Nutaamik suliniuteqarnikkut Issittumi umiarsuarnik angallanneq mingutsitsiffiunnginnerulissasoq

Umiarsuarnik mingutsitsinnginnerusunik pilersitsinikkut, aalisariutini tappiorannartunik sorujuiaasarnikkut, putsumik silaannarmut aniatitsinnginnermi ikuallassaammik atuiunnaariartornikkut, aalisariutinullu minnerusunut nunamit innaallagialersuisarnissamik neqerooruteqarnikkut, suliniutit sisamat taakku aalajangersimasut, umiarsuakkut angallannermi paamik aniatitsinikkut peqqissutsimut silallu pissusianut ajoqutaasunik mingutsitsinermut minnerulersitsissapput. 

Suliniutit taakkua Danmarkimi avatangiisinik illersuiniaqatigiiffiup Green Global Futurep suliniummi ataqatigiissaarisutut suliniummi nutaami annertuumi, Kalaallit Nunaanni, Canadami Islandimilu ingerlanneqartussami, suliniutigisassarai.

Paamit mingutsitsinerit akornutaasut 

Umiarsuit angallanneranneersoq paaq – black carbon-imik aamma taaneqartartoq – Issittumi sermip aakkiartorneranut ullutsinni pissutaanerpaavoq, tamaani silap pissusiata allanngoriartornera nunarsuup sinneranut naleqqiullugu sukkanerujussuuvoq. Tappiorannartut paameersut sermimut tukkaangata, sermip qaava taarnerulersarpoq seqernullu qinngorneranik tigooraanerulersarluni. Taamaalillunilu kiannerulersarluni aatsitsisarlunilu. Soorlu seqinneraangat qarmagaq qernertoq qarmakkamit qaqortumit kissarnerujussuusartoq.

– Issittumi silap pissusiata allanngoriartornera aarlerinartoq allanngortinneqarsinnaanngitsorlu pinngitsoortinniarlugu, sermeq paaqanngitsoq pisariaqarluinnarpoq. Silap pissusiata allanngoriartornera Issittumi innuttaasunut uatsinnullu sunniuteqarpoq, ilaatigut immap qaffakkiartorneranik, soorlu aamma sarfarsuup kissartup sanngiilliartorneranik kinguneqarsinnaasoq, Greenland Global Futuremi siunnersorti Kåre Press-Kristensen oqarpoq, taannalu ukiuni kingullerni qulini Naalagaaffiit Peqatigiit imarsiornermut suliniaqatigiiffiani IMO-mi umiarsuarnik mingutsitsinnginnerusunik angalatitsisarnissamik suliniuteqarsimavoq.

Anguniakkat ilaannut akisussaaffeqartoq

Kåre Press-Kristensen umiarsuit angallanneranni mingutsitsinnginnerunissaq pillugu atuagassiarpassuarnut allakkaminik saqqummersitsisarsimavoq, aamma Nunatsinni, Islandimi nunanilu allarpassuarni silaannaap pitsaassusianik uuttortaasarsimalluni.

- Kalaallit Nunaanni, Islandimi Canadamilu suliniummi ataqatigiissaarisutut siuttuunissannut qilanaarpunga, taamaalilluta umiarsuarnik angallannermi paamik mingutsitsineq sukkasuumik annikillisarsinnaassagatsigu, tamannalu peqatigalugu Naalagaaffiit Peqatigiit imarsiornermut kattuffiani nunarsuaq tamakkerlugu malittarisassaliornissaq sulissutigiuarsinnaassagatsigu, Kåre Press-Kristensen oqarpoq.

Suliniut: ”Umiarsuit Issittumi paamik mingutsitsinerannik annikillisaaneq” Clean Air Fundimit 760.500 euronik (5,7 mio. kronit missaat) tapiiffigineqartoq 2025-mit 27-mut piviusunngortinneqassaaq. 

Green Global Future suliniutip immikkoortuinut sisamanut ukununnga akisussaasuuvoq: Umiarsuarnik mingutsitsinnginnerusunik pilersitsinissanut, aalisariutini tappiorannartunik sorujuiaasarnikkut, putsumik silaannarmut aniatitsinnginnermi ikuallassaammik atuiunnaariartornikkut, aalisariutinullu minnerusunut nunamit innaallagialersuisarnissamik neqerooruteqarnikkut. Tamanna Islandimiittoq INCA aamma Canadamiittoq Equal Routes qanimut suleqatigalugit pissaaq.