Nunaqarfinni eqqaavilerisut ajornartorsiortut

1.januar aallarnerfigalugu Kommune Kujallermi nunaqarfinni eqqaavilerisut anartarfilerisullu tiimii 8 tiiminiit 4 tiimiinut apparneqassasut siorna ukioq naajartortoq kommunalbestyrelsi aaliangerpoq.

Tamanna Kommune Kujallermi aningaasatigut sipaarniartoqarneranik ilaatigut peqquteqartoq, kommunalbestyrelsimi Teknikkimut Avatangiiseqarnermullu Ataatsimiititaliami siulittaasoq Mouritz Karlsen, Inuit Ataqatigiit, oqarpoq.

Tamanna nunaqarfinni eqqaavilerisunut anartarfilerisunullu atugassarititaasut ilungersunareeqisut suli ajornerulernerannik kinguneqaannarani aammali nunaqarfinni eqqakkanik nakkutilliinermut annertuumik kinguneqarnerlussasoq, Eqalugaarsunni, Saarlumi aamma Qassimiunilu nunaqarfimmi aqutsisuni siulittaasoq Poul Erik Petersen, Siumut, sakkortuumik isornartorsiulluni oqarpoq.

Sipaarniarneq peqqutaasoq

Kommune Kujallermi nunaqarfinni eqqaaliverisutut anartarfilerisutullu sulineq kajuminnartuussappat ullormut 8 tiimit sulisassasut qinigaaffiit siuliini misiliutitut aaliangiunneqarpoq. Kisiannili nunaqarfiit mikinerusut ilaanni suliassat annertussusaannut naleqqiullugu 8 tiimit amallavallaartut paasinarsisimasoq, Mouritz Karlsen aamma Qassiarsummi, Igalikumi Narsarsuarmilu nunaqarfimmi aqutsisuni ilaasortaasoq oqarpoq.

- Assersuutigalugu kujataani nunaqarfiit mikinerpaat ilaanni Saarlumi eqqaavilerisut marluk ullormut 8 tiimit sulisarput, suliassallu annertussusaannut naleqqiullugu tiimit amerlavallaartut paasinarsisimavoq.

- Taamaattumik eqqaavilerisut tiimiisa januarip aallaqqaataa aallarnerfigalugu aaffaannanngortinneqassasut kommunalbestyrelsimiit aaliangiunneqarpoq. Taamaakkaluartoq tamatuma nunaqarfinni mikinerni eqqagassalerinermut sunniuteqarnerlunnissaa naatsorsuutiginngilarput, taanna oqarpoq.

Kommune Kujalleq aningaasatigut ilungersunartumik inissisimavoq, aningaasanillu sipaarniartoqartariaqarnera pissutaalluni nunaqarfinni eqqaavilernermut anartarfilerinermullu aningaasartuutinik apparsaanissaq ilaatigut pisariaqarsimasoq, Mouritz Karlsen erseqqissaavoq.

Nalilersorneqassasoq

Taamatut aaliangernissaq sioqqullugu nunaqarfiit tamarmik tusarniaavigineqarsimasut amerlanerillu paasinnittut, Kommune Kujallermilu aningaasatigut sipaarniarneq qaangiuppat tiiminik ikililerineq naliliiffigineqaqqissasoq, taassuma oqaatigaa.

Kommune Kujalleq nuna tamakkerlugu eqqagassalerinermik ingerlatseqatigiiffimmut ESANI A/S-imut ilaasortaavoq, eqqagassallu illoqarfinni nunaqarfinnilu poortorneqareeraangata suliffeqarfiup umiarsuaanit eqqakkanik assartuummit katersorneqartarput ikuallaavinnullu assartorneqartarlutik.

Ukiarmi Kommune Kujallermi eqqagassalerisut pikkorissartinneqarput.

Akuersaarneqarsinnaanngitsoq

Nunaqarfinni eqqaavilerisut anartarfilerisullu kommunip illuutaannik orsersuineq aputaajaanerlu aamma suliarisaraat Poul Erik Petersen oqarpoq.

Aammali ESANI A/S-ip pilersinneqarnerata kingorna eqqakkanik ikuallaaneq atorunnaarmat eqqakkallu poortoriarlugit sissamut 1 kilometerit missaannik ungasitsigisumut assartorneqartalermata eqqaavilerisut suliaqarnerusalersimasut, taassuma oqaatigaa.

- Taamaattumik nunaqarfimmi eqqaavilerisut anartarfilerisullu tiimiisa affaannanngortinneqarnerat sulinermi atukkat ajornerulerannik kinguneqassaaq aammali taamatut pisoqarnissaa sioqqullugu nunaqarfimmi aqutsisut tusarniaaffigineqanngillat.

- Nammineerlunga sulisut eqqugaasut oqaloqatigiikka taakkulu sapaatip akunneranut 20 tiimit taamaallaat sulisalernissartik akuerinagu 32 tiiminik tunineqarnissartik kissaatigisimagaluarpaat, tamannali tusaaniarneqarsimanngitsoq paasinarsivoq, taanna oqarpoq.

Kommune Kujallermi aningaasanik aqutsisinnaannginneq peqqutaalluni innuttaasut amerlasuut eqqugaasut, tamannalu akuersaarneqarsinnaanngilluinnartoq, Poul Erik Petersen isumaqarpoq.