Nuummiit 80 kilometerinik ungasitsigisumi anorthositimik misissuillutik suliaqarfimminni 2024-mi misissuinertik naammassisimallugu nalunaaruteqarput. Tamanna tusagassiutitigut nalunaarummi saqqummiunneqaqqammertumi atuarneqarsinnaavoq.
Suliniuteqarnerup nalaani paasissutissat suliffeqarfiup avatangiisinut sunniutaasinnaasut nalilersornissaannut (VVM) atorneqartussat danskit ingeniørit suliffeqarfiannit WSP-mit suliarineqartut katersorneqarput. Tamatuma saniatigut ingerlatseqatigiiffik anorthositinik misissugassanik 20 tonsinik, kingorna Canadamut assartorneqarnissaminnut poortorneqannginnerminni Nuummi aserorterneqartunik, katersivoq.
Teknologii piujuartitsisoq
Misilerakkat aserorterneqarsimasut suliffeqarfiup aluminiumik oxidimik anorthositimik, bauxitimit sananeqaatigineqartumit piujuartitsinerusumik, tunisassiorneranut iluaqutaassapput. Katersorneqartut ilaat Danmarkimi Teknologisk Institut CO2-mik aniatitsinani cementiliornermik misileraanerani aamma atorneqassapput.
Canadami ingerlatseqatigiiffik Anortech Nuup kangerluani Nuummit 80 kilometerinik ungasitsigisumi anorthositimik piiaavoq.
– Suliniutieqarfipput aqqutigalugu anortosit atorlugu teknologeeqarnerup piujuartitsisumik ineriartortinneqarnissaa siuarsartuassavarput. Misissugassamik katersinerput anorthositiutitsinniit aluminiumik oxidimik tunisassiorsinnaanissamut pingaarutilittut alloriarneruvoq. Tamatuma saniatigut VVM-imut paasissutissanik katersineq iluaqutigalugu piiaanissamut qinnuteqaateqarnissamut pingaarutilimmik alloriaateqarpugut, pisortaq Jim Cambon tusagassiutitigut nalunaarummi oqarpoq.
Anortech sioarnatigut suliffeqarfittut immikkoortortaqarfini Lumina Sustainable Materials (siornatigut Hudson Greenland) aqqutigalugu Qaqortorsuarmi aatsitassarsiornissamut akuersissuteqarsimavoq, siornali piginneqataassutsit 31 procentii tunniuppai. Anortechip anorthositimik piiaanissamut akuersissutip saniatigut aamma Sarfartumi aatsitassanik qaqutigoortunik piiaaffimmi, Neo Performance Materialsimit pigineqartumi, piginneqataassutsit 5 procentii suli pigivai..
