Qeqqussanik naatitsinermi misilittakkat annertuut

Royal Greenlandip misileraalluni qeqqussanik naatitsinermik katersisarnermillu suliniutit siulliit 2019-imi aallartippai, tamatumalu kingorna qeqqussat pillugit annertuumik ilisimasaqalerluni, taamatullu misileraanermi qeqqussat issittumi naatinneqarsinnaanersut paaserusunneqarsimavoq.

Qeqquat naatinneqarsinnaanerat 2021-mi qulakkeerneqarmat, coronap atuunnerata nalaani annertunerusumik naatitsisalernissaq siunertaralugu suleqatissarsiorneq aallartinneqarpoq, tassani qeqqussanik avammut niueruteqarsinnaalernissaq, kiisalu nunatsinni qeqqussat atorlugit nerisassianik sanaartorsinnaalernissaq ilaatigut siunertarineqarluni.

Tamatuma kingorna suliffeqarfimmit Nordisk Tang suleqatigiinnissamik isumaqatigiissusiortoqarnikuuvoq, taakku ilaatigut misileraalluni tunisassianik assigiinngitsunik misilittagaqarput, soorluttaaq qallunaat aalisakkanik tunisassiorfiat Nordic Marine Nutrition annerusumik piginneqataaffigilersimagaat.

Maniitsup eqqaani qeqqussanik naatitsilluni misileraavik Norgemiut suliffeqarfiutaat Arctic Seaweed suleqatigalugu 2022-mi pilersinneqarpoq, maannamullu qeqqussat assigiinngitsunik marluk, tassaasut uissuit sulluitsullu, annertuumik tunisassiarineqarsimapput. Naak qeqqussanik naatitsilluni misileraavik ajoquserneqaraluartoq tunisassiornerup septembarimi tamakkiisumik aallartinnissaa anguniarneqartoq, Royal Greenlandimi misileraanermik aqutsisoq Business Development Manageriutigisoq Nikoline Ziemer oqarpoq. Qeqqussat naatinneqartut aappaagu assigiinngitsunut atorlugit tunisassiarineqarnissaat siunertaavoq.

Misileraanerit assigiinngitsut 

Maniitsup eqqaani qeqqussanik naatitsilluni misileraavimmi qeqqussat naatitassat ukiakkut allunaasanut ikkussuunneqartarput aappaaguanilu aasakkut katersorneqartarlutik. Nikoline Ziemer naapertorlugu qeqqussat assigiinngitsut ilisimaneqanngitsut ineriartortinnissaannut aningaasarpassuit atorniarneqanngillat, taamaattumillu qeqqussat assigiinngitsut nalunnginneqareersut naatitsinermullu malittarisassat ilisimaneqareersut aallaavigineqarlutik.

- 2023-mi oktobarimi qeqqussat sanileriikkaarlugit ikkuppagut, 2024-milu juunimi katersuilluta. Periuseq tamanna iluaqutaasoq paasivarput. 2024-mili 2025-milu angusat takutippaat qeqqussat septembarimiit juunimut naatinneqartassasut.

- Immap naasui ukiakkut naasussanngorlugit ikkunneqartut aasakkut naatinneqartuniit pitsaanerusut paasinarsivoq.

- Maniitsup eqqaani ukiualuit tamatuma siorna aamma misiliinikuuvunga, aggustip naanerani naatillugit juunimilu katersorlugit. Taakku qaammatit qulingiluat qaangilaarlugit talliatorput, meterillu aappaa avillugu takinerusumilluunniik takissuseqarlutik. Tamannalu ajunngilluinnarpoq, oqarpoq.

Ukiut ingerlanerini, tassa piffissami 2023-mi novembarimiit 2025-mi juunip tungaanut qaammatini 19-ini, qeqqussat sanileriiaani meterimut naatitat 4-6 kiilunik oqimaassusillit naasimasut 2023-mi angusat takutippaat.

