– Polar Seafoodimik nakkutilliineq suli uatsinniippoq

Aalisartitseqatigiiffimmik ilaqutariinnik pigineqartumik, ingerlalluartumik pissaaneqaqisumillu manna tikillugu piginnittut pingasut, aktiat soraarnerussutisianik katersivimmut SISA-mut tuninerisa kingorna ingerlatseqatigiiffimmik nakkutilliineq suli tigummivaat.

Taama pisortaaneq Bent Friis-Salling ullumi Sermitsiamit apersorneqarluni oqarpoq.

Qatanngunni Laila Friis-Salling Miki Brønsilu peqatigalugit ukioq manna oktobarip aallaqqaataata tungaanut suliffeqarfissuaq, nunatsinni suliffeqarfinni namminersortunit pigineqartuni annerpaaq, tamakkiisumik pigisaraat.

Piginneqatigiissutit ikiliallalaarput, taamaalillutik taakku pingasut Polar Seafood Greenlandip 95 procentianik piginnittuulerput.

Bent Friis-Salling, Miki Brøns peqatigalugu pisortaanertut atuuttut, taamaalillutillu suliffeqarfimmi milliardinik kaaviiaartitsisumi angisuumi Nuummi qullersaqarfeqartumi naligiissumik pisortaanerusoq oqaloqatigaarput.

Aalisarnermut inatsisip malitsigisaa

Polar Seafood Greenlandimik piginneqataassutsit ilaasa tuninerat ilissinnut annernarsimava?

- Naamik, uatsinnut annernanngilaq. Aalisarnermut inatsit eqqarsaatigalugu tamanna pissusissamisoortumik ineriartorneruvoq. Piginnittuuneq allannguallalaarumaartoq ilisimajuarsimavarput, tamannalu inatsisit suliffeqarfiullu siunissaa ataqqillugu passussimavarput.

- Siunnerfipput suli taannaavoq, tassa Polar Seafood Greenlandip ingerlannissaa ineriartortinnissaalu, mannalu SISA maanngaanneersoq peqatigalugu, Bent Friis-Salling oqarpoq.

Piginneqataassutsit 5 procentii SISA-mut tunivasi. Polar Seafoodip avataanit aningaasaliisumut siullermut ammaassineranut suna pingaarnertut patsisaava?

- Piffimmeersumik nukittuumik piginnittuunerup qulakkeernissaa uatsinnut pingaaruteqarpoq, taamaammallu SISA Pensionip aningaasaliisutut tikilluaqqunissaa isumassaqarluarpoq.

- SISA kalaallinut tusindilipassuarnut soraarnerussutisiassanik katersisunut sinniisaavoq, taakkulu aningaasaliinerat tatiginninnermik oqariartuutaallunilu, Polar Seafoodip ungasissumik sammisumik piujuartitsisutullu suliffeqarfiuneranik oqariartorneruvoq.

- Tamannalu aalisarnermut inatsimmut tapiliullugu pissusissamisoortumik ineriartorneruvoq, tassuunalu naleqartitatsinnik allannguinngikkaluarluta imaluunniit suliffeqarfimmik nakkutilliineq allanngortinngikkaluarlugu avataanit annikinnerusumik piginnittuusoqarsinnaaneranut ammaassivugut.

”Siunissaq ungasinnerusoq eqqarsaatigalugu iliuuseqarpugut”

Aalisarnermut inatsisip kinguneranik Polar Seafoodip ukioq manna ingerlatseqatigiiffiup kitaata avataani qaleralittassami pingajorarterutaanik annaasaqarnissaanik tamanna attuumava?

- Toqqaannartumik attuumassuteqanngilaq. Aalisarnermik inatsimmik allannguineq pisassanik agguaassinermut sunniuteqarnera eqqortuuvoq, suliffeqarfimmillu ingerlatsinitsinni atugassarititaasut ilaattut tamanna isigaarput.

- Piginneqatigiissutsit ilaannik annikitsunik SISA-mut tunisineq akerlianik piffimmi piginnittut siunissamilu aalaakkaasuunerup nukittorsarneranik tunngassuteqarpoq – pisassanik allannguinermut ataatsimut qisuariaataanngilaq. Siunissaq ungasinnerusoq eqqarsaatigalugu iliuuseqarpugut nalimmassartuarnissarpullu sinaakkutissaritinneqartullu malillugit suliffeqarfiup ineriartortittuarnissaa sulissutigalugu.

