Silaannaap allanngoriartorneranik malitseqartumik sumiiffinni
assigiinngitsuni piniarnermik inuussutissarsiuteqartut piffissami sivitsortumi
aningaasatigut isertitaqanngillat.
Maannakkumullu aningaasatigut immikkut
ikiorserneqarnissamik qinnuteqaatit 100-t missaanniittut Namminersorlutik
Oqartussani Aalisarnermut Piniarnermullu Naalakkersuisoqarfimmut
tunniunneqarsimasut suliarineqarput.
Silaannaap allanngoriartorneranik malitseqartumik sumiiffinni
assigiinngitsuni piniarnermik inuussutissarsiuteqartut piffissami sivitsortumi
aningaasatigut isertitaqanngillat.
Maannakkumullu aningaasatigut immikkut
ikiorserneqarnissamik qinnuteqaatit 100-t missaanniittut Namminersorlutik
Oqartussani Aalisarnermut Piniarnermullu Naalakkersuisoqarfimmut
tunniunneqarsimasut suliarineqarput.
Qinnuteqaatillu suli allat Upernavimmiit,
Maniitsumiit Tunumiillu aamma takkussuupput. Sapaatit akunneri marluk pingasullu
missaanni qaangiuppata qinnuteqartut akissutisiumaartut, Aalisarnermut
immikkoortortaqarfimmiit paasissutissiissutigineqarpoq.
Qinnuteqaatilli sivisuallaarujussuarmik suliarineqartarneri
akuersaarneqarsinnaanngitsoq, Inatsisartunut ilaasortaq Jens Napaattooq,
Naleraq, isornartorsiulluni oqarpoq.
Qinnuteqqaatit amerliartortut
Aalisarnermut Piniarnermullu Naalakkersuisoqarfimmi Aalisarnermut
immikkoortortaqarfimmi pisortaq Katrine Kærgård naapertorlugu, qinnuteqaatit
tamaasa ataasiakkaarlugit maannakkut nalilersorneqarput.
- Qinnuteqaatit tamaasa immikkut ataasiakkaarlugit
maanna misissorneqarput, taakkulu Inuussutissarsiutigalugu aalisartut,
inuussutissarsiutigalugu piniartut inuussutissarsiutigalugulu nunalerinermik
ingerlataqartut aallarteqqinnissamut tapiiffigineqartarnerat pillugu
inatsisartut inatsissaannut nutaamut naammassinnissimanersut
naliliiffigineqassapput.
- Tamatuma kingorna kikkut tapiissutinik
pisinnaanersut Naalakkersuisunut innersuussuteqassaagut. Qinnuteqartuni kikkut
tapiiffigineqarsinnaanersut Naalakkersuisut aalajangissavaat, aningaasallu
qinnuteqartunut tunniunneqarnissaannut Naalakkersuisut uagutsinnut
pisinnaatitsissummik tunniussaqariarpata, tapissutit
agguuaanneqarsinnaalissapput, taanna oqarpoq.
Ukiup taamaalineriani aningaasanik tapiiffigineqarnissamik
qinnuteqaatit takkussuuttarneri naliginnaasuusoq, taamaattorli ukioq manna
ukiut siuliinut naleqqiullugu qinnuteqaatit amerlanerusut, Katrine Kærgård
oqarpoq.
Inuussutissarsiutigalugu aalisartunut aallarteqqinnissamut
tapissuteqartarnermut inatsimmut allannguutissatut siunnersuut, Inatsisartut
ukiaanerani ataatsimiinneranni suliarineqarpoq, inatsillu ukiortaamiit
atuutilersoq naapertorlugu ataasiaannarluni tapiissutit minnerpaamik 2.000 koruuniupput,
annerpaamillu tapiissutit 25.000 koruuniniit 50.000 koruuninut qaffanneqarput.
Meerartallit ajornartorsiortut
Nuussuarmi aalisartoq piniartorlu Aron Aronsen naapertorlugu,
Upernaviup eqqaani piniarnermik aalisarnermillu inuussutissarsiuteqartut oktoberimili
maannamut isertitaqanngingajassimapput, tamannalu ukiarmi qilalukkat takkusimaarsimannginnerannik
sikuusarneratalu kinguariartorneranik annerusumik pissuteqartoq oqaatigaa.
- Umiatsiaararsortut ilarpassui oktoberimiit maannamut
isertitaqanngillat, taamaammat ilaqutariit piniartukkormiut aalisartukkormiullu,
annermillu meerartallit, inuuniarnikkut annertuumik eqqugaaqqapput, allaallumi
ilai kallerup inneranut qamitaanissamut aallerisaarutinik tigusaqareerput,
taanna oqarpoq.
Nuussuarmi piniartumut ataatsimut aningaasat ikiorsiissutit
10.000 koruunit novemberimi Namminersorlutik Oqartussanut qinnuteqaatigineqarput,
inunnilli isumaginnittoqarfimmut ikiorserneqarnissarput taamaallaat innersuussutigineqarsimasoq,
taanna oqarpoq.
Sivisuumik isertitaqanngitsut
Royal Greenland Tasiilami aalisakkanut suliffissualiorpoq pilersaarutillu
naapertorlugit aprilimi piareernissaa naatsorsuutigineqarpoq. Sanaartornerup
ingerlanerani tunitsiviugallartoq julimiit novemberimut ammavoq, tunisalli ikittuinnaasimasut
aalisakkerivissap pisortaa Frede Kilime oqarpoq. Taamaattumik Tasiilami
eqqaanilu piniartut aalisartullu sivisuumik isertitaqarsimanngitsut, Tasiilami
aalisartoq piniartorlu Aron Kristiansen aamma oqarpoq.
- Ukiarmi novemberimi sakkortuumik piterareernerata
kingorna aalisakkat tammakarput sikorsuillu takkummata sivisuumik piniarfiusinnaasimanngilaq,
taamaammat umiatsiaararsortut amerlasuut oktoberip qiteqqunneraniilli
killeqaqisumik isertitaqarsimapput, taanna oqarpoq.
Tasiilami qimusseq piniarnermut aalisarnermullu suli
atugaavoq, piffissamilu matumani qimmimut nerukkaatissat neqit annertuumik
amigaataalersimasut, Aron Kristiansen erseqqissaavoq.
Napaattooq puffassimaartoq
Aalisarnermik piniarnermillu inuussutissarsiuteqartut aningaasatigut
ikiorserneqarnissamik qinnuteqaataasa taama sivisutigisumik suliarineqarneri akuersaarneqarsinnaanngitsoq,
Inatsisartunut ilaasortaq, Jens Napaattooq, Naleraq, oqarpoq.
- Piniartukkormiut inuuniarnikkut qanoq
ilungersunartigisumik inissisimasut Naalakkersuisut ilisimavaat,
taamaakkaluartoq qinnuteqartut ilai qaammatini pingasuni utaqqisinneqarput,
tamannalu akuersaarneqarsinnaanngilluinnarpoq, taanna oqarpoq.
Qilalukkanik qernertanik qaqortanillu pisassiissutit
annertuumik ikilisinneqarsimanerat sumiiffiit ilaanni piniartukkormiut
aningaasaqarnerannut annertuumik killiliisimasoq, taanna isumaqarpoq.
