PNNP-mik
aalisariuseqarnermi
unammillernartut
Pisassiissutinik niuerutigineqarsinnaasunik
nammineq
pigisanik aalisarneq paggatassiilluni
aalisarnermiit pitsaanerugaluartoq unammillernartut
arlaqartut aallaqqaataaniillu eqqumaffigisassaasut
aalisartoq Qeqertameersoq PNNP malillugu
aalisalersimasoq oqarpoq
Hans Henrik Broberg, Qeqertami, Ilulissat avannaaniittumi, aalisartoq naapertorlugu PNNP naapertorlugu aalisarnermi pisassiissutit nammineq pigisat tamakkersimagaanni aalisartuniit allaniit aalisakkerinermulluunniit ingerlatseqatigiiffinniit pisassiissutinik pisinissaq eqqumaffigineqaannaavittussaammat aningaasaqarnikkut annertuumik akisussaassuseqartoqartariaqartoq isumaqarpoq.
Assi: Nammineq pigisaq
Royal Greenland, nunatsinni 37-nik aalisakkeriveqartoq, qaleralinnillu tunisisarnermi niuerfiup 60 procentianik tigumminnittuusoq, aalisartunut aalisarnermut atortunik, umiatsiaaqqanik motoorinillu nutaanik piserusuttunut atukkiinissamut akiitsugassarsinissamullu periarfissaqarpoq.
Taamaaliornikkut aalisartoq pineqartoq taarsersuinerup nalaani ingerlatseqatigiiffimmut tunisisarnissaminut piumasaqarfigineqartarpoq. Periuseq taanna tunisassiassanik pilersuinermik aalisakkerivinnilu tunisassiornermik kiisalu atukkat taarsersornerannik qulakkeerinninneruvoq.
Aalisartut ilaat Royal Greenlandimi atornissamik periarfissamik atuisimasoq tassaavoq Hans Henrik Broberg, Qeqertami Ilulissat avannaaniittumik aalisartuusoq.
Tulaassorneqartut annertuut
Hans Henrik Broberg aalisariummik Poca 770-imik aalisarnermut atortulimmik pisissalluni Royal Greenlandimi aalisarnermut siunnersortiniit siunnersorneqarpoq, tassungalu ilanngullugu Pisassiissutinik Niuerutigineqarsinnaasunik Nammineq Pigisanik, PNNP-nik 15 tonsinik kilomut 13,50 koruuninik akilinnik Royal Greenlandimiit pisivoq.
Pisassiissutit pigisani tamakkerlugit aalisarsimalerunigit pisassiissutinik allanik, pisiarisassaminik tunisisarnikkulluunniit akilersugassaminik, pissarsinissaminut ingerlatseqatigiiffimmiit ikiorneqassaaq, piffissallu ingerlanerani pisassiissutit pigisani annertusingaatsiarsimavai.
– Qalerallit tulaattakkakka maanna aalisarfimmi pissutsit apeqqutaatillugit ukiumut 70-iniit 80 tonsit missaanniipput. Ukioq manna aallartimmat 60 tonsit missaanniitunik PNNP-qarpunga, juulillu naajartornerani 30 tons pallillugit tunisisimallunga, taamaammat ukiup ingerlanerani pisassiissutinik piseqqissallunga naatsorsuutigaara, taanna oqarpoq.
Hans Henrik umiatsiaaraq 6 meterit missaannik takissusilik atorlugu siornatigut aalisartarsimavoq, paggatassiissutiniillu PNNP-nut nuunnermi unammillernartoqarsinnaanera malugisimavaa.
Aningaasaqarnikkut akisussaassuseqarneq
PNNP naapertorlugu aalisarneq suliarujussuuvoq.
– Pisassiissutit tamakkersimagaanni aalisaannarumalluni 300.000 koruuninik akiliilluni pisassiissutiseqqittoqartariaqalersinnaavoq. Taamaammat PNNP naapertorlugu aalisarnermi aningaasaqarnikkut akisussaassuseqangaatsiartariaqarpoq, Hans Henrik Broberg, aqutsivimmi 47-mi qaleralinniarnermi 20-niit 30 tonsinut PNNP-qaraanni imminut akilersinnaasumik aalisarneq ajornakusuulersinnaasoq isumaqartoq, oqarpoq.
Unammillernartut
Aalisartut PNNP naapertorlugu aalisalernissaminnik kissaateqarunik, siornatigullu aqutsivimmi 47-mi paggatassiilluni aalisarsimanngikkunik, pisassiissusiisarfik aqqutigalugu pisassiissutinik pisissapput, tamannalu Hans Henrik Broberg naapertorlugu unammillernangaatsiarsinnaavoq.
– Inuusuttunut pisassiissutisinissaminnut aningaasassaqanngitsunut PNNP naapertorlugu aalisalersinnaaneq ajornakusuungaatsialersinnaavoq, taamaammallu arlallit paggatassiissutinik suli aalisassasut ilimagaara.
– Umiatsiaararsorluni aalisartup PNNP naapertorlugu aalisartup, pisassiissutini tuniniarniarlugit aalajangeruni paggatassiissutinik aalisarnermut nuussinnaassanngilaq, taamaammallu aalisartoq qaleralinniarunnaartariaqarpoq. Aalisarnermut inatsisitaami tamanna siunertaanngitsoq neriuutigaara, taanna oqarpoq.
Hans Henrik Brobergip aalisariutini Poca 770 juulimi tamakkiisumik akilerpaa, unammillernartorpassuaqartorli isumaqaraluarluni Royal Greenlandimiit PNNP naapertorlugu aalisarnermik periarfissinnieqarnini qujamasuutigaa.
