Qaanaami qalerallit tulaanneqartartut ukiut kingulliit ikiliartuinnavissimapput, ukiorlu manna aatsaat taama ikitsigalutik maannakkumut 57 tonsit taamaallaat tulaanneqarsimasut, Inatsisartunut ilaasortap Hans Enoksenip, Naleraq, paragraf 37 atorlugu apeqqutaanut Aalisarnermut Pinianermullu Naalakkersuisoq Kim Kielsen, Siumut, akissuteqarluni ilaatigut taama allappoq.
Qaanaami aalisarnermik inuussutissarsiuteqarnerup soqutigineqarnera ukiuni kingullerni milliartorsimasoq, Inughuit Seafood A/S-imi siulittaasoq, kiisalu Qaanaami nunaqarfiinilu piniartuunermiit aalisartuunermut ikaarsaarnissamut aqqutissiusut pingaarnerit ilaat, Jens Danielsen, oqarpoq.
Qaanaami qalerallit tulaanneqartartut ukiut kingulliit ikiliartuinnavissimapput, ukiorlu manna aatsaat taama ikitsigalutik maannakkumut 57 tonsit taamaallaat tulaanneqarsimasut, Inatsisartunut ilaasortap Hans Enoksenip, Naleraq, paragraf 37 atorlugu apeqqutaanut Aalisarnermut Pinianermullu Naalakkersuisoq Kim Kielsen, Siumut, akissuteqarluni ilaatigut taama allappoq.
Qaanaami aalisarnermik inuussutissarsiuteqarnerup soqutigineqarnera ukiuni kingullerni milliartorsimasoq, Inughuit Seafood A/S-imi siulittaasoq, kiisalu Qaanaami nunaqarfiinilu piniartuunermiit aalisartuunermut ikaarsaarnissamut aqqutissiusut pingaarnerit ilaat, Jens Danielsen, oqarpoq.
Assigiinngitsunik peqquteqartoq
Qaanaami aalisakkanut suliffissuarmut, Inughuit Seafood A/S-imit Royal Greenland A/S-imilli ingerlanneqartumut, qalerallit tulaanneqartartut piffissap ilaani ukiumut 170 tonsit missaanniittarsimagaluarput, ukiulli kingulliit ingerlaneranni tunisat ikiliartuinnavissimapput. Assersuutigalugu 2020-mi 158 tonsit tulaanneqarsimapput, 2023-mi 75 tonsit, ukiorli manna maannakkumuugallartoq taamaallaat 57 tonsit tulaanneqarsimasut, paragraf 37 atorlugu apeqquteqaammut tunngatillugu Royal Greenland paasissutissiivoq.
Tamannalu assigiinngitsunik ilaatigut sikuusarnerata allanngoriartorneranik peqquteqartoq Qaanaami aalisakkanut suliffissuup pisortaa Ujuut Olsen oqarpoq.
- Siornatigut sikukkut aalisarneq decemberimi aallartittaraluarpoq, siornali sikuniaataarnerata kingunerisaanik aalisarneq tunisinerlu januari naalersoq aatsaat aallartippoq, tamatumalu aalisarnermik inuussutissarsiuteqarnermut assut eqquinerluppoq.
- Taassuma saniatigut puisit amiisa akiisa qaffaallannerat, qalerallit tunisat ikinnerulernerannik ilaatigut kinguneqarsimavoq.
- Qaanaami aalisarnermik inuussutissarsiuteqarneq eqqoruminartorujussuuvoq, taamaattumik annikitsunnguamilluunniit pisoqaraangat tamanna aalisarnermut annertuumik sunniueqartarpoq, taanna oqarpoq.
Ukiut arlaqartut matuma siornatigut Qaanaap eqqaani qaleralinniarneq inerisaaffigineqalermat qalerallit angisuujusimagaluartut ukiut kingulliit milliartulersimapput.
