Pisortaq ingerlaannaq atuutilersumik suliunnaarpoq
Nuup Bussiini pisortaq tunuartoq, siulersuisunut siulittaasup oqaatigaa.
Nuup Bussii ingerlatseqatigiiffiuvoq kommunimit pigineqartoq, Nuummilu bussinik ingerlatsisoq.
Toqqorsivimmit assiliartaq: Leiff Josefsen
Nuup Bussii A/S ingerlatseqatigiiffiullu pisortaa Mogens Nathansen illuatungeriillutik suliunnaarnissamik isumaqatigiissuteqarput, Mogens Nathansenilu ingerlaannaq atuutilersumit atorfiminit tunuarpoq.
Taama Nuup Bussiini siulittaasoq Christine Tønnesen, siulersuisut sinnerlugit tusagassiuutinut nalunaarummi ilisimatitsivoq.
Ataavartumik aaqqiissutissamik nassaartoqarnissaata tungaanut, Carsten Olsen Nuup Bussii A/S-imut ulluinnarni ingerlatsinermi ikiortaassasoq ilanngullugu allappoq.
- Carsten Olsenip ilaatigut ingerlatseqatigiiffiup pisortamik nutaamik nassaarnissaanik siulersuisunut ikiuunnissaq suliassaraa, suliassarlu taanna siunissami qaninnerpaamik aallartinneqassasoq, Christine Tønnesen allappoq.
Illuatungeriit suliami oqaaseqaqqinnginnissaq kissaatigaat.
Nuup Bussii Kommuneqarfik Sermersuumit pigineqarput, ingerlatseqatigiiffillu illoqarfiit pingaarnersaanni bussinik ingerlatsivoq.