- Naammaginartumik angusaqarpugut. Qeqqussat ima amerlatigaat krani atorlugu talittarfimmit kivineqarsinnaanatik. Aammali qeqqussat ukiuni marlunni uninngatitat uumasunit allanit ajoquserneqarsimasut maluginiarpavut. Naak takigaluarlutillu kusanaraluartut nerineqarsinnaanngimmata tamaasa igiinnartariaqarsimavagut.

- Taamaattumik assigiinngitsunik marlunnik misileraavugut. Ukiup qanoq ilinerani naatitsisassanerluta aamma ukiut marluk ingerlaneranni naatitsinermik, Nikoline Ziemer oqarpoq.

Taamaattumik qeqqussat anginerit naatinniaraanni ukiakkut tamanna pisassasoq, aamma aasaanerani naatitsineq naleqqutinngitsoq misilittakkat takutippaat. Aasaaneranimi uumasoqatigiiaat allat unammillernaramik.

Sivisuumik asiusinnaannginnissaat anguneqassasoq 

Qeqqussat naatitat katersukkallu sivisuumik asiunaveersaarneqarsinnaanngitsut misilittakkat aamma takutippaat. Taamaattumik qeqqussat pitsaanerpaamik qanoq asiunaveersaarneqarsinnaanersut paasiniarlugu Royal Greenlandip Danmarks Tekniske Universitet, DTU Food, aalisakkanik qalerualinnillu asiunaveersaartitsinermik immikkut ilisimasalik suleqatigilerpaa.

Royal Greenland GUDP-ip suliniutaa VALUEKELP aqqutigalugu Danmarkimi Nunalerinermut, Inuussutissalerinermut Aalisarnermut Ministereqarfimmit ingerlanneqartumi qeqqussanik asiuinaveersaartitsinermik suliniummi aamma peqataavoq.

Royal Greenlandip qeqqussanik naatitsisarnermik misiliutigalugu suliniutaani immap naasui katersukkat sumut atorneqarsinnaanersut aamma paasiniarneqarpoq. Maniitsup eqqaani misileraavik maannakkut ajoquteqarpoq, naatitsinerlu aallarteqqinniarlugu aningaasat tassunga atorneqarneqartussat ujartorneqarput.

- Qeqqussat naatinneqarumaartussat aappaagulu katersorneqareerpata assigiinngitsunik tunisassiornermut atorneqassapput. Qeqqussanik salatiliorsinnaaneq, ilaatigut wakamesalatinik, tunisassiorsinnaanerput misissorparput. Aamma qeqqussanik pestoliamik tunisassiorsinnaalernissaq misissorparput, taannalu ukiut marluk matuma siorna Danmarkimi Nordisk Tangimi misiliilluni tunisassiarereernikuuarput.

- Qeqqussat naatitatut naatitatut nerineqarsinnaapput, taakkunanngalu tunisassiorneq piujuartitsisoq CO2-millu aniatitsinermik annikillisaasinnaasoq periarfissatsialattut isigaarput, Nikoline Ziemer oqarpoq.

Misileraalluni qeqqussanik naatitsineq Royal Greenlandip Maniitsumi aalisakkeriviani ingerlanneqarpoq, aalisakkerivimmiillu qeqqussanik naatitsinermik suliaqarneq pikkoriffigineqartoq aamma oqaatigaa.

Iluatsilluartumik naatitsineq 

Pinngortitaleriffik Nuup eqqaani qeqqussanik naatitsinermik ukiuni arlalinni aamma misileraavoq, ilisimatuussutsikkullu paasissutissanik katersiniikuulluni. Pinngortitaleriffimmit qeqqussanik misileraatigalugu naatitsineq 2021-mi nalunaarusiorneqarpoq, tassanilu ilaatigut nunarsuaq tamakkerlugu qeqqussat piumaneqarneruleriartortut paasineqarpoq, aamma Kalaallit Nunaata sineriaani iluatsittumik naatinneqarsinnaanerat.