Polar Seafood millioninik marlunnik kisitsisitalinnik sinneqartooruteqarpoq

2023-mi kalaallit aalisartui unammilligassaqarsimapput, ingammik saarulliit aamma raajat uusut qalipaajakkallu akii appariartorsimammata. Tamanna Polar Seafood Greenlandip ukiumoortumik angusaanut ajortumik sunniuteqarpoq, ukiup siulianut sanilliullugu 85 mio. kr.-it missaannik ajornerullutik. Ukiumut naatsorsuusiorfiusumut siulianut sanilliullugit Royal Greenlandip ukiumoortumik angusai 400 mio. kr.-ingajannik ajorseriarsimapput.

Nukissiutinut akit qaffakkiartornerat ingammillu kilisaatip Polar Nataarnap aporneri, Polar Seafood Greenlandip ukiumoortumik angusaanut sunniuteqangaatsiarput. Apornerit kisimik ingerlatseqatigiiffimmut „millioninik marlunnik kisitsisitalinnik“ naleqartut ilisimatitsissutigineqarpoq.

Angusat pitsaanerulernissaat naatsorsuutaasoq

- Ukioq manna angusat naammagisimaarpavut, Polar Nataarnap kilisaammik iluliarsuarmillu apuineranut malittaammata. Tamatuma saniatigut pilersaarutit malillugit aalisariutit amerlanersaat aserfallatsaaliorneqarput. Taamaattumik 2024-mi angusat pitsaanerulerumaartut, ukiullu siuliini sinneqartoorutit pingasunik kisitsisitallit naligileqqikkumaaraat naatsorsuutigaarput, pisortaq Miki Jonas Brøns tusagassiuutinut nalunaarummi oqarpoq.

Ukiumoortumik nalunaarusiami allassimavoq angusat “naammaginartuunngitsut”, ukioq mannali akileraarutit suli ilanngaatiginagit 120 mio. kr.-inik angusaqarnissaq naatsorsuutaavoq – 2023-mi angusanit 35 mio. kr.-inik pitsaanerulluni.

Kaaviiaartitat attanneqartut

Kaaviiaartitat 1,48 mia. kr.-iusut, tassa 2022-mi kaaviiaartitaasut naligalugit, pitsaasutut oqaatigineqarput.

-Ukiumi taama ilungersunartigisumi kaaviiaartitavut attatiinnarsinnaasimagatsigit tulluusimaarutigaarput. Ingerlatseqatigiiffimmi, umiarsuarni nunamilu tunisassiornermi piginnaasaqarluartunik sulisoqarnerput niuernikkullu pikkorinnerput pissutaapput. Piumaneqarneruleraluttuinnarpugut pisavullu akitsoraluttuinnartillugit – aalisakkanut assigiinngitsunut tamanut akigititat, pisortaq Bent Friis-Salling oqarpoq.

Nammineq aningaasaatit 1.477 mio. kr.-iupput, tassa ukiup siulianut sanilliullugu 253 mio. kr.-inik ikinnerullutik, tamannalu ilaatigut Polar Seafood Denmark A/S-imi nammineq aningaasaatit 312,5 mio. kr.-inut allanngorsimanerannut tunngassuteqarpoq, naatsorsuutit ilanngussaanni allassimavoq.

Akiitsut katillugit 640 mio. kr.-iusut ukiumoortumik nalunaarusiami allassimavoq, akiitsut sivisuumik sivikitsumilluunniit akilersugassat assigiingajalluinnarlutik.

Inuiaqatigiinnut tapersersuineq

Piffissaq tamaat sulisartut 507-iupput — ukiup siulianut sanilliullugu sisamanik ikinnerullutik.

Kalaallit Nunaata aningaasaqarneranut „pingaaruteqartumik“ tapersersuisimalluni, ingerlatseqatigiiffik erseqqissaavoq:

• Sulisunut akissarsiarititat: 572 mio. kr.

• Aalisarnermut akiliutit: 411 mio. kr.

• Akileraarutit: 211 mio. kr.

• Pisuussutit erniaat: 210 mio. kr.

Politikkikkut navianaatit

Aalisarnermut inatsit nutaaq ingerlatseqatigiiffimmut ulorianartorsiortitsivoq. Ingerlatseqatigiiffiup ukiuni qulini qaleralittassiissutimi raajartassiissutimilu pingajorarterutaannik tunisinissamut inatsisissatut siunnersuutip Inatsisartuni politikerinit maanna suliarineqartup pinngitsaalissavaa, tamannalu ingerlatseqatigiiffiup isertitaqarluarsinnaaneranut sunniuteqassaaq.

Pisassiissutit 20 procentimik qaffanneqarnerannut sanilliullugu, toqqaannanngitsumik pigineqartut ilanngullugit, tamanna sinerissap qanittuani aalisarnermut ingerlatseqatigiiffiup aningaasaliissuteqarsimaneranut aalisartunut kinguneqarumaarpoq, nalunaarutigineqarpoq.

- Aalisarnermut inatsit maannakkutut isikkoqarluni akuerineqarpat, aalisartunut piniartunullu aamma aalisarnermik ingerlatsivinnut aningaasaliissutit Polar Seafood Greenlandip pisassai qaffasinnerpaaffissaannut ilanngunneqassapput, assersuutigalugu pisassiissutinut akiligassaqarutta. Taamaattumik aalisartunut piniartunullu aamma aalisarnermik ingerlatsivinnut minnerusunut Polar Seafood Greenlandip aningaasaliisarnini annertuut piumassuserinngisaminik taamaatiinnartariaqassavai, tusagassiuutinut nalunaarummi allassimavoq.

Aalisartunut aningaasalersuinerit

Michael Binzer, Polar Seafood Greenlandimi siulersuisuni siulittaasoq, tamatumunnga atatillugu ima oqarpoq:

- Polar Seafood Greenland pisassiissutigisartakkaminik killilersuinani aningaasaliissuteqarsinnaatitaajunnaassappat, ilaatigut sinerissap qanittuani aalisartut aningaasalersortuarsinnaajunnaassavagut. Taakkununnga inuussutissarsiutiminnik allatut aningaasalersuisariaqarnerannik tamanna isumaqarpoq, tamannalu ajuusaarnarpoq. Inatsilli tamanna kinguneraa, ajoraluartumillu allatut iliorsinnaanngilagut. Taamaattumik tusarniaanermi akissutinik tusarnaaqqullugit, inatsisissatullu siunnersuut allanngorteqqullugu, arlaleriarluta Naalakkersuisunut kaammattuuteqartarpugut.