Nunanit allanit aningaasaliinernik misissuinerit, aamma aatsitassanut inatsimmik eqaallisaaneq

Inatsisartut ukiami ataatsimiilerput, aatsitassanullu inuussutissarsiorfimmullu tunngasunik arlalinnik siunnersuuteqartoqarpoq.

Naalakkersuisut ilaatigut nunanit allanit ingerlatseqatigiiffinnut inunnullu, immikkoortoqarfinni suliaqarfigisanilu malussajasutut nalilerneqartuni aningaasaliiniartunut tunngasussamik misissuinissamut inatsimmik siunnersuut saqqummiussimavaat. Siunnersuut ulloq 12. novembarimi siullermeerneqassaaq.

Siammasissoq

Misissuinissamut inatsit, maannakkut oktobarip 13-iata tungaanut tusarniaassutigineqartoq aningaasaliinernik naleqqutinngitsunik peqqusinnginnissamut, itigartitsinissamut utertitsinissamullu Naalakkersuisut toqqammaveqarnissaannik qulakkeerissaaq, aammalu nunarsuarmut siaruarnermut annertusisumut naleqqiullugu isigineqassalluni.

Siunnersuut malillugu nunanit allanit aningaasaliisartunit naammassineqartussatut isumaliutigineqartunut, imaluunniit naammassineqartussavinnut nunanit allanit aningaasaliinernut tamanut inatsit atorneqassaaq. Pineqartoq tassaavoq inunnut suliffinnullu tunngatillugu siamasissumik atugaqarsinnaaffik.

”Inatsisartut inatsisaat malillugu akuliussinnaanermut periarfissat taamaallaat suliffeqarfimmi aningaasaliinernut piviusunut eqquinnginnissaasa qulakkeerneqarnissaat siunertaavoq, tassami allaanerusunik suliniutitigut amerlasuutigut, Kalaallit Nunaanni suliffeqarfimmi piginnittutut piginneqataassutinik pissarsineq apeqqutaatinnagu, Kalaallit Nunaata isumannaatsuunissaanut imaluunniit tamat toqqissisimatinneqarnissaannut navianartorsiortitsineq pisinnaammat”, tusarniaanermut atortussiani allassimavoq.

Immikkoortoqarfiit suliaqarfiillu malussarissut

Immikkoortoqarfinni suliassaqarfinnilu malussarinnerpaatut nalilerneqartuni illersornissamut immikkoortoqarfiup iluani suliffeqarfiit, qarasaasialerinermi isumannaatsuutitsinissamut atuuffiit iluini suliffeqarfiit, imaluunniit paasissutissanik isertuussassatut immikkoortitanik suliaqarnerit taaneqarput. Suliffeqarfiit ”dual-use”-mik (marloqiusatut atugarisartakkanik, aaqq.) atortussianik tunisassiortut, aamma pinngitsuugassaanngitsutut teknologiinik allanik tunisassiorlutik suliffeqarfiit aamma taaneqarlutik. Tamakkulu saniatigut ilaapput pinngitsuugassaanngitsutut attaveqaasersuutit, erngup nukinganik nukissiorfiit, aatsitassarsiornermik immikkoortoqarfik, aamma Namminersorlutik Oqartussanit pigineqartutut ingerlatseqatigiiffiit.

Aaqqissuussiffimmi ilaatitatut aqutsisoqarfikkut pilersitakkut nunanit allanit aningaasaliinernik tamakkuninnga misissuinermik atuuffimmik isumaginnittussaq nutaatut tassaassaaq Inuussutissarsiornermut Naalakkersuisoqarfik. Misissuinermik aaqqiissutip pilersillugulu ingerlannissaanut, kiisalu IT-mi aaqqiissutinut il.il. ukiumut 4 millionit koruunit missaannik siunnersuutip annertuunik aningaasartuutinik nassataqartitsinissaa nalilersuutigineqarpoq.

Sulianik isumaginninnernik eqaallisaanerit

Ukiaanerani ataatsimiinnermi oktobarip 15-iani oqaluuserisassani 23-mik 24-millu siullermeerutitut oqaluuserineqartussanut tunngatillugu taakku aatsitassanik suliassaqarfimmi inatsisaasunik allannguuteqarnermut tunngapput.

Aatsitassanut inatsit, aamma aatsitassarsiorfinnut inatsit ullumikkut suliassat ilaasa Aatsitassanut Aqutsisoqarfimmit, aamma Aatsitassaqarnermut Avatangiisinut Aqutsisoqarfimmit isumagineqartarnissaat pillugit aalajangersakkanik imaqarpoq.

Aalajangersakkat taakku atorunnaarsinneqarnissaat siunnersuutigineqarpoq, taamaalilluni aatsitassanik suliassaqarfimmi sulianik isumaginninnermik allatut aaqqissuussinissat, pitsaanerpaanngorsaanissat eqaallisaanissallu periarfissinneqarsinnaalissammata.

Transparencymit eqqasuut

Siunnersuut ulluni 2.-30. juuli 2025-mi tusarniaassutaavoq, tassungalu atatillugu Transparency International Greenland akissummik nassiussivoq. Tamanut ammasumik tusarniaanertaqarani siunnersuutigisatut inatsimmik allanngortitsinikkut Aatsitassaqarnermut Avatangiisinut Aqutsisoqarfiup ajornanngippat atorunnaarsitsisinnaanera sianigeqquaa.

”Maannakkut imaluunniit siunissami Naalakkersuisunut siulittaasup avatangiisinut aqutsisoqarfimmik atorunnaarsitsinissamik toqqaassappat, ilanngullugu avatangiisinut aqutsisoqarfiup tamatuma kingornatigut pisariaqartitaaneranik allaqqaakkap piviusumik kingunerisassanik isummernissaa tamanna tunngavigalugu ”Transparency International Greenland”-ip amigaatigai.”

Transparency International Greenland malillugu ”avatangiisinut suliassaqarfimmik pingaarnersiuiunnaarnissaq pillugu politikkikkut kissaateqartoqarnera paatsuugassaanngitsumik takuneqarsinnaanngilaq, imaluunniit piffissamut ungasissumut aatsitassarsiornermik imaluunniit aatsitassanik piiaanernut naleqqiullugu avatangiisit sammisarinissaannut aqutsisoqarfeqarunnaarluni aatsitassarsiornermut periusissiami anguniakkat pitsaanerpaamik angusarisinnaaneri paatsuugassaanngitsumik takuneqarsinnaanatik.”

Allatut aaqqissuussinissamut periarfissaq

Sermitsiamut aqutsisoqarfinnik imminerminnik matusinissamut inatsisissatut siunnersuutit nassataqartitsinngitsut Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik erseqqissaavoq, ”taakkuli taamaallaat allatut aaqqissuussinissamut periarfissiipput”.

Saniatigut akuersissutinik il.il. sulianik isumaginninnerup, aamma pinngortitamut avatangiisinullu apeqqutinut tunngasutut sulianik isumaginninnerup akornanni immikkoortitsinissaq pillugu piumasaqaatip attanneqarnera, aammalu pinngortitamut avatangiisinullu pissutsinut tunngasutut aalajangiussinernut naleqqiullugu naammagittaalliorsinnaanerup attanneqarnera naalakkersuisoqarfiup erseqqissarpaa.