Piginneqataasut nutaat aningaasaliissutigisaminnit iluanaarutisianik qanoq annertutigisunik ilimasaarneqarpat?

- Piginneqatigisatsinnut isumaqatigiissutini sukumiialuttut oqaatigissanngilagut. Ataatsimulli isigalugu aningaasaliinerup niuernerpalaartumik pinera, SISA-millu tamatuma suliffeqarfimmut patajaatsumut ungasissumik sammisumik aningaasaliinerunera paaseqatigiiffigaarput. Aalaakkaasunik akisussaassusilinnillu iluanaarutissiinissaq anguniagaraarput. Piginnittunut inuiaqatigiinnullu kalaallinut.

Soraarnerussutisianik katersivimmik isumaqatigiissutip tamanut saqqummiunneqarnerani SISA piginnittutut peqatigalugu ineriartornissinnik nangittumik ingerlanniarlugu oqarpusi. Qanoq tamanna paasineqassava?

- SISA ungasissumut sammisumik naleqartitanillu toqqammaveqartumik piginneqatitut, ilaatigut Polar Seafoodip kalaallit suliffeqarfiatut piffimmi aallaaveqarlunilu ineriartornermik aallussisutut isigaarput.

- SISA suleqataavoq inuiaqatigiinni kalaallini amerlanerussutilinnik sinniisaasoq. Tamannalu pisussaaffiliivoq – ineriartornerullu aallarteriikkatta nanginneqarnissaanut sulerusussutsitsinnik nukittorsaasuuvoq.

Polar Seafood Greenlandip 2024-mut naatsorsuutai naapertorlugit 119 million koruuninik annertussusilinnik sinneqartoortoqarpoq, suliffeqarfiullu aningaasaatai 1,6 milliardit koruuniupput. Aalisartitseqatigiiffik aningaasaqarnikkut nukittullunilu pigissaartutut aningaasarsiorluartutut isikkoqarpoq. Sooruna avataanit aningaasaliisoqarnissaanik pisariaqartitsisusi?

- Polar Seafoodip aningaasaqarnikkut patajaalluinnartuunera angusarissaartuullunilu aningaasaateqarluartuunera tulluusimaarutigaarput. Avataanit aningaasaliisumik ilanngussineq aningaasanik pisariaqartitsinermik tunngassuteqanngilaq. Ungasissumut eqqarsarneruvoq. SISA-p piginneqataaneratigut nunatsinnit aallaaveqarneq nukittorsarneqarpoq, suliffeqarfiullu aamma siunissami aalisarnermik inuussutissarsiornermi allanngorartuartumi nukittuumik inissisimanissaanik qulakkeerinninneruvoq.

Aningaasaliineq annertuumik sunniuteqartoq

Soraarnerussutisianik katersiviup SISA-p aningaasaliinera Polar Seafoodimut inuiaqatigiinnullu kalaallinut qanoq sunniuteqarpa?

- SISA-p aningaasaliinera annertuumik sunniuteqarpoq. Polar Seafoodimut inuiaqatigiinnullu kalaallinut. Aatsaat siullermeerluta avataanit piginneqateqalerpugut. Taamaaliornitsinnilu suleqatigisaq kalaallinik innuttaasunik tuusintilikkaanik soraarnerussutisiassatut katersamikkut sinniisoq suleqatitaaraarput. Taamaalilluni Polar Seafoodimi nalilinnik pilersitsineq inuiaqatigiinni suli siammasinnerulerpoq.

- Soraarnerussutisianik katersiviup SISA-p aningaasaliissutai aningaasaliinernut pisariaqartippisigit?

- Naamik, aningaasaliivigineqarnissaq pisariaqartissimanngilarput. Polar Seafood suliffeqarfiuvoq aningaasaqarnikkut nukittooq, SISA-millu aningaasaliivigineqarneq suliniutinut aalajangersimasunut aningaasassarsiornermut aamma tunngassuteqanngilaq.

- Aalisarnermut inatsisip nutaap malitsigisaanik piumasaqaatinut sinaakkutinullu nutaanut nalimmassarnissarput matumani kisimi pineqarpoq. Kalaallit Nunaannit aallaavilimmik ungasissumullu sammisumik aningaasaleeqataasussarsiorneq uatsinnut pingaaruteqarpoq. Taamaammat SISA pissusissamisoortumik nukittuumillu toqqaaneruvoq.

