Avammut niuerneq ukioq manna aallartilluarsimasoq suli ingerlalluartoq
Aalisakkanik avammut tunisineq ukiup qaammataani siullerni sisamani 698 millionit koruuninik qaffariartoq maannamut kisitsisit takutippaat.
Saattuat avammut tunisat nalingat januaarimiit apriilimut 34,9 procentimik qaffariarsimavoq. Tulaanneqartut 5,3 procentimik amerleriarsimallutillu kiilumut akia 28,1 procentimik qaffassimavoq, Naatsorsueqqissaartarfik ilisimatitsivoq.
Toqqorsivimmit assi: Leiff Josefsen
Aalisakkat tunisassiat avammut tunisat ukioq manna aallartilluarput, taamatullu ingerlaannassasoq Naatsorsueqqissaartarfiup naatsorsuinerani nutaami takuneqarsinnaavoq.
Avammut tunisat pingaarnerit, tassa raajat, saarulliit, qalerallit, saattuat nipisallu suaat, qanoq ingerlanersut Nalunaarusiami takutinneqarpoq.
Nioqqutissanik taakkuninnga avammut niuernerup nalinga januaarimiit apriilimut 2 milliarder koruunit sinnilaarlugit naleqarpoq.
- Siorna piffissamut tassunga sanilliullugu 698 millionit koruuninik, tassa 52,0 procentimik, qaffariaateqarneq pineqarpoq, Naatsorsueqqissaartarfik allappoq, kisitsisillu suli tamakkiisumik naatsorsorneqarsimanngimmata qajassuartumik najoqqutarineqassasut erseqqissarneqarpoq.
Soorlu takussutissiami ataaniittumi takuneqarsinnaasoq, avammut tunisat ukiup aallartinnerani ukiuni arlalinni aatsaat taama annertutigipput.
Takussutissiaq: Naatsorsueqqissaartarfik
Pissuseqatigiiaat tamarmik kiilumut akii qaffakkiartorsimapput. Naatsorsueqqissaartarfik naapertorlugu pissuseqatigiiaat ataatsiakkaat pillugit kisitsisit ima isikkoqarput:
- Raajat avammut tunisat nalingat 2026-mi januaarimiit apriilimut siorna piffissamut tassunga sanilliullugu 32,2 procentimik qaffariarsimavoq. Tamanna 186 million koruuninik qaffariarneruvoq, tulaanneqartullu 18,2 procentimiik qaffallutillu akit 11,9 procentimik qaffassimapput.
- Qalerallit avammut tunisat nalingat 67,0 procentimik qaffariarpoq, tulaanneqartut amerlassusaat 40,6 procentimik qaffallunilu kiilumut akia 18,8 procentimik qaffassimavoq.
- Saarulliit avammut tunisat nalingat 45,7 procentimik qaffariarpoq, tulaanneqartullu amerlassusaat 11,5 procentimik qaffallunilu kiilumut akia 30,6 procentimik qaffassimavoq.
- Saattuat avammut tunisat nalingat 34,9 procentimik qaffariarpoq, tulaanneqartut amerlassusaat 5,3 procentimik qaffallunilu kiilumut akia 28,1 procentimik qaffassimavoq.
