Nunatsinni atuagaarniarfiit pisoqaanersaat kingullersaallu matuvoq

- Sumimi taava atuagarsisalissaagut? Arnaq 30-it sinnerlugit ukiulik atuagaarniarfimmi Atuagkani Nuup qeqqaniittumi pisisartumut allamut aperivoq.

Pisiniarfiup naggammik ammaneranut atatillugu kaffillertoqarlunilu kaagillertoqarpoq.

Inuit eqimattakkaarlutik oqaloqatigeerujoorput. Ilaat atuagarpaalunnik paarisaqartut allat pisiniarfiup nalaasaarfiani qorsuusumi issiapput.

Dorthep aamma Claus Jordeningip, Atuagkani piginnittut, pisisartutik naggammik sullippaat. Misigissutsit allaagaluartut qungujulaarlutillu saaffigiuminarput.

- Ajuusaarnarlunilu uggornarpoq. Eqqortumik oqassagutta nuukkusunngikkaluarpugut, Claus Jordening oqaluttuarpoq.

Atuagaarniarfik Atuagkat 1966-imi maajip tallimaani Det Grønlandske Forlagimit, kingorna Atuakkiorfimmik taaguuteqalersumit, pilersinneqarpoq. Kalaallit atuakkiaat saqqummertartut amerlingaatsiarnerat taamanikkut tunngavilersuutigineqarpoq.

Bent Elkjær Danielsen atuagaarniatut taamanikkut atorfinitsinneqarpoq, ukiulli marluk atorfeqareerluni soraarpoq. Kingorna Poul Bay atuagaarniatut atorfinitsinneqarami 1983 tikillugu sulivoq.

Inger Hauge 1985-imi atuagaarniat aqutsisuattut atorfinitsinneqarpoq, aappaaguanilu pisiniarfik atuakkiorfimmiit pisiarimmagu Atuagkat Boghandel Namminersornerullutik Oqartussat ingerlatseqatigiiffiutaanni siullersaalluni namminersortumit pigineqalerpoq.

Inger Haugep pisiniarfik uini Steen Amandus, Kontorteknikkimi piginnittuusoq, peqatigalugu ingerlappaa. Suliffeqarfiit taakku marluk kattunneqarmata Atuagkat & Kontorteknik ukioq 2000 tikillugu ingerlavoq.

Atuagkat 1991-imi ukiunik 25-nngortorsiorami ”Issittumi atuagaarniarfiit nunarsuarmi annersaattut” imminut taasinnaalerpoq.

Dorthe aamma Claus Jordening 2005-imi Atuagkani piginnittuulerput. Pisiniarfik taamanikkut Narsarsuarmi illunnguami tungujortumiippoq.

Marluullutik atuakkanik soqutigisaqarluaramik aammalu Inger Steenilu atassuteqarfigilluaramikkit pisiniarfik pisiaraat.

- Taamanikkut atuagaarniarnermi ilinniarsimanngikkuit atuagaarniarfiuteqarsinnaanngilatit. Immikkut akuerisaavugut, Ingerillu ilinniartinniassammatigut qaammatini qulingiluani sulisoraarput. ’Atuagaarniartuiunngilagut’ piffissamili tassani pissutsit malillugit atuagaarniartuunerusinnaanngilagut, Claus Jordening nassuiaavoq.

Uummatip tillernera akuttoqatigiissaanngitsoq

Aappariit peqqissutsimut tunngasut pissutigalugit Danmarkimut nuunnissartik aalajangerpaat. Claus ukiut sisamat matuma siorna tassanngaannartumik uummallulerpoq.

- Unnuit ilaanni uummatinnik unittoorama pinasuartumik napparsimmavimmut unitsinneqarpunga. Sakiara ammarlugu uummatikkut suliaritippunga. Ullumikkut ajunngilanga, ilaannikkulli peqqiilliortarpunga, oqaluttuarpoq.

