RAL-ip siulersuisuini ilaasortat nutaat pingasut

Kalaallit Nunaanni inuiaqatigiinni pissutsinik, aningaasaqarnermut umiarsuarnillu angallassinermut tunngasunik Royal Arctic Linemi siulersuisunut ilaasortat nutaat pingasut ilisimasaqarluarput.

Erik Østergaard, Erik Sivertsen aamma Julia Olsen siulersuisuni ilaasortaajunnaarput, Flemming Drechselimit, Inooraq Brandtimit savalimmiormiumillu Jóhanna á Bergimit taarserneqarlutik.

• Flemming Drechsel ukiup aallartinnissaata tungaanut Tusassip pisortaqatigiivini ilaasortaasimavoq, ukiunili aqqanilinni suliffeqarfissuarmi tassani atorfeqareerluni, suliunnaarniarluni nammineq aalajangersimavoq.
• Inooraq Brandt ullumikkut Rambøll Greenlandimi general manageriuvoq.
• Jóhanna á Bergi, Atlantic Airwaysimi pisortaasoq, siornatigut Faroe Shipimi pisortaasimavoq, taamaattumillu umiarsuarnik assartuinermik suliaqarneq pillugu ilisimasaqarluarluni.

Siulersuisuni siulittaasuusoq allanngorsimanngilaq, tassaavorlu Pâviâraq Heilmann.

Ilaasortat allat marluk — suleqataasunit toqqakkat saniatigut — tassaapput Barbara Agersnap aamma Miinannguaq Hilda Zeeb.