Naak Sulisitsisut qinnuiginnikkaluartut, unnuinermut akitsuut ataatsimiititaliap akuersissutigaa
Nunanit allanit takornariat unnuinermut akitsuuserneqarnissaat Inatsisartuni ataatsimiititaliap tapersersorpaa, immikkulli ittumik aalajangersaasoqarnera pillugu taamaaliornissap pisariaqanngitsumik allaffissorpallaarnermik kinguneqarumaarnissaa Sulisitsisut mianersoqqussutigaat.
Aningaasaqarnermut Akileraartarnermullu Ataatsimiititaliami amerlanerussuteqartut unnuinermut ataatsimut 30 koruuninik akitsuusiisoqarnissaa tapersersorpaat. Nunani allani, ingammik illoqarfinni annerusuni takornariarpassuaqartuni, unnuinermut akitsuutit atorneqartarput.
Assiliisoq: Leiff Josefsen
Takornarissat unnuinermut ataatsimut 30 koruuninik akitsuuserneqarnissaat Inatsisartuni tapersersorneqassasoq ilimanarluinnarpoq, taamaalillunilu 2026-mi januaarip aallaqqaataanit atuutilersinneqassaaq.
Aningaasaqarnermut Akileraartarnermullu Ataatsimiititaliami amerlanerussuteqartut, tassa partiit naalakkersuisoqatigiit Inuit Ataqatigiit aamma Siumut, siunnersuutip aappassaaneerneqarnissaanut marlunngorpat pisussamut akuerineqarnissaa inassutigaat.
Inatsit ukioq manna siusinnerusukkut tusarniaassutigineqarmat akitsuut 20 koruuniusimavoq, siunnersuutilli inaarutaasumik suliarineqarnerani 30 koruuninngorlugu qaffanneqarsimavoq. Innuttaasulli Kalaallit Nunaanni najugaqartut nunami unnuisarfinnik atuigaangamik akitsuummik akiliisariaqassanngitsut, inatsisini immikkut ittumik aalajangersarneqarpoq.
Immikkut aalajangersaaneq tamannarpiaq pissutigalugu Sulisitsisut Aningaasaqarnermut Akileraartarnermullu Ataatsimiititaliamut mianersoqqusipput.
Aaqqiaginngittoqarnissaa mianersoqqussutigigaat
Immikkut aalajangersakkap atuutilersinneqarnissaa allaffissornikkut suliassarpassuaqalernermik nunamilu tamarmi saaffiginnittarfimmi aaqqiaginngittoqartarneranik kinguneqarumaartoq, aamma atuutilersinneqarnissaata ajornakusoorsinnaanissaa, Sulisitsisunit mianersoqqussutigineqarpoq:
- Tamannami nunaqavissunut sumi najugaqarnermut uppernarsaammik piumasaqarnikkut timmisartumut ikilernermi uppernarsaammik takutitsisalertoqassammat. Tassami taanna takutissinnaanngikkaanni, taava unnuisarfiit naapertuuttumik tamaginnut nunaqavissunut aammalu takornarissanut sullissisinnaanngillat, tamatuma unammillernartumik nassataqarnissaa aammalu saaffiginnittarfinni aporaaffiusinnaasunik pilersitsinissaa aarleqqutigaarput, ataatsimiititaliamut Sulisitsisut allapput, nangillutillu:
- Taamaattumillu akitsuut tamanut atuuttariaqartoq inassutigaarput, nunaqavissunut aammalu takornarissanut, tassami nunaqavissut arlallit inuussutissarsiornikkut takornarissatut taaneqarsinnaassammata. Apeqqutaatinnagu suna siunertaralugu tassaniinnersoq, tassami taamaasilluni Kalaallit Nunaannut isernermi tamakkua tamarmik artuukkiissutaasussaammata, taamaattumillu siunnersuutip taannartaa peerneqassasoq isumaqarpugut.
Erik Jensen: Nunami angalasut eqqarsaatigalugit aalajangersimavugut
Sulisitsisut ernumassutaat qanoq isumaqarfigineqarnersoq Ataatsimiititaliap inatsimmik suliaqarnermini Naalakkersuisut aperisimavaat.
Immikkut ittumik aalajangersaanerup kingunerisaanik inuussutissarsiortunut allaffissornikkut artukkiinissamik mianerinninnermit nunap iluani angalasunik mianerinninnissaq Naalakkersuisunit toqqarneqarsimasoq, Aningaasaqarnermut naalakkersuisoq Erik Jensen (S) ataatsimiititaliamut allappoq.
Akitsuut nutaaq 6,3 millionit koruunit missaanni isertitsissasoq naatsorsuutigineqarpoq, taakkulu takornariartitsinerup ineriartortinnissaanut tapersersuinissaq siunertaralugu nunami kommuninut tallimanut agguaanneqartassapput.