- Qalerallit tulaanneqartartut ajoraluartumik aamma milliartulernikuupput, tamannalu tulaanneqartartut kiiluisa apparnerinut ilaatigut aamma peqquteqarpoq.
Qaanaami qalerallit tunisat ikileriarujussuarnerisa kingunerisaanik aalisakkanut suliffissuarmi sulisut quliniit tallimat missaannut ikilisinneqarsimasut, Ujuut Olsen erseqqissaavoq.
Qaanaami eqqaanilu piffissami decemberimiit junip tungaanut sikuunerata nalaani qaleralinniarneq ingerlanneqartarpoq, aasakkullu qilalukkat takkusimaaleraangata qalerallit tammakaraangata aalisarneq unittarpoq.
Qilalukkat mattaat kilomut 150 koruunilerlugit tunitsivimmut tunisaapput, tunisalli aamma ikileriarsimasut, tunitsiviup pisortaa oqarpoq. Tunitsivimmut eqaluit aamma tunisaapput.
Ingerlaqqartoq
Ingerlatseqatigiiffik Inughuit Seafoodimit Royal Greenlandimillu pigineqartoq ingerlaqqartoq, ukiumilu angusarissaarfiusumi angusat ilaanit piginnittut agguarneqartaraluartut, ukiuni kingullerni marlussunni iluanaarutit ikiliartornerat pissutigalugu ingerlatseqatigiiffik angusarissaarsimanngitsoq, Naalakkersuisut akissutaanni erserpoq.
Qaanaap avinngarusimasumiinnera pissutaalluni suliffissuarmik ingerlatsinermut aningaasartuutit qaffasipput, ingerlatseqatigiiffillu atasinnaaqqullugu tunisinermi akit aalajangersarneqartarput. Tunisinermi kilomut 16,50 koruunit akigitinneqartarpoq, taassuma qaavatigut qalerallit Qeqertaniit assartorneqarnerinut kilomut 3 koruunit kiisalu naliginnaasumik tapeq 1 koruuni taperitinneqartarpoq, taamaalilluni tunisinermi akigineqartoq agguaqatigiissillugu katillugu 18,15 koruuniulluni. Qalerallit tunineqartut amerlanerunngippata mattaallu tunisaalluanngippata 2024-mi ingerlatseqatigiiffiup angusaqarluartitsinissaa ilimaginngikkitsik, Royal Greenland paasissutissiivoq.
Piumassuseq apeqqutaasoq
Silaannaap allanngoriartornerata Qaanaap eqqaani aalisarnermut sunniuteqarnerluttoq aammali siornatigut aalisartuusimasut arlallit takornarissanik qimussiussineq aallunnerulersimagaat, Inughuit Seafood A/S-imi siulittaasoq Jens Danielsen oqarpoq. Aammali aalisarneq soqutigineerukkiartortoq malunnartoq, taassuma naqissuserpaa.
- Ukiut siuliinut naleqqiullugu aalisartut ikinnerulernikuupput, inuillu ataasiakkaat kisimik annerusumik aalisarneq ingerlappaat. Tunitsiveqarnikkut periarfissarissaarpoq qaleraleqarlunilu, taamaattumik aalisartut ikiliartornerat paasiuminnaappoq.
- Aalisartulli amerlanerusut piumassuseqarnerusuuppata aalisarneq tunisassiornerlu maannakkorniit pitsaanerujussuarmik ingerlasinnaagaluartoq qularnanngilaq.
- Pissutsillu maannakkutut ingerlaannassappata tunisassiorfimmut tunngatillugu siunissaq ernumanarpoq, Jens Danielsen oqarpoq.
Qaleralinnik tunisinermi kilomut akigitinneqartoq 16,50 koruuniusoq innuttaasut ilaanniit mikigineqartartoq, tamannalu aalisartut ikiliortornerannut peqqutaaqaasinnaasoq, taassuma oqaatigaa.
