Pisortaq ingerlaannaq atuutilersumik soraarsinneqarpoq

Aalborgimi Kalaallit Illuutaanni pisortaq Anna Lynge sisamanngornermi ingerlaannaq atuutilersumik soraarsitaavoq – maannalu soraareerpoq.

Taama siulersuisuni siulittaasoq Jørgen Hein Sermitsiaq.AG-mut oqarpoq.

Jørgen Hein pisortaagallartussatut toqqarneqarpoq, siulittaasullu tullia Kaj Heilmann naalakkersuisunit toqqagaasoq siulittaasuugallartussatut toqqarneqarpoq.

- Soraarsitsinissaq sivisuumik suliarineqarpoq, Jørgen Hein oqaluttuarpoq.

- Illumi avatangiisit pissutigalugit Sullivinnik Nakkutilliisoqarfimmit peqquneqarpugut – ajornartorsiutillu tamakku maannamut pisortaasimasoq aqutsisuutillugu aaqqinneqarsinnaanngitsut siulersuisuni naliliivugut. Ullut arlallit atorlugit siulersuisut katersorpavut, taakkunanngalu ilaasortat ilaat pingasut Kalaallit Nunaanneersuupput – pingasunngornermilu unnukkut ataatsimiippugut aalajangiillutalu.

Sakkortuumik oqalunneq sioorasaarinerlu

Aviisi Nordjyske naapertorlugu Sullivinnik Nakkutilliisoqarfiup nalunaarusiaani Anna Lynge pisortatut tatineqartutut sillimaannaavittutullu allaatigineqarpoq. Sakkortuumik oqalunnerup saniatigut sulisut naapertorlugit soraarsitaanissamik suliassatigullu tatineqarnissamik sioorasaarneqartarput. Aaqqissuussaaneq pingaarnersiuinermullu ikiorsiineq amigaataasut misigisimasoqarpoq, tamatumalu kingunerisaanik sulisut suliassanik amerlavallaartunik pisariunerusunillu kisermaassisarput.

- Maannakkut iluarsiiviginnissaagut, naatsorsuutigaaralu pisortatut atorfimmut allagarsiussassaq nutserneqareerpat ataasinngorpat Danmarkimi Kalaallillu Nunaannilu inuttassarsiuunneqassasoq – neriuppungalu aatsaat ukiumi nutaami pisortamik nutaamik atorfinitsitsisinnaassasugut.

- Suliffeqarfimmi eqqissisitsinissaq pillugu maannakkut suliassarujussuaq tigusussanngorpara. Maannakkut suliffikkuminarsaannissaq sulissutigisariaqarparput, tamannami illumi suliassarpassuarnik naammassinnissinnaanissamut pingaaruteqarpoq, pisortaagallartoq oqarpoq.

Anna Lynge oqaaseqarusunngilaq, siulersuisunili siulittaasumut innersuussilluni Nordjyskemut SMS-ikkut ilisimatitsivoq.

Aalborgimi Kalaallit Illuutaanni maannakkut aqqanillit pisortaagallartorlu ataaseq sulisorineqarput.