New Yorkimiut Nuummi misigisassarsiorusupput

United Airlinesip Nuup New York/Newarkillu akornanni timmisartuussisarnissatik juunip 15-iani aallartissasut septembarillu tungaanut sapaatip akunneranut marloriarlutik timmisartuussisassallutik oktobarimi nalunaarutigaat. 

New Yorkimiit Nuummut timmisartuussinermi ilaasussat siulliit Nuup kangerluanut umiatsiarnissamut inniminniiortorlutik aallartereerput, Nuuk Water Taxi, amerikamiut siumoortumik inniminniinerinik angallassinissanillu ulapputeqartoq, oqaluttuarpoq.

- Amerikamiunit nalinginnaasumik ukiup taamaalinerani noqqaassuteqartartunit amerlanerusunik tigusaqarpugut. Nuanneqaaq, Lasse Kyed, Nuuk Water Taximi nittarsaassinermut tunisassianullu ingerlatsisoq, oqarpoq.

Amerikamiut Nuummiinnerminni misigisassarsiorusupput, ingammik umiatsiarnerit soqutigilluarneqarput.

- Ilaat New Yorkimiit Nuummut siullermeerluni timmisartuussinissamut ilaassallutik assigiinngitsorpassuarnillu misigisaqarusullutik allannikuupput. Arlallit sisamariarlutik, tallimariarlutik arfinileriarlutilluunniit uagutsinnit angallatsikkumallutik allannikuupput – angallassinerit assigiinngitsut. Maaniinnerminni sapinngisaminnik misigisaqarluarniarput, Lasse Kyed oqarpoq.

Amerlasuut misigisassat tamaasa misigerusukkaat

Nuuk Water Taxi Targanik tallimanik umiatsiaqarlunilu, Aviaq Ittutoqaq pigalugulu (maanna Ice Force VIII-mik taaguuteqartoq) Poca-mik umiatsiaaraqarlunilu, Kangiusami tikeraartunut 30-nut inissalimmi atortorissaarlunilu nerisaqarfiusumik tupertarfiuteqarlunilu Qooqquni arlalinnik illuaraateqarami takornarianut assigiinngitsunik misigisassaateqarpoq.

- Ilaatigut kangerlummut iigartartulimmut angallassinissamik neqerooruteqarpugut. Camp Kangiusaq aamma pigaarput, tassani amerikamiut arlallit unnuiniarlutik inniminniisimapput. Aammattaaq arfernik takornarniartoqarsinnaallunilu, Qoornumut Kapisilinnullu umiatsiamik angallatsittoqarsinnaallunilu Kapisilinnut pisuttoqarsinnaavo q, Lasse Kyed oqaluttuarpoq. New Yorkimiut juunimi Nuummukarunik angallanneqarnissaminnik immikkut soqutigisaqartut ilanngullugu eqqaavaa.

- Umiatsiat ilaasussaninnerat takullugu aamma nuannerpoq. Tamanna aningaasaqarnikkut naapertuuppoq, tassami umiatsiat Targat torrassuupput, aammali akisoqaat. Suli akiitsoqarfigigatsigit akilersortussaavagut. Taamaammat arlallit siumungaaq inniminniinerat nuannerluinnarpoq. Aammami ukiukkut suliassaqarpallaanngikkaluarluta aningaasarsisitsisartussaavugut, Lasse Kyed oqarpoq. 

Arfernik takornarniarneq pinngitsoorani takornarfiusartoq

- Ice Force VIII siorna pisaaraarput, umiarsuarput saviminiusoq ilaasunullu 36-nut inissaqartoq. Taanna ilinniaqqaarparput, maannali suut pitsaassutiginerai ilikkarsimalerpagut. Taanna annermik arfernik takornarniarnermut, ullaakkut ualikkullu angallassisarnissamut, atorneqassaaq. Tassa imaappoq ilaasut 72-it ullut tamaasa arfernik takornarniartissinnaassavagut, Lasse Kyed oqarpoq, ilaasullu Nuup kangerluani qipoqqanik pinngitsooratik takusassasut nassuiaatigaa.

- Uagutsinnut ilaagaanni pinngitsoorani arfernik takornartoqarsinnaassaaq. Arfermik takunngikkaanni umiatsiaq inissaninniariartoq akeqanngitsumik ilaaqqittoqarsinnaassaaq. Periuseq taanna siorna aallartipparput, tigulluarneqaqaarlu, oqaluttuarpoq.

Lasse Kyed naapertorlugu juunimiit septembarip tungaanut arfernik takunissaq ilimanaateqarluartarpoq.

Nuuk Water Taxi aasami ulapaassasoq

Nuuk Water Taxi maanna 20-25-it missaannik sulisoqarpoq, takornariaqartilluguli ulapaarfimmi angallassisussanik, umiatsiartussanik ilaasunillu ikiuisussanik amerlanerusunik sulisoqartarpoq.

- Ulapaarfimmi sulisut 50-it missaanniittarpugut. Maannakkut sulisut 18-it missaanniillutalu paarlatsinik ilaqaratta sulisut maanna 20-25-it missaanniipput. Aasakkut marloriaatipajaanngortarpugut, Lasse Kyed oqarpoq.

- Inuit 91-it aasaru Qooqquni neriniartarfimmukarniarlutik inniminneereermata Mads Bek, Qooqquni neriniartarfimmik ingerlatsisuusoq, alliliissasoq neriuutigaarput," Lasse Kyed oqarpoq.