RAL-imi siulersuisut nutaat Mutép nersualaarpai
Ullumikkut ingerlatseqatigiiffiup ataatsimeersuarnerani, Royal Arctic Linemi siulersuisut Naalakkersuisut siulittaasuata Múte B. Egedep nersualaarpai.
Leiff Josefsen
Siorna ingerlatseqatigiiffimmi soqutigisaqaqatigiit nukittunerusumik pitsaanerusumillu oqaloqatigineqarnissaannik umiarsuaatileqatigiiffik peqquneqarpoq, Muté B. Egedelu aallaavigalugu tamanna iluatsippoq. Siornatigut Verner Hammekenip inuussutissarsiortullu akornanni ukiorpassuarni oqaloqatigiilluartoqarneq ajorpoq, Niels Clemensenilli umiarsuaatileqatigiiffimmi pisortaanertut atorfinitsitaaneraniilli, umiarsuaatileqatigiiffiup inuussutissarsiortullu akornanni oqaloqatigiinneq allaanerulluinnarpoq.
Angalanermut pilersaarutip pingaarnerup nalilerneqarnerani Qaanaami, Tasiilami Ittoqqortoormiinilu pilersuinerup pitsanngorsarneqarsimanera, Naalakkersuisut siulittaasuata aamma nuannaarutigaa.
Misissuineq suli piariinngitsoq
Naak ukioq ataaseq qaangiutereeraluartoq, umiarsuaatileqatigiiffimmi navianartunik arlalinnik Muté B. Egede takunninnini pissutigalugit, Ingerlatseqatigiiffiup Allattoqarfiata ingerlatseqatigiiffimmik misissuinissaanik peqqusinera suli naammassinngilaq. Ukiulli naanerani misissuineq naammassineqarumaartoq oqarpoq.
Peqquserlunnerit pinaveersaartinniarlugit peqquserlunnermik pinaveersaartitsinermik aaqqissuussamik ingerlatseqatigiiffiup atuutilersitsisimanera pillugu, Múte B. Egedep aamma ingerlatseqatigiiffik qutsavigerusuppaa. Namminersorlutik Oqartussat ingerlatseqatigiiffiutaat annertuut peqquserlunnermik pinaveersaartitsinermik pisussaaffilerneqarnissaat KNI-mi kanngunartuliortoqareersorlu aallartinneqarpoq, tassani pisiassat nalingi allanngortinneqarsimammata, naatsorsuuserinermilu pisortaasimasoq peqquserluttuliorsimasutut allakkanillu eqqunngitsunik allattuissimasutut unnerluutigineqarluni.
