Politikikkuunngitsoq inatsisitigulli aalajangerneqassaaq

Nuummi avatangiisinik illersuiniap Paul Watsonip tunniunneqarnissaata Japanimiit qinnutigineqarnera ukiut 14-it matuma siornatigut pisimasumik tunngaveqartoq Inatsisinik atortitsinermut ministereqarfik ilisimatitsivoq, tassani pineqarput "tillinniarneq, pigisanik innarliinerit, inuussutissarsiuteqarnermut akornusersuineq kiisalu inunnik ajoqusiineq“.

Ingammik inunnik ajoqusiisimanera pillugu unnerluussut kingulleq Paul Watsonip eqqartuussissuserisuata Jonas Christoffersenip Julie Stagellu assortorpaat. Immiussat - Kalaallit Nunaanni Eqqartuussivimmi takutinneqarnissaanik itigartitsissutigineqartoq - Inatsisinik atuutsitsinermut ministereqarfimmut nassiuppaat, tassanilu Japanimit tunniussinissamik qinnuteqaat akuerineqassanersoq itigartinneqassanersorluunniit pappialaatit pigisat aallaavigalugit naliliiffigineqassaaq.

Immiussap unnerluussut akerlilerpaa

Eqqartuussissuserisoq Jonas Christoffersen Sermitsiap oqaloqatigisaa naapertorlugu pineqartoq tassaavoq immiussaq piviusulersaarusiaq ”Whale Wars”, Animal Planetimi 2010-mi aggustimi aallakaatinneqarpoq, tassanilu uppernarsarneqarpoq Sea Shepherdip 2010-mi Sikuiuitsumi kujallermi Japanimiut arfanniartarfiannut saassussineq Japanimiunit tunniussinissamut piumasaqarnerani allaaserineqartumi eqqunngitsoq.

– Inatsisinik atortitsinermut ministereqarfiup immiussaq takuguniuk qaartartumik tipittuliortumik qaartitsineq Japanimiunit oqarneranut pisimanngitsoq neriuppugut takusinnaassagaat. Taamaanngippat Kalaallit Nunaanni Politiit misissuisariaqarput, Jonas Christoffersen oqarpoq. 

Qaartartoq tipittuliortoq imaluunniit qasilitsumik seqertaat

Immiussami 2010-meersumi takuneqarsinnaavoq Paul Watsonip inuttaasa ilaata — New Zealandimiu Pete Bethune — gummibådimit qaartartumik tipittuliortumik kemikaliartalimmik japanimiut arfanniat umiarsuaannut igitsisoq. Japanimi unnerluussut naapertorlugu qaartartoq tipittoq taanna inuttap aappaata uluaanut ajoqusiisuuvoq.

– Immiunneqarsimasumili takuneqarsinnaavoq qaartartoq tipittuliortoq iginneqarmat umiarsuaq inuttaqanngitsoq. Inuttammi piffissami tamatumani umiarsuarmut isersimapput, tamannalu pissuteqarpoq aatsaannguummat gummibådit tungaannut qasilitsumik seqertarsimagamik taakkulu qasilitsut isaannut pulasimallutik. Taamaattumillu isumaqarsinnaallutik qaartartumiit ajoquserlutik. 

Kiffaanngissusermik arsaarinninneq

Aammattaaq kiffaanngissusermik arsaarinninnermut tunngatillugu apeqqut. Paul Watson juulip 21-ani tigusarineqarpoq tamatumalu kingorna tigummigallarneqarluni. Aallaqqaammut aggustip 15-iani eqqartuussisoqarnissaata tungaanut tigummigallarneqarpoq, tamatumalu kingorna septembarip tallimaanut tigummigallarneqarnera sivitsorneqarpoq, eqqartuussiviulli Paul Watsonip illersorneqarnera isummerfiginngilaa.

– Nunatsinni Eqqartuussivimmi suliap ingerlanneqarnera ajuusaarutigaarput, taamaattumillu aalajangiineq Nunatta Eqqartuussisuuneqarfianut suliareqqitassanngortillugu. Illersuinitsinnik Nunatta Eqqartuussisuuneqarfianut tunniussivugut, tassanilu marlunngornermi eqqartuussut attatiinnarneqarpoq, taamaattumik maanna suliamik suliarinnissinnaanermut aalajangiisartut qinnuigaagut suliaq Eqqartuussiviit Qullersaanni suliarineqarnissaa pillugu, Jonas Christoffersen oqarpoq.

Piumasaqaatit naammassineqanngillat

Paul Watson Kalaallit Nunaanni tigummigallarneqarsinnaassappat piumasaqaatit pingasut naammassineqaqqaartariaqarput. 

