Qaqortumi nutaamik akunnittarfeqalissasoq

Qaqortumi akunnittarfik nutaaq nutaalianik ilorrisimaarnartunillu pequtsersugaassaaq.

Taama suliniummik aallarniisoq Martin Heilmann Kristensen tusagassiutitigut nalunaarummi ilisimatitsivoq.

Illoqarfimmi Café Kûnguamik ingerlatsisooreerput, akunnittarfillu Kûnguak Hotelimik taaguuteqassaaq:

- Kûnguak Hotel unnuisarfinnik neqerooruteqarnerup saniatigut – angalasut Kujataani pinngortitami alutornartumi ulloq naallugu misigisaqarsimallutik qasuersaarsinnaanissaannut tulluartumik - silami kissartumik kinisimaartarfimmik saunamillu neqerooruteqassaaq, Martin Heilmann Kristensen pilersaarutit pillugit allappoq.

Niuertoq Martin Gjødvad Inu:IT-meersoq aamma suliniummi peqataasoq ilisimatitsissutigaa.

- Nunaqavissut nunaniillu allaneersut katersuuttarfigisinnaasaannik pilersitserusuppugut, tassanilu nunap immikkoortuani neqeroorutigineqarsinnaasut pitsaanerpaat neqeroorutigissavagut.

Akunnittarfik 2026-mi aasakkut piariissasoq naatsorsuutigineqarpoq, akunnittarfiliortussallu mittarfik maanna Qaqortup avataani sanaartorneqartoq isumalluarfigingaarpaat:

- Mittarfittaassaq Qaqortup tikinneqarsinnaaneranut ineriartortinnissaanullu periarfissiissaaq. Hotel Kûnguak ineriartornermut tamatumunnga uagut tapersiissutigaarput, illoqarfiullu takornariarfiulluarnerulernissaanut peqataanissarput qilanaaraarput.