Nuussuarmi uuliakoornerup aalisarneq eqqornerlukkaa 

Upernaviup avannani nunaqarfimmi Nuussuarmi, Nukissiorfiit elværkiata tankillu uuliaasiviup akornanniittoq uuliamut aqqutissiaq suliffeqarfiup sanaartugassanik suliaqartinneqartup sisamanngornermi juulip 17-ianni ajutoornikkut ajoquseraa, Nukissiorfiit paasissutissiipput.

Dieseli 8.000 literit missaanniittoq Kalaallit Nunaanni Politiit paasissutissiinerat naapertorlugu sissamut kuussimavoq.

Nuussuaq aalisartoqarfiuvoq, uuliakoornerlu ima annertutigaaq nunaqarfimmi Arctic Fish Greenland A/S-ip aalisakkanut suliffissuaataa ulluni marlunni piffissami 21-22. juli matoqqasariaqarsimalluni.

- Tamannalu aalisakkanik tunisassiornermut eqquinerluinnarani nunaqarfimmi aalisartut aningaasarsiornerannut aamma kalluaavoq, Arctic Fish Greenlandip pisortaa Frederik Olsen oqarpoq.

Piaartumik iliuuseqartoqartoq

Uuliakoornerup mingutsitsinerata minnerpaaffissaminiitinneqarnissaa qulakkeerniarlugu suliniutit assigiinngitsut Nukissiorfiit paasissutissiinerat naapertorlugu ingerlanneqarput. Tassungalu atatillugu Upernavimmiit upalungaarsimatitat nunaqarfimmukartinneqarput, sapusersuillutillu puttasunik assiaqusersuillutik uuliamik katersuipput. Upalungaarsimatitat suliffeqarfiup nunaqarfimmi suliaqartinneqartup sioqqanik uuliamik mingutsinneqarsimasunik piiaaneranni, uuliallu imaanut kuunnginnissaa qulakkeerinninniarlutik suliaqarnerat ikiuupput. Sillimaniarneq eqqarsaatigalugu elværkip tankillu uuliaasiviit akornanni arlariinnik uuliamut aqqutissianik sullulinnik ikkussisoqartoq, uuliamillu pilersuineq pissusissamisut ingerlaqqilersimasoq Nukissiorfiit aamma paasissutissiipput.

Unammillernartoqartoq

Ullormi ajutoorfiusumi uulia imaanut kuuttoq annikitsuinnaasoq Uummannami sillimaniarnermut pisortap Bjarne Markussenip oqarnera naapertorlugu isumaqartoqarsimagaluarpoq.

- Uuliamik immamut suli kuuttoqartoq kingornatigut paasivarput. Uulia taanna sissami nunap iluanut kuussimavoq, ulittarneranilu imaanut siaruaattarsimalluni. Taamaattumik suliffeqarfik pineqartoq nuna taanna assallugulu uulia tassaniittoq piiassagaat piumaffigaara, oqarpoq.

Upernavimmi qatserisartut arlallit uuliakoortumik siaruatsaaliussallutik Nuussuarmukartinneqarput, atortunilli assartuiniarneq unammillernartoqarsimasoq Bjarne Markussenip oqaatigaa.

- Imarlunnera peqqutaalluni upalungaarsimanermut atortunik Upernavimmiit Nuussuarmut assartuinissaq ajornarsimavoq, kisiannili qulimiguulik atorlugu Air Greenland atortunik assartuivoq.

- Ajornartorsiut qanorpiaq annertutiginersoq ilisimanngilarput, kisianni aaqqiiviginiarlugu Nukissiorfiit qanimut suleqatigalugit sapinngisarput tamaat sulivugut, oqarpoq.

Suliffeqarfik Nuussuarmi suliaqartinneqartoq Aasianni Ilulissanilu immikkoortortaqarfeqarpoq, tassanilu sulisut Ilulissani upalungaarsimanermut atortunik aallersinnarlutik Nuussuarmukassasut, Bjarne Markussen oqarpoq. Upalungaarsimanermi atortut piaartumik Nuussuarmut apuunneqarnissaat qulakkeerniarlugu suluusalimmik Upernavimmut nassiunneqassasut, tassanngaanniillu Nuussuarmut apuunneqassasut, taassuma oqaatigaa.

Matusariaqartoq

Arctic Fish Greenland, Royal Greenlandimit aalisartuniillu pigineqartoq, Kullorsuarmi Nuussuarmilu aalisakkanut suliffissuaateqarpoq. Nuussuarmi uuliakoorneq ima annertutigaaq, aalisakkerivik nunaqarfimmi inuussutissarsiornermut pingaaruteqarluinnartoq, suliffeqarfiup pisortaata Frederik Olsenip oqarnera naapertorlugu, ulluni marlunni matoqqasariaqarsimalluni. 23. juli aalisakkerivik  ammaqqissasoq Arctic Fish Greenland paasissutissiivoq.

Upalungaarsimanerlu pillugu sulineq amigartoq akuersaarneqarsinnaanngitsorlu taanna isumaqarpoq.

- Ullormi uuliakoorfiusumi upalungaarsimaneq uuliamillu siammatsaaliuineq naammaginanngilluinnartumik amigartumillu ingerlanneqarpoq. Isumaqartoqarsimavoq ajornartorsiut aaqqinneqartoq, kingornali uulia annertoorujussuaq imaanut siaruaattoq paasinarsivoq, oqarpoq.

Imaq annertuumik mingutsinneqaannarani tipilerujussuusoq, Frederik Olsen oqarpoq.

- Aalisakkerivik sissamiippoq, imarlu annertoorujussuarmik uuliakoorfiusimammat tipeqaqalunilu qaleralinnik tunisineq aalisakkanillu tunisassiorneq ulluni marlunni unitsittariaqarsimavarput. Upalungaarsimasullu iliuuseqanngippata ammaqqissinnaanngilagut. 

- Tamanna aalisakkanut suliffissuarmut eqquiinnarani aalisartunut soorunami annaasaqaataassaaq, oqarpoq. 

Umiatsiaaqqat aalisarnermut atorneqartartut naqqi uuliamik mingutsinneqarsimasut, allaallu sissami puisinik pilattoqarsinnaajunnaarsimasoq nunaqarfimmi aalisartut oqaatigaat.