Soraarnerussutisianik katersivimmik SISA-mik isumaqatigiissuteqarnissinni, soraarnerussutisianik katersiviup ukiut ingerlanerani Polar Seafoodimik piginneqatigiissutinik allanik 5 procentinik tunisisinnaanissaa naatsorsuutigivisiuk?

- Ukiut ingerlanerini SISA-p suliffeqarfimmik piginneqatigiissutinik 5 procentinik allanik pisisinnaanera eqqortuuvoq. Tamanna aalisarnermut inatsimmut pilersaarusiukkamik annertusiartortumillu nalimmassarnerup ilagaa, taamaaliornermilu kalaallit piginnittuunerat nukittorsarusupparput. SISA-p piginneqataassutaanik tassannga annertuliineq piffimmi nukittunerusumik aallaaveqalernermik qulakkeerinnittuuvoq.

Soraarnerussutisiassanut aningaasaliinerit Polar Seafoodip inuiaqatigiillu kalaallit pigissaartuunerannut pingaaruteqarpat?

- Soraarnerussutisianik katersiviit inuiaqatigiit kalaallit ineriartorneranni pingaarutilimmik inissisimapput, minnerunngitsumik innuttaasut tuusintillit ileqqaagaannik ingerlatsisunut. Taakku Polar Seafooditut ittunut piffimmi suliffeqarfinnut aningaasaliigaangata, nalitunerulersitsinerup nunatsinniiginnarnera innuttaasunullu iluaqutaanera qulakkeerinneqataaffigisarpaat.

SISA-mit soraarnerussutisianillu katersivinnit allanit suli aningaasaliinerusoqarnissaanik ammaassinissamut piareersimavisi?

- Tamanna pitsaasumik pissusissamisoortumillu ineriartornertut isigaarput. Aamma sineriammi ingerlatsisunik allanik ammassilluta suleqateqarnerunissaq piareersimaffigaarput. Polar Seafood Greenlandimik piginnittussanik arlaqarnerusunik periarfissiinissaq ammaffigalugu oqaatigereerparput, tamatuma patajaatsumik toqqammaveqarnera, ungasissumut sammisumik toqqammaveqarnera naleqartitatsinnillu ataqqinnittumik inuiaqatigiinnilu kalaallinik aallaaveqarnera tunngavissaatillugu.

- Ingerlatseqatigiiffiup ilaa qanoq annertutigisoq avataanit aningaasaliisunut tunissallugu piareersiffigaasiuk?

- Aalisarnermut inatsisip Kalaallit Nunaanni aalisarnermik inuussutissarsiornerup piginnittunut siammasinnerusunut agguaannissaa siunnerfigaa, tamannalu siunnerfilimmik aallaavigaarput. Taamaammat piginneqatigiissutit ilaasa avataanit aningaasaliisunut sineriammut attuumassuteqartunut tuniniarnissaanut ammavugut, soorlu SISA-mut tunngatillugu taamaalioreersugut.

- Taamaammat kalaallinut aningaasaliisartunut amerlanerusunut suleqatinullu amerlanerusunut tunisinissaq ammaffigaarput. Tamanna soorlu tassaasinnaavoq sinerissap qanittuani raajarniarneq, ineriartornissamut periarfissaqarluartoq kiisalu pisassat qaffasinnerpaaffiinut nutaanut nalimmassarfissarput.

Kalaallit Nunaanni aningaasaliineq politikikkut nalorninartortaqartoq, SISA siorna oqariartorpoq. Kalaallit Nunaanni aningaasaleerusuttunut, ilaatigut aalisarnermi, politikikkut sinaakkutit ukiuni 20-nit 30-nut aalaakkaasuunissaat pingaaruteqartoq, siulittaasoq Jess. G. Berthelsen oqarpoq. Isumaqatigaasiuk?

- Aap, Politikikkut sinaakkutit aalaakkaasut ungasissumullu sammisut isumaqatigaagut. Minnerunngitsumik Kalaallit Nunaanni aalisarnermilu annertuunik aningaasaliinerit pineqartillugit Bent Friis-Salling erseqqissaavoq.