Nuummi elektronikkeerniarfik nutaaq ammarneqarpoq
Brugsenip elektronikkeerniarfik Power suleqatigalugu pisiniarfik Powered by Brugseni tallimanngornermi ammassavaa.
Pisiniarfimmik nutaamik, elektronikkinik iggavimmilu atortorissaarutissanik tuniniaanermik immikkut sammisaqarfiusumik, Kalaallit Nunaanni Brugseni tallimanngornermi atoqqaarfissiuissaaq.
Assiliisoq: Brugseni
Nuummi pisiniarfik nutaaq, elektronikkinik iggavimmilu atortorissaarutissanik tuniniaanermik immikkut ittumik suliaqartoq, tallimanngormat ullaakkut Brugsenip atoqqaarfissiorpaa.
Pisiniarfik taanna Powered by Brugseni-mik taaguuteqarpoq, Pandora Hobbyllu sumiiffikuaniippoq.
Danmarkimi elektronikkeerniarfik Power suleqatigalugu Brugsenip niuertarfik nutaaq pilersippaa.
Power pingaarnertut pisiortorfiussasoq, tusagassiuutinut nalunaarummi Brugseni ilisimatitsivoq.
Pisiniarfik nutaaq tulluusimaarutigineqartoq, Brugsenimi siulersuisuni siulittaasoq Avijâja Rosing-Olsen oqarpoq:
- Pisiniarfimmik nutaaliaasumik Nuup qeqqani kiisami maanna ammaasinnaanngoratta kiisalu ilaasortavut pisiniartartullu elektronikkimut angerlarsimaffimmilu
atortunut tunngatillugu pitsaanerungaartunik neqerooruteqarfigisinnaanngoratsigit tulluusimaarutigalugulu nuannaarutigaarput. Sivisuumik tamanna kissaatigalugulu anguniagarisimavarput, maannalu kiisami piviusunngorpoq, siulersuisuni siulittaasoq oqarpoq
Siulersuisuni siulittaasoq naapertorlugu Powerimik suleqateqarnikkut elektronikkinik atortorissaarutinillu tuniniaanermi ukiorpassuarni misilittakkat ilisimasallu Brugsenip atorsinnaalerpai.
