Najukkami inuusuttut angallassisartunngornissaminnut aallarnisaasunit Filippinerineersunit sungiusarneqartut

Umiarsuit takornariartaatit Kalaallit Nunaannut tikerarnerat naammassivoq, nuna tamakkerlugulu umiarsuit takornariartaatit 550 missaanniittut 2024-mi tikimmata ukioq manna rekortiliiffiuvoq, taakkualu siorna rekortiliinermiit amerlanerujussuupput.

Kalaallit Nunaata umiarsuarnit takornariartaatinit tikinneqarnissaminut soqutigineqaraluttuinnarnera nunami takornarialerisunut amerliartuinnartunut periarfissanik nutaanik pilersitsivoq, matumani aallarnisaasunut Ann Marie Cunananimut Kristine Jornadalimullu, marluullutik Filippinerineersuusunut.

Taakku sullissinermi takornarialerinermilu ukiorpassuarni misilittagaqarput, maannalu Kalaallit Nunaanni takornarialerinermi ilippanartoqarnera takusimavaat. Suliffeqarfik Meaningful Ventures Greenland inuusuttunik Nuummeersunik takornarianik angallassisalernissamik sungiusaanermik ukkataqarfiusoq siorna pilersippaat. Tamatuma saniatigut Meaningful Venturesimiit innuttaasut ukioqqortunerit takornarianut kaffillernissaasa aaqqissuunnissaannut ikiuuttarput.

– Umiarsuarnik takornariartaatinik tikittoqaraanga atuisugut Kalaallit Nunaat pillugu allatut takusinnaalernissaanut ikiortarpagut, takornariallu amerliartortillugit nunarput sinnerlugu sassarsinnaasunik pikkorissunik pisariaqartitsivugut, Kristine Jornadal oqarpoq. 

Allatut takunnissinnaalerneq

Ann Marie Cunanan Kristine Jornadalimiit Kalaallit Nuaannut siorna qaaqquneqarnini sioqqullugu Filippinerini takornarialerisuunikuuvoq. Kalaallit Nunaat umiarsuarnut takornariartaatinut tikiffissatut pingaarutilittut inissikkiartortoq taassuma maluginiarpaa.

– Kalaallit Nunaanni takornariaqarneq ukiuni makkunani annertusipiloormat amerlanerusunillu takornarialerisoqalernissaa politikkikkut tapersersorneqarmat tikillunga ikiuukkusunnersunga Kristine aperivoq, Ann Marie Cunanan oqarpoq.

Arlalinnik mittarfissuartaarniartilluta siuarsaanissamut periarfissaqartoq takusinnaavaat, suliffeqarfiannilu Kalaallit Nunaanni takornariat misigisaqarnissaannut ”allatut takunnissinnaalerneq” ukkatarineqarpoq.

– Allatut takunnissinnaavugut. Najugaqartuuguit sorpassuit ulluinnarsiutaapput, avataaneersuullunili Kalaallit Nunaat immikkuullarilluinnarmat apeqquterpassuit najugaqartuniit akineqartussaapput, assersuutigalugu sooq piniarneq pingaaruteqarpa, qanorlu piujuartitsisoqarpa, Ann Marie Cunanan oqarpoq.

Kalaallisuut inuillu oqaluttuaat

Meaningful Venturesip pingaarnertut inuusuttut Nuummi GUX-imi ilinniarnertuunngorniartut sulilersittarpai, takornariallu nuannersumik misigisaqarnissaat kisimi ukkatarineqarnani aamma inuusuttut suliatigut ineriartornissaat ukkatarineqartarpoq.

- Kalaallit oqaluttuaasa ileqquisalu immikkuullarissut ingerlateqqissinnaanissaat pingaaruteqarlunilu inuusuttut takornarialerinermik misiliinissaat aamma pingaaruteqarpoq, Kristine Jornadal oqarpoq.

Aia Jeppson angalassisartut Nuummiittut pikkorissarsimasut ilagaat. Angallassisartut Kalaallit Nunaat pillugu oqaluttuat sorliit takornarianut ingerlateqqissanerlugit aqukkaat naqissuserpaa.

