Kalaallit Nunaata kitaani avataasiorluni Namminersorlutik Oqartussat
ingerlatseqatigiiffiata Royal Greenlandip qaleralittassaasa 2.700
tonsit 2025-mi peerneqarnissaat Naalakkersuisut ilimasaarutigaat.
Aalisarnermut
inatsisip nutaap kinguneraa ingerlatseqatigiiffimmi isertitassatigut
sakkortuumik annaasaqarnissaq.
Kalaallit Nunaata kitaani avataasiorluni Namminersorlutik Oqartussat
ingerlatseqatigiiffiata Royal Greenlandip qaleralittassaasa 2.700
tonsit 2025-mi peerneqarnissaat Naalakkersuisut ilimasaarutigaat.
Aalisarnermut
inatsisip nutaap kinguneraa ingerlatseqatigiiffimmi isertitassatigut
sakkortuumik annaasaqarnissaq.
- Taama pisoqarnissaa ilimagaarput. Sulili piginnittunit Namminersorlutik Oqartussanit ersarissumik nalunaarfigineqanngilagut. Ukiumut pisassat 2.700 tonsit annaasassagutsigit isertitassatigut aamma annaasaqassaagut.
- Nunami suliffissuarnut kinguneqarsinnaavoq taamaalillunilu Kalaallit Nunaanni inuiaqatigiinnut. Suliffeqarfittut inuiaqatigiinni akisussaaqataasutut soorunami tamanna ernummatigaarput.
Taama
oqarpoq Royal Greenlandimi pisortaanerugallartoq Preben Sunke
Sermitsiamit oqaloqatigineqarnermini.
Royal
Greenlandip pisassat 2.700 tonsit annaassappagit
ingerlatseqatigiiffissuaq ukiumut annertuumik annaasaqartassaaq.
Ingerlatseqatigiiffik
aningaasaliisimavoq ukiunut arlalinnut pisassat naatsorsuutigalugit,
maannamut taamaallaat uumassusilerinikkut tunngaveqarluni
nikerarsimasut naalakkersuinikkuungitsorlu, 2025-mi ukiup affaanut
siullermut naatsorsuutinut nalunaarusiami allassimavoq.
”Royal
Greenlandip pisassaasa annikillinerat naleqqussaanermik
kinguneqarsinnaavoq suliffissuarnilu kalluarneqartuni sulisoqarnikkut
ikililerisoqarluni”, ingerlatseqatigiiffiup naatsorsuutaani
allassimavoq.
Kilisaatinut
aningaasaliineq tassunga killeqartoq
Spaniami
umiarsualiorfimmit kilisaatip nutaap Kaassassuup tigunerata kingorna
Royal Greenlandip ukiuni arlalinni kilisaatinik nutarterinini
naammassivaa, tassalu suliffeqarfissuarmi ingerlatseqatigiiffiinilu.
Katillugit
2 milliardit koruunit nalingannut aningaasaliisoqarsimavoq.
- Nunami suliffissuit ataatsimut nalilersuleruttorpavut, suliffeqarfiullu ilaanut tassunga kingusinnerusukkut aningaasaliinissamut pilersaarusiorluta.
- Ukiuni tulliuttuni 3-5-ni nunami suliffissuartigut annertuumik aningaasaliinissamik pilersaarusiorpugut. Suli kisitsisitalersinnaanngilara, ukiulli 3-5 ingerlaneranni millionilikkaassapput pingasunik kisitsisitallit, Preben Sunke oqarpoq.
300
millionit koruuninik sinneqartoornissaq siunniukkaa
Aalisarnikkut
ingerlatseqatigiiffissuaq suliffeqarfissuuvoq milliardilikkaanik
kaaviiaartitsisoq suli amigartooruteqartarluni ilungersortoq.
- Akileraarutit akilertinnagit 0 koruuninik angusaqarsimasinnaagaluarpugut. Maanna 2025-imi ukiup affaanut kingullermut isertitassat piviusunngortinnissaat qilanaaraara. Taamaassappalli ilungersortuartariaqarpugut niuerfimmi allanngorartuartumi aningaasartuutikillisaallutalu isertitaqarneruniarlutalu.
Taama
oqarpoq ingerlatseqatigiiffissuarmi pisortaq ukiup affaanut
siullermut angusanut aggustip naanerani saqqummiunneqartunut
oqaaseqaatini.
Piffissami
januaarip aallaqqaataaniit juunip 30-anut Royal Greenland
akilerartinnani 11 million koruuninik amigartoorpoq 2,6 milliard
koruuninik kaaviiaartitanit.
Royal
Greenland anguniagartuumik periusissiamigut, INUA 2027, siunniussivoq
2024-mi aningaasatigut ajutoornerup muminnissaanik, akileraartinnani
196 million koruuninik amigartooruteqarluni, anguniarlugu 2027-mi 250
million koruuninik sinneqartooruteqarnissaq.
Niuernikkut
anguniagaqarnerusumik pisariinnerusumillu pilersitsinissaq Royal
Greenlandip anguniarpaa.
- Siunissamut ungasissumut anguniagarput tassaavoq akileraartinnata 250 million koruuninik sinneqartoornissaq, Preben Sunke oqarpoq.
Royal
Greenland naapertorlugu niuernermi pissutsit tunngavigalugit ukioq
manna ukiup affaanut kingullermut tuniniaanermi akinut
isumalluarnartoqarpoq.
- Isumalluarnissarli qajannarpoq. 2025-imi ukiup affaani siullermi akigitinneqartut takutippaat pilersuinikkut amikkisaartoqarnermik peqquteqartut, pingaarnertulli niuerfitsinni aningaasaqarnikkut annikikkaluamik pitsaasumut ingerlasoqarnera aamma iluaqutaasoq, ukiuni kingullerni aningaasat naleerukkiartornerannit tatineqarneq annikilliartorluni.
- Aningaasatigut isumalluarnartut sukkasuumik allanngorsinnaapput, USA-mi annertuumik akitsuusiinissamik sioorasaarineq piviusunngortinneqarpat. Tamanna pingaarnertut niuerfinni kalluarneqartuni inuinnaat atuinerannik annikillisaataassasoq ilimagineqarpoq taamaalillunilu aningaasatigut siuariartornermut, Royal Greenland allappoq.
