Royal Arctic Linemi pisortaq soraarpoq
Royal Arctic Linemi pisortap tulliatut Ivalu Kleist ukiuni tallimani sulereerluni marsip naanerani soraarpoq.
Royal Arctic Linep umiarsuaa Tukuma Arctica
Jesper Hansen
Ivalu Kleist ukiorpassuarni umiarsuaatileqatigiiffimmi Royal Arctic Linemi atorfeqarsimavoq. Maannali taamaatippoq, suliffeqarfiit allattorsimaffianni tamanna takuneqarsinnaavoq.
Ivalu Kleistip „inuunermini nutaanik unamminilligassaqarnissani kissaatigigaa“, RAL-imi pisortaaneq Niels Clemensen oqarpoq.
Umiarsuaatileqatigiiffiup qullersaqarfiata ilaasortaanik arfineq-marlunnut Verner Hammeken RAL-imi pisortaanermi nalaani amerleriarujussuartitsivoq. Ivalu Kleistip taamaatinnerani qullersaqarfimmi ilaasortatut atorfiup inuttalerneqarnissaa pilersaarutaanngilaq.
- Maannakkut ingerlatsinermut pisortamik nutaamik atorfinitsitsisoqarnialerpoq, taanna RAL-imi pisortatut nalunaarsorneqarsimasutut atorfinitsinneqassanngilaq, soorunamili ulluinnarni RAL-ip aqutsisuinut ilaassaaq, Niels Clemensen oqarpoq.
Ingerlatsinermut pisortaq
Royal Arctic Linep umiarsualiviini nunami ingerlatsineq umiarsuarnillu angalanissamut pilersaarutit Ivalu Kleistip akisussaaffiginikuuai. COO-tut, Chief Operation Officer-itut, taaguuteqarsimavoq. Ivalu Kleist 2015-imiilli umiarsuaatileqatigiiffiup aqutsisoqatigiivinut ilaasortaavoq.
Ivalu Kleist assartuinermi logistikkimilu akademiøkonomitut ilinniagaqarsimavoq, ukiorpassuarnilu Nuummi Maniitsumilu umiarsuaatileqatigiiffimmi assigiinngitsunik suliaqartarsimalluni.