– Uagut Kalaallit Nunaanneersuuvugut, uagullu oqaluttuat sorliit takornarianut oqaluttuarissanerlugit aalajangissavarput. Piniarnermi ileqqugut namminerlu kalaallitut misigisartakkakka oqaluttuarikkajuppakka, Aia Jeppson oqarpoq.

Suliffeqarfik kulturitsinnik misigisassartalimmik kangerlummi umiatsiarnermik neqerooruteqarpoq, tassanilu angallassisartut kalaallisoorlutik Kalaallit Nunaat pillugu oqaluttuat takornarianut oqaluttuarisarpaat.

– Ilumoortunik misigisaqarnissaq pineqarpoq. Kalaallit Nunaanni takornariaqarneq pillugu allatut takunnittaaseqarnissaq kissaatigaarput, Robert Cullen, Meaningful Venturesimi angallassinernut ingerlatsisoq, oqarpoq.

Eqqartuinissaq pisariaqartoq

Meaningful Ventures umiarsuarnik takornariartaatinik takornariartitsinermi nutaajugaluartoq, Ann Marie Cunanan aamma Kristine Jornadal Kalaallit Nunaanni takornariaqarnermut pitsaasumik sunniuteqassallutik neriuuteqarput. Takornariaqarnerup najukkamilu inuunerup oqimaaqatigiiffiata nassaarinissaa pingaaruteqartoq, takornariaqarnerugaluttuinnarnerullu kimulluunniit ajoqutaannginnissaa qulakkeerniarlugu suliffeqarfissuit umiarsuarmik takornariartitsisartut suleqatiginissaat pisariaqartoq Ann Marie Cunananip erseqqissarpaa.

– Assersuutigalugu najukkani aalisartunut piniartunullu ajortumik sunniuteqarnissaa minnerpaaffissaaniitinniarlugu ingerlatseqatigiiffissuit najukkaniittullu suleqatigiinnissaat pisariaqarpoq, taamaammat suut Kalaallit Nunaanni pitsaasuunersut suullu ajortuunersut ingerlatseqatigiiffissuillu eqqartortariaqarpagut, oqarpoq.

Umiarsuarmik takornariartaammik takornariartitsisarneq uparuartorneqartaraluartoq, pitsaasumik ineriartortitsisoqarsinnaanera Ann Mariep takusinnaavaa, ingammik inuiaqatigiinnut inukinnerusunut umiarsuarmut takornariartaammut ilaallutik takornarianik aningaasarsiorfeqarsinnaasunut.

– Takornariaqarpugut, taava qanoq pitsaanerpaamik atussavarput? Tamanna eqqarsaatiginerusariaqarparput, taamatuttaarlu ajortumik sunniuteqarsinnaanera pinaveersaartittariaqarparput.

Ukiuunerani takornariaqarneq inerisarneqassasoq

Kalaallit Nunaanni mittarfissuaqalerniartillugu suliffeqarfik ukiukkut takornaianut USA-meersunut, Canadameersunut Europameersunullu neqeroorutinik nutaanik inerisaalereerpoq.

– Ukiukkut nuannersunik, misigisassarpassuaqarmat ukiuunerani takornariaqarnerup inerisarnissaanut periarfissarpassuaqarpoq, tamannalu takornariaqarnermi puigorneqakkajuppoq, Robert Cullen oqarpoq.

Angallassisartut 15-it Meaningful Venturesimi maannamut angallassisartutut pikkorissareersimalerput. Angallassisartut inuusuttut ilaasa, Kristoffer Hansenip, inuussuttorpassuit takornarialerinermik suliaqarnissaminnik soqutiginninnerat pitsaasutut isigalugu oqaluttuarpoq.

– Takornariat amerlanerusut Kalaallit Nunaat eqqumaffigilermassuk aamma nuannaarutigaara. Kulturerput ileqqugullu oqaluttuarisarpakka, nunarsuummi sinnerani tusarneqarpiarneq ajortut isumaqarpunga. Sumiiffinni ikitsuinnarni puisitortoqartarlunilu ulluinnarni maani suliarisartakkagut suliarineqartarput, oqarpoq.