- Suna tamaat aqussinnaasuugukku peqqissorsuusuugumalu pisiniarfik tuninagulu nuussanngikkaluarpugut. Pisiniarfitsialassuuvoq, sinneqartooruteqartuaannarnikuullunilu, Claus Jordening oqarpoq.

Atuagkani isersimasut atuakkanik meeqqanoortunik atuakkanillu kalaallisoortunik pisoqqanik avatangiiseqarput. Tassa taakku pisiniarfiup atuakkanik ilioraaviini sinneruttut. Ilisiviit takorluukkianik, iganermut najoqqutassianik, inuup inuunerata oqaluttuarisaaneranik meeqqanullu atuakkianik ulikkaaqqasimallutillu pinnguarpassuarnik assigiinngitsunik, allagartarsuarnik Kalaallillu Nunaanni nunat assinginik ulikkaarsimagaluarput.

Suna tunisaanerpaasimanersoq aperiganni akissutaa naallunilu sukkavoq: Atuakkat kalaallisoortut.

Aappariimmi atuakkat kalaallisoortut pillugit ilungersuuteqarsimanngisaannarput. Atuakkiortutoqqanit soorlu Ole Brandtimit, Frederik Nielsenimit Mathias Storchimiillu atuakkiat kalaallisoortut atuakkiortunik nutaanik Niviaq Korneliussen, Sørine Steenholdt minnerunngitsumillu tunisaalluartumik”Qivittuissuit Akornanniinnikuuvunga” Atuagkani tunisaalluartarput.

- Pisiniarfinni atuakkanik kalaallisoortunik tuniniaasuni annersaallutalu kisiartaanikuuvugut, kalaallillu atuarumatuujupput! Claus Jordening oqarpoq.

Namminersorlutik Oqartussat pisiniarfissuaq Nuuk Center kalaallillu naalakkersuisuisa allaffissaat sanaartormatigit Claus Dorthelu Narsarsuarmi pisiniarfimminniit nuannareqisaminniit 2010-mi nuuttariaqarsimapput. Illuaraq tungujortoq isaterneqarpoq. Atuagkat Kamiup illuutaanut utaqqiisaasumik nooriarluni pisiniarfissuarmut Atuagkat Bog & Idé-tut, Danmarkimi atuagaarniarfeqatigiit annersaattut, nuuppoq.

- Ingerlalluarsuataaraluarpoq. Pisiniarfissuarli nipituallaarlunilu ulapaarfiummat manna maqaasivarput, oqarpoq inilu tikkuarlugu.

- Maani ilorrisimaarnissamut qanilaarnissamullu inissaqarpoq, tassami nalaasaartarfeqarmat kikkulluunniit kissartumik kaffisorsinnaallutillu piginnittut pisiniartulluunniit atuakkat inuiaqatigiilluunniit pillugit oqaloqatigisinnaavaat.

Atuagkat Nuuk Centerimiit allamut nuunnissaat 2015-imi aalajangerneqarpoq, tassungalu atatillugu atuagaarniarfeqatigiit Bog & Idé qimassallugu aalajangeramik Atuagkat Boghandel uterfigeqqippaat. Aqqusinersuaq 4-mut nuupput, matunissartillu tikillugu tassaniipput. 

Oqaluttuarisaanermi pisoq tamaanga killeqartoq

Dorthep aamma Claus Jordeningip Atuagkat ukiuni kingullerni tuniniaraluarpaat, aappariillu kaaviiaartitsilluaraluarlutik aammalu pisiniarfik 750.000 koruunilerlugu tuniniaraluarlugu tunisinnaasimanngilaat.

- Soqutiginnittoqaraluarpoq, assigiinngitsunilli pissuteqartumik iluatsissinnaasimanngilaq. Soorunami uggornarpoq, atuakkallu kalaallisoortut tuniniarneqaleqqinniassammata arlaat atuagaarniarfimmik ammaasinnaasoq neriuutigingaarparput, Claus Jordening oqarpoq.