Royal Arctic Linep umiarsuaataatigut januaarip aallaqqaataanit assartuineq akisunerulissaaq.
Assartuinermut akigititat qanoq qaffanneqarnissaat 2023-mi novembarimi Kalaallit Nunaanni inuussutissarsiortut oqaloqatiginerisigut isumaqatigiissutigineqarpoq, taamaalilluni Namminersorlutik Oqartussat umiarsuaatileqatigiiffiutaata siunissami aningaasaliinissamut sipaarniuteqarsinnaanissaa qulakkeerneqarluni.
Royal Arctic Linep umiarsuaataatigut januaarip aallaqqaataanit assartuineq akisunerulissaaq.
Assartuinermut akigititat qanoq qaffanneqarnissaat 2023-mi novembarimi Kalaallit Nunaanni inuussutissarsiortut oqaloqatiginerisigut isumaqatigiissutigineqarpoq, taamaalilluni Namminersorlutik Oqartussat umiarsuaatileqatigiiffiutaata siunissami aningaasaliinissamut sipaarniuteqarsinnaanissaa qulakkeerneqarluni.
Assartuinermut akigititat allannguutissaannut immikkoortup aappaa 2025-mi januaarip aallaqqaataanit atuutilissaaq, tassani aningaasalersuinissanut takkuttussanut ileqqaagaqarnissap qulakkeernissaanut akigititat 3,1 %-inik qaffanneqassallutik. Tassunga ilanngullugit “assartuinermut akigititat 2,5 %-inik ingerlaavartumik qaffanneqassapput”.
Ilusiliat assigiinngitsut
- Akigititat naleqqussarnissaannut ilusiliat assigiinngitsut Naalakkersuisunut nunatsinnilu inuussutissarsiuteqartunut 2023-mi saqqummiunneqarput. Illuatungeriillu akornanni oqaloqatigiinnerup kingunerisaanik ilusiliaq toqqarneqartoq atorlugu akigititanik naleqqussaanissaq ukiut pingasut ingerlanerini pisussanngorpoq, assartuinermut akigitinneqartut 2024-mi 6,4 %-inik, 2025-mi 3,1 %-inik aamma 2026-mi 2,2 %-inik qaffaasoqartussanngorlugu. Qaffaanerup tamarmiusup ataatsikkoortumik atulersinneqarnissaanut naleqqiullugu akigititanik qaffakkiartuaartitsinissaq sullitanut naleqqunnerussasoq illuatungeriinnit nalilerneqarpoq. Akigititanillu tassanngaannartumik qaffaasoqarnissaa pinngitsoorniarlugu siunissami akigititanik ingerlaavartumik, siullermik 2025-mi, ukiumut 2,5 %-inik qaffaasoqartassasoq peqatigisaanik aalajangiunneqarpoq, John Aage Nielsen, Royal Arctic Linemi tuniniaanermi pisortaq, oqarpoq.
Uuliamut aningaasallu nalinginut tapiliuttakkamut tunngatillugu maannakkorpiaq 10 %-imiinnera atuutiinnassaaq.
Akerlinganilli ETS-imut tapiliuttagaq 1,27 %-init 1,57 %-inut qaffanneqassaaq. Taanna tapiliuttagaq umiarsuarnut Europami umiarsualivinniittunut CO2-mik aniatitsinermut EU-mut akiliutaavoq.
2025-mut ilimagisat
Umiarsuaatileqatigiiffiup 2025-mi ilimagisai pillugit Sermitsiap Royal Arctic Linemi pisortaaneq Niels Clemensen aperaa.
- Kalaallit Nunaannut assartukkat amerlassusaat eqqarsaatigalugit aamma maluginiassavarput mittarfiit nutaat sanaartorneqarnerat naammassingajalersoq, Nuuk International Airport novembarimi 2024-mi tunniunneqarmat kiisalu Nuummi atuarfik nutaaq ukioq manna siusinnerusukkut tunniunneqarmat. Kalaallit Nunaanni sanaartornerit nalinginnaasumik ingerlaannassapput, siornatigornilli annikinnerusumik ingerlassagunarput. Taamaattumik 2025-mi avannamut assartukkat 2024-mut sanilliullugit amerleriarnissaat naatsorsuutiginngilarput, Sikukilli umiarsualiviata allilerneqarnera assartukkanik amerlanerulersitsinissaa naatsorsuutigineqarpoq, Niels Clemensen akivoq.
Kitaata imartaani angalanermi TAC-ip appartinneqarnissaa umiarsuaatileqatigiiffimmut aamma ajortumik sunniuteqassaaq.
- Kitaani raajartassat tamarmiusut ikilisinneqarpata soorunami assartukkatsinnut tamanut ajortumik sunniuteqassaaq, aalisakkanik allanik taarserneqassanngikkunik, Niels Clemensen oqarpoq, naatsorsuutigaali “TAC-p appartinneqarnera aatsaat tamakkiisumik 2026-mi atuutilissasoq, 2024-mi pisassiissutit nungunneqartussaammata 2025-milu pisassiissutit ilanngullugit aalisarneqassammata”.
Umiarsuaatileqatigiiffiup pisortaa isumalluartoq
Marsimi 2024-mi Eimskip suleqatigalugu Atlantikoq ikaarlugu angalanissamut pilersaarut allanngortinneqarpoq maannalu Bremerhavenimut tulattoqartarluni, tamannalu ilaatigut Royal Greenlandip umiarsualivimmit tulattarfimmit ungasinngitsumi Cuxhavenimi suliffissuaqartup kissaatigisimavaa.
- Bremerhavenimit nunatsinnuinnaanngitsoq aammali Islandimut assartukkat ilimagisatsitut amerliartorput. Toqqaannartumik avammut tunisaqarnermut eqqussinermillu periarfissat nutaat pilersinnissaat piffissartornarpoq, piffissalli ingerlanerani tamanna piviusunngussasoq qularinngilara, umiarsuaatileqatigiiffiup pisortaa isumalluarluni oqarpoq.