– Siullermik, Paul Watsonip unnerluutigineqarnermisut iliorsimaneranik tunngavissaqarluartumik pasitsaassisoqartariaqarpoq. Tamatumunngalu tunngatillugu isumaqarpugut, immiussaq Whale Warsimit piviusulersaarusiaq unnerluussummut akerliusoq. Aappaattut unioqqutitsinerup tigummigallarneqarsinnaanermut naammattumik sakkortutiginera misissorneqassaaq. Tassami taamaallaat akiligassiisoqassappat Inatsit Tunngaviusoq aamma Kalaallit Nunaanni eqqartuussiveqarnermut inatsit malillugit Paul Watson tigummigallarneqarsinnaanngilaq. Isumaqarpugullu pisimasoq unnerluussummi allassimasutut tunngavilersuutigigaluarutsiguluunniit inuttap kiinaata ajoqusernera ima annikitsigisimassasoq, kalaallit malittarisassaat malillugit pineqaatissinneqarsimasunut inissiisarfimmut inissinneqarsinnaanani taamaallaat akiligassiisoqarsinnaalluni imaluunniit inuiaqatigiinni kiffartuussisussanngortitaalluni. Pisullu aappaani, tassa ”tillinniarneq pigisanillu ajoqusiineq” tassaasoq, Pete Bethunep umiarsuarmut isumannaallisaanermut qassutinik kipisinera, tamannalu kalaallit malittarisassai aallaavigalugit 4.000 koruuninik akiligassiissutaassaaq. Taamaattumik taanna pissutigalugu inunnik tigummigallagassannguisoqarsinnaanngilaq. Kiisami piumasaqaatit naammassineqarsimanersut apeqquserneqarsinnaavoq, tassa sapaatip-akunnerini arfineq-marlunngulersuni tigummigallarneqarneranut. Uagut taama isumaqanngilagut.

Inatsisit tungaatigut kukkuneq

Jonas Christoffersen naapertorlugu Nunatta Eqqartuussiviani suliami ajornartorsiutaasoq tassaavoq eqqartuussisup Paul Watsonip illersorneqarnera ilanngutinngimmagu.

- Pissutsit immikkut ittut eqqartuussisumut takutikkusuppagut, tassa immiussat. Tassani takuneqarsinnaavoq Paul Watson unnerluutigineqarnermisut iliuuseqarsimanngitsoq, eqqartuussisulli takujumanngilaa, isumaqarpugullu tamanna inatsisinut naapertuutinngitsoq. 

Danmarkip Paul Watsonip tunniutinngitsoornissaa ajornakusoortissagaa Danmarkip nunanut allanut ministeria Lars Løkke Rasmussen oqarnikuuvoq. Suliap politikkimut akuliutinnginnissaa mianersuutigisariaqartoq, inatsisilli malillugit ingerlasoqassasoq qallunaat nunanut allanut ministeriata inatsisinillu atuutsitsinermut ministeriata oqarsimanerat Jonas Christoffersenilli maluginiarpaa.

– Inatsisinik atortitsinermut ministereqarfimmi atorfillit suliaq tamaat misissussagaat inatsisillu tamaasa misissussagaat upperilluinnarpara, suliarlu ingerlateqqinneqarsinnaannginnerarlugu isummerumaartut upperilluinnarlugu.

Annernartoq nikanarsaataallunilu

Qanorluunniit kinguneqassagaluarpat Paul Watson naapertuilluartumik pineqarsimanngitsoq Jonas Christoffersen isumaqarpoq.

– Eqqartuussivimmut saviminermik paffequtserlugu ingerlanneqarpoq, tusagassiortut immiussillutik najuuttut akornanni taama nikorfatinneqarluni. Tamanna annernartuuvoq nikanarsaataallunilu, taamatullu pineqartussaanngikkaluarpoq. Eqqartuussivimmi tuluttut oqaluttumik nutserisussaqartitsisoqanngilaq. Taava eqqartuussissuserisua Julie Stage nutserussisariaqarluni. Tamanna angummik kiffaanngissusiiarneqartumut ataqqinninnginneruvoq. Kiisalu eqqartuussisup uppernarsaatit eqqartuussivimmi saqqummiunneqarnissaat akueriumanngilaa. Tamanna akuerineqarsinnaanngilaq. Taamaattoqarnera pissutigalugu suliaq siumut aalajangiivigineqareersuuvoq, Jonas Christoffersen oqarpoq.

Paul Watsonip tigummigallarneqaannarnissaa pillugu septembarip sisamaani eqqartuussisoqassaaq.

Justitsministeriet har oplyst, at den japanske anmodning om udlevering af aktivist Paul Watson i Nuuk, er baseret på en 14 år gammel sag, der handler om ”indbrud, beskadigelse af ejendom, forhindring af udøvelse af erhverv samt personskade”.

Og det er især det sidste anklagepunkt om personskade, som Paul Watsons advokater Jonas Christoffersen og Julie Stage anfægter. Senest har de sendt det videomateriale - som de ikke fik lov at vise i Retten i Grønland - til Justitsministeriet, der på baggrund af sagens dokumenter nu skal vurdere om udleveringsanmodningen fra Japan skal efterkommes eller afvises.